«ДуккаврицIун лавчIманан давугу лякъинтIиссар», тIисса калима цIакь дуллалисса даву хьунни вай гьантрай жагьилсса лакку оьрчI Дагъусттаннал Экономикалул министерствалий хъунама специалистну итаву.

ПатIимат Рамазанова
Му жагьилная бусаннин чIуручIаву дуванна ихтилат дипломрая бакъашивуча, куртIсса ва цIакьсса кIулшивурттая бушиву. ЦIуйшиял шяравасса Салимлул ва Чапаевкалиясса Асиятлул арс Смит Расулов ЦIуссалакрал 2-мур школалий дуклакинийва дарсирдацIун лавчIсса, хIарачат бусса оьрчI ия тIий бур мунал учительтал. МарцIну ххювардай дуклакисса Смит цимилагу гьуртту хьуну ур республикалул олимпиадарттай, масалдаран, 2009 шинал ххув хьуну ур Республикалул обществознаниялул олимпиадалий. Мусил медальданийну школа къуртал бувсса Смит дуклан увххун ур Дагъусттаннал паччахIлугърал университетравун, экономикалул факультетрайн. Миккугу дуккаврил итххявхсса, гьунар бусса оьрчI факультетрал пахрулунсса студент хьуну ур. 2012 шинал Ставрополлай хьусса экомикалул щаллагу дунияллул халкьуннал дянивсса олимпиадалий ххув хьуну ур. Смитлул хьхьичIунсса гьурттушинна дурну дур «Селигер-2013», «Машук -2013», «Машук-2014» форумирттай ва миккугу личIи-личIисса бахшиширттан лайкь хьуну ур. Ххув хьуну ур « Шинал студент-2014» номинациялувугу. Университетгу ЯтIул дипломрайну къуртал бувну бур. Жунма кIулли Республикалул БакIчи Рамазан АьбдуллатIиповлул Халкьуннал Мажлисрайнсса Рисалалуву Дагъусттаннайсса оьрмугу, маэшатгу гьаз бавриву жагьилталгу гьуртту хъанан аьркинссар, миннан зузи кIанттугу буллан аьркин­ссару увкушиву ва тапшур бувну бивкIшиву итххявхсса жагьилтуран кабакьу буллалисса идара хIасул буван. Мукунсса идара хьуссия 2013 шинал хIасул дурсса Жагьилтурал тIиртIусса хIукумат, (Открытое молодежное правительство). Му ОМП-лул вакилтал министерствардал ва цаймигу учреждениярттал мероприятиярттай гьуртту хъанай, миннал даврил мухIлу-хIин лахьлай, опыт салкьи буллай буссар. Му идаралул вакил Смитлунгу дакIнийн багьну бур жагьилтуран пасихIну гъалгъа бан, учаймур бувчIинну ва аьщуйн щун бувну учин лахьхьин буллалисса Школа ораторского искусства тIитIин университетрал лаг­рулий. Му школалун цIагу дирзун дур «ТIайлабацIулучIансса ххуллу» (« Путь к успеху»). «Ттун хъинну ххуйну бувчIлай бура давриву хьхьичIуннайшивуртту данна тIисса инсаннан чара бакъа халкьуннал хьхьичIун увккун, бувчIинну ва бюхханну гъалгъа бан лахьхьин аьркиншиву. Хъунисса къуллугъирттай зузисса инсанталгума бикIай духIиндарай, бувчIинну ва мяълумну ихтилат бан къахъанахъисса, мазрал къуркъасса, кутIану цалва пикри бусан къахъанай, лахъисса нагъиллу ккалай булукьайсса. 2011 шинал хIасул бувссия му школа, цанна-цанналусса ва группардан­сса тренингру дуллалисса, студентътал бакъагу, личIи-личIисса пишардал заллухъру бувкIунни жучIан аудиториялул хьхьичIун бувккун сивсуну гъалгъа бангу, гъалгъа магьир бангу лахьхьин. Гьашину 4-сса выпускри школалул итабавкьусса, апрельданул 4-нний выпускран сертификатру дуллалисса мероприятиялий гьуртту хьун ДГУ-рал экономический факультетрал актовый залданувун увкIун ия ДР-лул ХIукуматрал председательнал хъиривчу Шарип Шарипов, мунахьгу хъунмасса барчаллагь учин ччай ура. Шарип Исмяиловичлул жул проектрал агьамшиврий чIуручIаву дуллалисса ихтилатгу бунни. Жу дуллалимуницIун кабакьугу бувай мудан», — буслай ур Смит.
Сертификатру дуллалисса кIанай Смит Расуловлул даврин лавайсса кьимат бивщунни экономикалул факультетрал декан Мурад Исяевлулгу. Смитлул бувсунни школалий мастер-класс ккаккан байшиву Москавлиясса ва цайми шагьрурдаясса хъамаллурал. Масалдаран, апрель зурул 18-нний Аьра­сатнал ПаччахIлугърал Думалул эксперт ва Аьрасатнал студентътурал профсоюзрал председатель Алексей Казаклул мастер-класс бивкIшиву. Бувсунни дагъусттаннал бизнес-школалийгу «Страх публичного выступления» тIисса тренинг диркIшиву, миккун чIявусса агьлу бавтIшиву ва мюнпат хьунни цанма тIисса ихтилатру минналгу бувшиву. Дагъусттаннай хьхьичIва-хьхьичI пасихIну гъалгъа бан лахьхьин байсса школа тIивтIусса Смитлул цала му даврил магьиршиву лахьхьин дуллалисса тамансса курсру къуртал бувну бур. СНГ-лул билаятирттай ораторикалул яла хьхьичIунма тренернан ккаллийсса Радислав Гандапаслул курсругу къуртал бувну бур. Смит Расулов спортравугу итххявхсса жагьил ур, школданий унийва спортрахунгу агьну ур. Му карате-кекушинкайлул дагъусттаннал призер ур, мукуна ката-карателул ва бразилиянал джиу-джитсулул журардавугу да­гъусттаннал призер ур. Боевой самболул спортрал мастергу ур. «Школалул ва университетрал оьрмулул иширттавух гьурттушинна дуллай ухьурчагу, на тачIав спортраягу ят къаувцра, — тIий ур Смит. -Гьарцагу чувнан спортгу хьхьичIунну дикIан аьркинссар, дуккавугу, давугу, спортрахун дахчайсса затругу дакъархха». Вай гьантрай Смит Расулов ивтунни Дагъусттаннал Экономикалул ва территориал развитиялул министерствалул хъунама специалистну. Укунмур чIумал учай «даврил цила лявкъунни инсан» куну. Укун, даврил цила лявкъунни Смит куну учин бюхъанссар кьянкьану.
ДакIнийхтуну барча уллай буру оьрмулул 22 шинаву къуллугърай ивтсса жагьил ва умудрай буру миккугу мунал цалва бюхъу-гьунар ккаккан буванссар тIий. Смит Расулов барчаллагьрай ур оьрмулуву цала бюхъу-гьунарданийн чул бивщуну хIарачат буллалиманал хияллу дузрайн буккайшиврий цува дакI дацIан увсса нитти-буттайнгу. Салим ва Асият Новостройрай яхъанай бур.