Апрельданул 8-нний «Молодежь Дагестана» кказитрал редакциялий хьунни ДР-лул жилищный инспекциялул хъунаманал хъиривчу Айдемир Аьлиоьмаровлул пресс-конференция.

ХIасан Аьдилов
«МД» кказитрал хъунама редактор Абаш Абашиловлул бувсунни хъамаличунал мурадрая. Пресс-конференция хас дурну дия тIювалул-коммунал хозяйствалул (ЖКХ) масъаларттан.
А. Аьлиоьмаровлул бувсунни жилищный инспекциялул щаллу дуллалисса давурттая. Ганал увкусса куццуй, га идаралул даву хъанахъиссар коммунал хIаллихшинну даврил ялув бацIаву, къатрал управлениялун хасъсса информация халкьуннан аьч баву, чIявуквартирартту бу­сса къатрал капитальный ремонт даврил хIакъиравусса информация, управляющий компаниярттал давурттал хIакъиравусса информация аьч баву, яни инсантурахь бусаву, гайннал давурттал ялув бацIаву.
Яла байбивхьуна хъамаличунахьхьун суаллу буллай.
Цалчинмур суал бия укунсса: «Зуйн багьайссарив къатрачIа пристройкарду дуллалаврил масъала?».
Жаваб: «Тагьар укунссар. Федерал закондалийн бувну, пристройкарду дансса ихтияр, квартирардал планировка да­хханаххи дансса ихтияр дулай­ссар кIанттул цилакаялувшиврул органдалул, яни администрациялул. Жилищный инспекциялул даву хъанай дур так мунил ялув бацIаву. Мукунсса даву дан, яни пристройка дан, планировка да­ххана дан аьркин хьурча, мунил залуннан аьркинссар хасъсса организациялущал кьутIи дурну, проект хIадур дан. Агар жун кIул хьурча мукунсса давуртту дуллалишиврул хIакъираву, жу бувкIун тиккун, ми давуртту ихтияр дакъана дуллай бухьурча, административ танмихIрайн кIункIу байссар. Инспекторнал тиккура чичайссар акт, хIадур байссар протокол закон лиян дуллалиманал хIакъираву. Агана муницIун акьлай акъахьурча га даву закондалий къадуллалима, дело тIайла дуккайссар мировой судрайн.
Суал: «КIанттул цилакаялувшиврул органдалул къатIайлану документ буллуну бухьурча, зуща шайссарив цичIав бан?».
Жаваб: «Администрациялийн къаршисса, мунил давур­ттал хьхьичIалу кьукьинсса ихтияр жухь дакъар. Жуща шайссар так материаллу хIадур дурну, судирттайн, прокуратурардайн тIайла дуккан.
Суал: «Щин, газ ишла баву ккаккан дайсса приборду дишаврия ци хайр буссар залуннан?».
Жаваб: «Хайр бур, цанчирча ми приборду дирхьуманая хIаллихшиннахсса арцу чанну ласайссар, яни харж дурссаксса. Ми дирхьуманал щинал, газрал луртаннугу чанну харж дуллалиссар. Масалдаран, учетрал прибор дакъахьурча, нормативрайну кулпатравусса гьарцаннал щинал 380 литра ишла дуллалаврин ккаллиссар, микссаннухсса багьагу ласайссар. Му тIайласса затрив? Счетчикрайну лап чан­сса арцу харж шайссар, яни счетчикрал ккаккан дурссаксса.
Гьашину квартирарттаву ялапар хъанахъиминнаяту ца квадрат метралух 5 къуруш ва 20 кIапIикI тIалав дуллай бур капитальный ремонтрахлу. Къатраву яхъанахъиминнан аьмсса собраниялий шайссар цамур тариф дишин. Амма му тариф къабюхъайссар яла чIиримур тарифраяр чансса дикIан. АрхIал дишин: Тюменнай ласайссар 20 къуруш 1 квадрат метралух, Москавлив 15 къуруш. Бур регионну ца квадрат метралух 2 къуруш ласайсса, тай субъектирдал капитальный ремонтрахлусса багьлул хъунмур бутIа цалва бюджетрава булайссар».
«Илчилул» вакилнал суал укунсса буллунни:
«Циванни гьарца зуруй кап­ремонтрахлу арцу ласласи­сса, га ремонт цими шинавату дантIиссарив къакIулну бунува? Бюхъай 20,30, ягу 40 шинавату дуллан жул къатлул капремонт, му чIумалнин цу ур, цу акъар? Му хъанай бур гьарца зуруй ттучандалийн занай арцу кьаритлай, цичIавгу къаласлай махъунай зана хъанахъаву».
Жаваб: «Къатраву ялапар хъанахъиминнаща шайссар, аьмсса собрание дурну, цалла личIисса счет тIитIин региондалийсса операторначIа, яла салкьи хьусса арцух къатраву ремонт дуллан».