Апрельданул 7-нний ДР-лул ХIукуматрай хьунни ХIукуматрал экономикалул лябуккулун ва интеграциялун хасъсса комиссиялучIасса моношагьрурдал (моногорода) (ца пишалул щаллу буллалисса шагьру) модернизациялул Зузи группалул заседание.
Заседание хьунни ДР-лул ХIукуматрал Председатель Аьбдуссамад ХIамидовлул ва Внешэкономбанкрал Председательнал хъиривчу Ирина Макиевал каялувшиврулу.
Внешэкономбанк цIанасса ппурттуву хъанай бур республикалул ца яла хъунмур инвесторну, ганил дирхьуссар 7 млрд. къурушру Каспийскаллал пюрунтрал завод бавриву.
Премьер-министрнал бувсъсса куццуй, АьФ-лул ХIукуматрал ХIукмулийн бувну, Каспийск ва Дагестанские Огни шагьрурду лавсун бур чIявупрофиллу бусса муниципал сакиншиннардал сияхIрайн. Миккугу Каспийск лавсун бур «ятIулмур зоналул» (1-мур категориялул) моношагьрурдал категориялийн, миккун бувххун бур захIматсса социал-экономикалул тагьарданущалсса шагьрурду. Каспийскрал хъар рутлай бур шагьрулул гьануну бувну бивкIсса военно-промышленный комплексрайн («Дагдизель» завод ва «Каспийский завод точной механики»). Аьбдуссамад ХIамидовлул мукъурттийн бувну, Республикалул ХIукуматрал цIанасса ппурттуву моношагьрулул экономикалул диверсификация дувансса хIарачат буллай бур. Масалдаран, кьутIи хьуну дур «КЭМЗ» концерналул производствалул дачIи Къизлардая Каспийскалийн дизан даврил хIакъираву. Мунияр ххишалагу, приоритетрал низамрай щаллу буллай бур Каспийскаллал чIарав «Уйташ» тIисса инвестициярдал площадкалий 20 млрд. къуруширттансса инвестициярдал 3 проект даврин хасъсса масъала.
Цилва ихтилатраву Ирина Макиевал бувсунни цIанасса ппурттуву билаятрай бушиву 314 моношагьру. Мукунма бувсунни вай гьантрай Москавлив хьунтIисса совещаниялий ххалбигьин тIий бушиву Каспийск шагьрулун моношагьрурдал фондравату кумаг бансса чаранну.
«Жу кIул дарду Каспийскалий хьусса тагьар, кIулли 2 предприятиялий хьхьичIва зий бивкIшиву 16 азаруннаяр ххишаласса инсантал, цIана зий ур так 2300 инсан. ХIакьину Каспийскаллан кумаг бан аьркинни», — увкунни Ирина Макиевал.
Совещаниялий гьуртту хьусса Стратегический инициативарттал агентствалул корпоративный директор Светлана Чупшевал бувсунни хIадурну бушиву Дагъусттан Республикалущал уртакьну зун моношагьрурдан кумаг баврил ва цаппара проектру арцул щаллу даврил бутIуву.
«МСП-Банк» ОАО-рал председательнал хъиривчу Петр Тарамовлул бувсунни банкрал кумаграйну Дагестанские Огни моношагьрулий дузрайн дуккан дурну душиву завод «Дагстеклотара» тIисса инвестопроект.
Ахирданий Аьбдуссамад ХIамидовлул барчаллагь увкунни Зузи группалул члентурахь Дагъусттаннайнсса аьрххилухлу, яла ххалбивгьунни моношагьрурдайн багьайсса цаймигу масъалартту.
ХIадур бувссар ХI. Аьдиловлул
