Инсаннал ххуй-ххуйми тIул-тIабиаьтру оьттувухра дучIайссар учару. Жулва лакрал аьдатрай шагьрурдай ва шяраваллаву чIявусса хъамал бикIай, «буттахъалва хъамалли» тIисса калима жунна чIяруну баяй. ХIакьинусса кьинигу, оьрмулул бугьараминная хаснува, жунма мукунма чIявуну баяй хъамаличу
барачатссар, хъамаличу яла бусравма инсанни тIисса калимарду. Актау шагьрулийсса,
Цалчинмур ЦIувкIратусса, Нуруллагь ва Аминат Садикьовхъайнгу нитти- буттахъая ирсирай дирхьунссар хъамал ххирашиву, аякьалийсса хIурмат хъамаллураха бан кIулшиву.
ПатIимат Рамазанова
Нуруллагьлул нитти-буттал ччянира шагьрулий къатри ларсукун, миннанний ликкайсса бивкIун бур шяраваллавасса хъамал. Аминатлул нитти-буттал къаттагу ккурчIавва бия, хъамал чIявуну буххай къатта бия. Ппу ТIажиб 50-хъул шинну школарттай зий дурсса, биялсса опыт бусса, халкьуннал тIийкун, учительтуралгу учитель ия, райондалий мунал цIа къакIулсса акъая, бухху-буккугу миннал ужагърай чан къашайва. ЧIярусса шинну Къазахъисттаннай дурсса, тихалу кIилчинмур ватанну хьусса Нуруллагьлул ва Аминатлул хъамаллураха байсса хIурматрал бардулт хьуссар Актаулий Садикьовхъал гъилисса дагъусттан кюрттарай хьусса, щалвагу Аьрасатнаву ххуйну кIулсса, гьунар бусса шаэр Миясат Муслимовагу, Дагъусттаннал халкьуннал балайчи Лариса ХIажиевагу, лакку мазрайсса «Аьрщи ва агьлу» телепередачалул автор Марианна МахIаммадовагу. Ттунма кIулмира кIицI лаглагисса. Нуруллагьхъал къушлий цивппа ххарину ва хIурматрай хъин бивтшиву буслай бур уттигъанну тийх бивкIсса дагъусттаннал делегация. КъакIулнахьгу бусан, март зуруй Актау ва МахIачкъала шагьрурдал дянивсса хIала-гьурттушиврул арарду цIакь дуллалисса кьутIи чирчуссар Актаулий. Ларгсса шинал июнь зуруй МахIачкъалалив увкIссия Актау шагьрулул мэр, тайннал зумуну аким, Едил Жанбыршин. Му хьунаавкьуссия МахIачкъала шагьрулул бакIчинал къуллугъ чIумуйну бартбигьлагьисса МахIаммад Сулаймановлущал. Утти Актау шагьрулул акимнащал хьунабакьин тихун лавгссия МахIачкъала шагьрулул администрациялул бакIчинал цалчинма хъиривчу Рафик Буттаев, мэрнал кумагчи Руслан Хинабиев, шагьрулул Культуралул управлениялий каялувшиву дуллалисса Фарид Абалаев ва Дагъусттаннал лайкь хьусса артистка Зульфия Илиясова. Шагьрулул аким Едил Жанбыршиннул му хьунабакьаврий сайки мукьазарунниха ливчусса дагъусттанлувтал Актаулий яхъанай бур, ми циняв республикалул оьрму хьхьичIунмай буллай зий бушиврия, муницIухва дагъусттаннал агьали дуккавриву, элмулуву ва давурттаву итххявхсса бушиврия, чил кIанттай бунугу дагъусттаннал цIа гьаз дуллай бушиврия ххуйсса ихтилат бувну бур. Къазахъисттаннал ва Дагъусттаннал делегациярдал чул бищай ттарцIнугу, гьай-гьай, Нуруллагь МахIаммад-Рамазанович ивкIун ур.Тай гьантрай Актаулул акиматрайгу мунал цIа зумату щяв къадихьлай бивкIун бур. Му цувагу физика-математикалул элмурдал докторди, профессорди. Зийгу уссар Технологиярдал ва инжиринграл паччахIлугърал Каспийский университетрал проректорну. Щалвагу Каспийский регионнаясса – Дагъусттаннаясса, Азирбижаннавасса, Ираннавасса студентътал кьамул байсса буну тIий дур му университетрал Каспийский тIисса цIагу, цуппагу Къазахъисттаннал республикалий сийлийсса вуз бусса бур. Нуруллагь Къазахъисттаннал республикалул образованиялул отличник ур (1996 шинал дуллуну дур му цIа). 2009 шинал дуллуну дур мунан «Къазахъисттаннал республикалул образованиялул бусравсса зузала» тIисса цIагу. Дур мунал «За высокие достижения в области науки» тIисса хIурматрал лишаннугу. Цинярда бахшишру ва наградартту кIицI къадулланна, бусанна ларгсса шинал Нуруллагьлун дуллушиву ларайсса кIулшивуртту дулаврил даву хьхьичIуннай дуваврихлу Байтурсыновлул Орден. Му тайннал республикалийсса сийлийсса ва кьиматрайсса орден дур, уттинин республикалий му ордендалун лайкь хьуну ур увагу 6 инсан. Укун кьиматрай ур тайннал агьулданул дянив ххаллилсса инсан ва гьунар бусса аьлимчу МахIаммад-Рамазанхъал Нуруллагь. Аминат зий бур «Жансая и К» тIисса компаниялул директорнал хъиривчуну. Цивппа кунма агьалинан бусрав хьунну къуццу тIун лахьхьин бувну, цIакьсса тарбиягу, куртIсса кIулшивурттугу дуллуну дур вайннал душнин ва арснангу, мува ниятрай тарбия булланссар миннал наслугу. «Жу Садикьовхъал тIааьнсса тIювай шаппа кунма бияв, ссупралухгу аякьалийсса хIурматрай щябивтунав. Къатлул заллухъруннал дакIру луглай дия жуха бансса хъинбалалух, хIурматрах. Жу бияв ваксса хъинсса инсантурал жухарасса аякьа цукун зана дан хъинавав тIий», — укун тIий бур Актаулия бувкIсса дагъусттаннал делегациялул вакилтал ца зумату кунма.
ЦIуллушиву дулуннав зухьхьун, Нуруллагь ва Аминат! Ххари булланнав наслулул.
