Уттигъанну кунма «Фейсбукраву» дирхьуссия на МахIачкъалалив Троллейбусрал паркрал райондалийсса «Имашка» тIисса ттучандалул хьхьичI оьрчIансса площадка бувну, неъмат ласлай бур оьрчIру тIисса текстращалсса суратру.

Буниялттунгу, мукунсса неъматирттая махIрумну бур жулва оьрчIру. Ххари бунна цамур иширалгу: апрель зурул 13-нний Кировский администрациялий хьунни «Зеленая зона» тIисса проектрал презентация. Му дур шагьрулуву оьрчIансса, нигьачIаву дакъасса площадкартту бавриха, бачIвасса кIанттурдай агьалинан ххуйну бигьалаглансса шартIру дузал давриха зунтIисса проект. Му проект дурсса 1-мур ЦIувкIратусса Баширдул арс ХIасан СантIуев ДР-лул Минтрудрал «Успех» тIисса республикалул жагьилтал даврил щаллу бай центрданийн увккун ур проектрал хIакъираву цIухху-бусу бан.
Проектрал презентациялий гьуртту хьунни Кировский райондалул администрациялул бакIчи СалихI Сагидов ва кIицI лавгсса «Успехрал» (РМ ЦЗ) директор Заур Оьмаров.
«Ва проект бартдигьаврийну шагьрулул агьалинан ххуйну бигьалаг­лансса кIанттугу хьунтIиссар, агьали цивппагу рязийну бикIантIиссар цалла цIуллу-сагъшиврух къулагъас дансса хIалу дагьаврия», — тIий ур ХIасан СантIуев. Мунал проект хъинчулий ккавккунни СалихI Сагидовлул ва Заур Оьмаровлул.
«Проектрал лагрулий дуллансса давурттал балжисса плангу дурну, му проект Шагьрулул БакIчинал ххалдигьин дуванну», — увкунни СалихI Сагидовлул.
Шагьрулул администрация­лул мукунсса проектру бартдигьав­рицIун кабакьу буваврия ххари хьусса бакъа къабикIанссар. Муданма мудан шагьрулий бигьалагансса ххуйсса кIантту бакъашиврия, щюллишиву чанну душиврия гъалгъатIий буру жува. Гъалгъардал хъирив кIунтI бивхьуну, даву дайдиширча хъинникьай!