Гьашинусса шин республикалий баян бунни Багъру бугьаврил шинну. МуницIун бавхIуну республикалул личIи-личIисса идарарттай мурхьру, щюллишиву дугьлан бивкIунни. ЦIуминалийсса Чапаевкаллал школалий ва даврих ляличIисса къулагъас дуллай бур.
Уттигъанну вайннал школалул хIаятраву Буйнакскалия бучIан бувну бувгьунни хъюртул, 5-6-ва жура­сса гьивчул, цIулитул, ахъвазандалул, бяълилул ва жанграл 140 мурхь.
— Ттун хъинну ххуй бивзунни ДР-лул БакIчинал багъру бугьаврих, цIубуккан баврих хъуннасса къулагъас дуллалаву. Багъру бугьаврил шин баян баннинма, ссуттихунмай жу, депутатътал, шяраваллил активистал бавтIун, школалул хIаятраву бувгьуссия жура-журасса ахъулссаннул мурхьру. Вай циняв мурхьирдаха аякьа дулланшиврул школалий гъинттул оьрчIал захIмат буллансса лагерь тIитIинсса пикрилий ура. КIира гектар ва чIаравсса дусса аьрщи дур цIана школалучIа. Вайннуй гьашиву дан ччай акъара. Уттигу ахънилсса дугьансса ххишаласса аьрщи тIалав дуллай ура. Ва аьрщарай ляличIинува ххуйну ххяххай къавахъ, помидор, нисварти. Пикрилий буру ахъулсса ва ахънилсса дарххусса арцух оьрчIан школалий аьркинсса кьай-кьуй ласун, нитти-буттайн къабувккун, школалий оьрчIан аьркинмур щаллу дан. Вай багъирдая, бахчардая бакIлахъия ласунгу оьрчIру цивппа зузи бантIиссар. Цуксса даврихун бивчуну бурив оьрчIру, муксса захIматрал кьадру буну бикIайссар. На навагу оьрчIнияцIа зий аьдат хьуну ура. Ттул бутта АхIмадгу цIанихсса багъманчия. Орджоникидзел цIанийсса Чапаевкаллал шяраву ттул буттал бувгьуссия цикссагу бяълилул, гьивчул, хъюртул, кякандалул мурхьру. Утти миннух аякьа дакъа, буттал бувсса захIмат хьхьичI бацIлай къащи хъанан дикIай. Мунияту на хъинну рязийну ура Республикалул БакIчинал ва чулухуннай, багъру бюхъан баву мурадрай дуллалисса даврия, — тIий, буслай ур ЦIуминалийсса Чапаевкаллал школалул директор Камил Аьлиев.