Гьашину Къизлардал шагьрулий, аьдатравун багьну, кIилчинни хьунабакьлакьисса Ххувшаврил 70 шинан хас дурсса «Наша Великая Победа» цIанилусса автопробеграл гьурттучитал. Буттал КIанттул цIанийсса Хъунмасса дяъвилий гьуртту хьуминнан шагьрулул паркраву дирхьусса «Память» тIисса мемориалданучIа, автопробегращал бувкIми кьамул бунни Къизлардал шагьрулул хъуниминнал. Мукунма бувкIун бия дяъвилул ветерантал, жяматийсса идарарттал вакилтал, студентътал ва шагьрулул агьали.
И. Саидова
«Наша Великая Победа» автопробег акциялул гьашину цачIун бунни 10-хъул жяматийсса идаралул 6 паччахIлугъраясса вакилтал. Автопробег нанисса 55 гьантлул мутталий Ххувшаврил Ттугъ биян бан тIий бур 90-ксса шагьрулийн.
Къизлардал шагьрулий автопробеграл гьурттучитал кьамул бунни шагьрулул мэр Александр Шуваловлул:
— Жува буржлувссару та Хъун дяъвилий буттал буттахъал дурсса чувшивуртту абад дуллан ва миннуя ялун нанисса никирахь пахрулий буслан. ТачIавгу хъамабитан къааьркинссар, цалла жаннай хIайп къаувкуну, ва ххувшаву жунна бахшиш дурсса ветерантурал захIмат, — увкунни ванал.
«Наша Великая Победа» дунияллул халкьуннал жяматийсса проектрал координатор Олег Слюсаренкал кIицI лавгунни Ххувшаврил байран жулва тарихраву агьаммур душиву. Ванал бувсунни ва проектгу 4 шинал хьхьичI Украиннал аьрщарай, Севастопольлай, хIасул дуршиву.
— Къиримнал агьалинан танийва бувчIлай бия Аьрасатнащал цачIун хьуну, дусшиву дукъарссаксса, цалва бучIантIимур бакъашиву. Гьай-гьай, хIакьину вайннал язи бувгьусса ххуллу цуппагу бигьасса бакъар. Ва автопробеграву хIакьину Ххувшаврил Ттугъ лавсун бувкIсса 23-мур шагьруну хъанахъиссар Къизлар. БиянтIиссару уттигу жу тамансса шагьрурдайн. Вирттаврал аьрщаран ккаллиссар Къизлардал шагьругу, — увкунни Слюсаренкал.
Митинграй ихтилатру буллалими циняв кIицI лаглай бия Къирим ва Севастополь АьрасатнацIун цачIун шаврил агьамшиву. Мукунма жагьилсса никирахь насихIат ккаклай бия жулва билаятрал тарих лахьхьаву ва дяъвилул ветерантураха хIурмат-кьимат буллалаву.
Ахирданий цинявннал, дяъвилул ветерантурал мемориалданучIа тIутIивгу дирхьуну, шадлугърай тIивтIунни 200-хъул квадратный метра дусса Ххувшаврил Ттугъ. Буниялагу ва хьунни шагьрулул тарихраву личIансса ххаллилсса иш.
Шиккува кIицI лаган, автопробеграл проектрал сиптачитал хьунни «Боевое братство» тIисса Щалагу Аьрасатнал ветерантурал жяматийсса идара. Мукунма ва давривух хIала бувххунни Дяъвилул славалул шагьрурдал союз ва «Антимайдан» тIисса движение. Автопробег дайдирхьуссар март зурул 17-нний Севастопольлай Нахимовлул цIанийсса майдандалия.
Май зурул 9-нний Ххувшаврил Ттугъ бищунтIиссар Москавуллал ЯтIул майдандалий.