Ставропольлал крайрайсса Дагъусттаннал Культуралул центрданул сипталийну дагъусттаннал литературалул кьинирду дуллантIиссар тIисса хавар, гьай-гьай, ххарину кьамул бувна дагъусттаннал чичултралгу, агьалиналгу. Литературалул мажлисру, луттирдал презентациярду, буккултрал конференциярду дуллан тIий бур Ставропольлай, Пятигорскалий, Кисловодскалий, Буденновскалий ва цаймигу шагьрурдай.
Литературалул кьинирдал хъиндайдихьу дунни вай гьантрай Пятигорскалий, му дайдихьугу лакрая дунни учирчагу тIайлассар. Хасну Пятигорскалий дайдихьу дуваврил савав дур гьаманки микку душиву сайки 75 шинал тарих бусса, Ухссавнил Ккавкказнаву яла ччяни хIасул дурсса, «Слово» тIисса литературалул ккуран. Му ккурангу хIасул дурну дур Буттал КIанттул цIанийсса дяъви байбишиннинма машгьурсса совет чичулт С. Бабаевскийл ва Апанни Къапиевлул. Му литобъединениялул членну буссия Аьрасатнаву ххуйну кIулсса чичу Мариян Ибрагьимовагу.
ПатIимат Рамазанова
Пятигорскалийн лавгсса лакрал делегациялуву бия лакрал чичултрал секциялий каялувшиву дуллалисса Илияс МахIаммадов, чичулт Хизри Илиясов ва Космина Исрапилова, Дагъусттаннал Халкьуннал шаэр Юсуп Хаппалаевлул арс МахIаммад-Аьзиз Хаппалаев. Космина Исрапиловал бувсунни лакрал чичултращал хьунабакьин чIявусса агьали бавтIшиву Пятигорскаллал шагьрулул центральный библиотекалувун, му Максим Горькийл цIанийсса хъунмасса библиотека бушиву. Бувсунни библиотекалий каялувшиву дуллалисса Фролена Орловал цилва ихтилатраву кIицI лавгшиву гьамин лакрал чичултрайхчIин ва лакрал литературалийхчIин кIул хьушиву Ставропольлан дагъусттан литература.
Ставропольлал чичултрал отделениялул хъунама Александр Куприннулгу барчаллагь увкуну бур Ставропольлайсса гьарцагу давурттавух чялишну хIала буххайсса МахIаммад Рашидовлухь, Зайнуттин ва ПатIимат ЯхIияевхъахь, Аьлил АхIмадовлухь. Библиотекалувун бавтIцириннахь лакрал чичултрал цалвами шеърирдацIун бувккуну бур АбутIалиб Гъапуровлул, Юсуп Хаппалаевлул, Ккурккуллал Щазал шеърирдугу. Чичу Илияс МахIаммадовлул лакку балайрдахгу гъирарай вичIидирхьуну дур бавтIцириннал.
Ставропольлал крайрайсса Дагъусттаннал вакил Аьбдулла Оьмаровлул ва ПаччахIлугърал Думалул депутат Жамалдин ХIасановлул цIанияту хъамалгу, кIанттул агьлугу барча буллалисса ихтилат бувну бур Дагъусттаннал халкьуннал культуралул центрданул правлениялул председатель М. Мазановлул. Муналгу цалва ихтилатраву барчаллагьрай кIицI ларгун дур Ставропольлал крайрай дагъусттаннал цIа гьаз дуллалисса давурттив дуллалиминнал цIарду. Мукунминнавух бур жунма ххуйну кIулсса агьлугу: Дагъусттаннал лайкь хьусса художник Аьлил АхIмадов, активистътал Камил АхIмадов, Сиражуттин Къардашов ва Сулайман Сулайманов, меценат Лариса Тутунова, Ставропольлайсса Дагъусттаннал вакилханалийсса элмулул ва культуралул иширттал маслихIатчи Муса ХIажимирзаев ва цаймигу. Гьаннайсса, Ставропольлал аьрщарайсса Дагъусттан литературалул кьинирдал ххуйсса дайдихьу хьуссар. Лакрал чичултрал секциялул хъунама Илияс МахIаммадовлул тIийкун, ставропольлал ва дагъусттаннал чичултрал дянивсса «дусшиврул ламулул» гьану бивзссар ва му ламу цIакь буллалисса давурттив уттигу дуллантIиссар.
