МАХIАММАДЛУЛ АРС ХIУСАЙНОВ ВАЛЕРИЯН
Вай гьантрай дунияллия лавгунни ГьунчIукьатIрал шяравасса ххаллилсса инсан, МахIаммадлул ва Назипатлул арс Валериян ХIусайнов (Куйбышев Валерьяннул цIа дирзсса).

МахIачкъалаллал №1 школагу къуртал бувну, физикалул, математикалул итххявхсса, яла захIматми задачарттугу бигьану байсса му дуклан увххун ур Дагъусттаннал университетрал физикалул факультетрайн, маркIачIанмур отделениялийн. Дяхтта цал слесарьну, яла токарьну зий, хьхьувай – дуклай, институтгу къуртал бувну, зун увххун ур Элмурдал академиялул Дагъусттаннал филиалданувун, физикалул институтравун.
1974 шинал ивтун ур ДАССР-данул ЖКХ-лул министерствалул «Тепловые сети» предприятиялул отделданул хъунаману ва 2006 шиналнин, яъни пенсиялийн укка­ннин, миккува зий ивкIун ур. Му чялишну хIала уххайссия жяматрал оьрмулуву хъанахъисса иширттавух, «Тепловые сетирдал» профкомрал председательнугу зий икIайссия.
1975 шинал Гъумучатусса Щипиева СалихIатгу бувцуссия, лайкьсса тарбия дуллуну хъуни бувссар 2 арс.
Валериян ия дакI-аьмал хъин­сса, гъанцириннал, чIахху-чIарахнал чIарав ацIайсса инсан, цана увкнайн шайсса кумаг байва, халкьуннан ххирасса ия.
Валериян дунияллия лагаврил кьурчIишиву кIидачIлай, жижара буллай буру кулпат СалихIатлухь, арсурваврахь АхIмадлухь ва Аьбдуллухь, цинявгу гъан-маччацириннахь. Цув алжаннул ххари уваннав, гьа­ттай нур дизаннав. Валерияннун къабуллумур оьрмулул бутIа наслулун ххи бувну лякъиннав.
ГьунчIукьатIрал жямат

—————————————-

АЬБДУЛХАЛИКЬЛУЛ ДУШ АЛАЛАЕВА (ГЪУЖИЕВА) УМРАГЬИЛ
Апрель зурул дайдихьулий ЧIарттал шяравалу машинарттал ва инсантурал дурцIуну дия. Вай бия бавтIун цанма ххирасса учительница Алалаева (Гъужиева) Умрагьил Аьбдулхаликьлул душ махъва-махъсса ххуллийн тIайла буккан.
Ккурклив 7 класс къуртал бувну махъ Умрагьил дуклай бивкIссар Гъумучиял педучилищалуву. Га дия дяъвилул яла къизгъинмур чIун. Бакъая щархъаву учительтал. Школарду лакьинсса даражалийн бивну бия. Щархъал бакIру дургьуми, лавгун Гъумукун, педучилищалул директор Дандамаев Аьбдулкьадирдухь тавакъю бувну бур, педучилищалул кIива курс къуртал бувсса оьрчIру заочнайну бивчуну, школардай дарсру дихьлан гьан бува куну. Аьбдулкьадирдул, школардал тагьар дурчIуну, щархъал тIалавшин биттур дурну дур. Мукун Ккурклиятусса кIива душ, Умрагьил ва Пирдавс, ЧIарав бувкIуна. Душру ччяни школалул ва шяраваллил иширттавух хIала бувххуна, учительницахъул ххира хьуна жяматран ва оьрчIан. Школалул душварал ганз жуларду, катIри, ганз гьухъри байсса кружок сакин дурну, гьан дуллан бивкIуна полевой почталул адресрай посылкарду.
Умрагьил бия хъинну хIал бавкьусса, оьрчIал дакIнивун ххуллу ласун бюхъайсса инсан. Ванин хъинну ххирая лакрал ва Дагъус­ттаннал фольклор, ванища му ччаву оьрчIал дакIурдивунгу духхан дан, дуккаврих гъира бутан бювхъуна. Умрагьиллул щалва оьрму лавгуна ЧIарав.
Цанма ххира хьусса учительницащал личIи хъанай, шяраву хъуннасса дягъулул батIаву дунни. Ванил жижаралий бувкIунни ЧIарттал, Ккурккуллал, Кьукуннал жяматру.
ЧIарттал учительтурал, дуклаки оьрчIал ва нитти-буттахъал цIанияту Умрагьиллул оьрчIащал, гъанчунащал кьурчIишиву кIидачIлачIисса ихтилат бунни ЧIарттал школалул директор Кьадиров Макьсудлул, Ккурккуллал школалул директор Магьдиев Данияллул.
Умрагьиллул, ххуйну тарбиягу бувну, оьрмулул ххуллийн бивчунни 6 оьрчI.
Ва бия Аллагьналва учительну ляхъан бувсса, оьрчIах ччаву дусса, дакI хъинсса, хIал бавкьусса хъамитайпа. Умрагьил аьпалул шаврил кьурчIишиву кIидачIлай, жижара буллай буру ванил арсурваврахь, душваврахь, махъсса гъан-маччанахь. Алжаннул ххари баннав, рухI хъинний дишиннав.
ЧIарттал ва Ккурккуллал
жямат