Июльданул 2-нний МахIачкъалалив республикалул Хъунмур библиотекалуву хьунни БакIссавнил Ккавкказнаву экстремистшиврул ва террорчишиврул идеологиялийн къарши буккаврин хасъсса, цаппара ведомствартту цачIусса, форум «Кьиблалул къалхъан» («Южный щит»). Форумрай гьуртту хьунни АьФ-лул Президентнал СКФО-райсса вакил Сергей Меликов, Аьрасатнал МВД-лул СКФО-райсса ГУ-рал хъунама Сергей Ченчик ва ДР-лул ХIукуматрал Председатель Аьбдуссамад ХIамидов.

Полпред Сергей Меликовлул, форумрай махъ лахълай, увкунни: «БакIссавнил Ккавкказнаву ялапар хъанахъиминнан бувчIин буллан аьркиншиву дакъар, цуксса гужсса ва нигьачIаву дусса ярагъну хъанахъиссарив экстремистшиву цаппара гужирдал кIунттихь. Аьрасатнал душмантурал экст­ремистшиврул карта дузрайн ду­ккан дуллай байбивхьуссар 90-ку шиннардийра, Ккавкказуллал регион билаятрая личIи бансса умудрай. ТалихIиннаран, цинявн­нал хIарачатрайну жущава бювхъунни тайннал планну лиян дан, СКФО-рал субъектирдай террорчитурал тамансса кюртти бухлаган бан. Амма мунийну паракьат хьун къабучIиссар. Билаятрал кьиблалий тагьар оьлукъин даврил планну уттигу уттаранна дур цаппара чил билаятирттал къулагъасшиврул центрдаву. ХIакьинусса кьини ми масъаларттаха зий бур щаллусса элмийсса институтру. ЧIалай бур экстремистшиврул организациярду чялишну зий бушиву, цалва гужру, цIакь уттава буккан бансса хIарачатру кьабитансса пикри бакъашиву. Мунияту миннайн къарши буккаврил масъала билаятрайгу, БакIссавнил Ккавкказнавугу агьамссаннун ккаллинува личIлай бур».
СКФО-райсса вакилнал бувсунни форумрай буллантIисса ихтилатирттаву паччахIлугърал органнал, жяматирттал, динчитурал СМИ-рдал давурттал координациялух къулагъас дикIан аьркиншиврия. Ганал умуд бивхьунни форумрай хьусса хIукмурдая хъунмасса кумаг хьунтIишиврий БакIссавнил Ккав­кказнаву жяматийсса ва политикийсса цашиву цIакь шаврин.
ДР-лул БакIчинал цIанияту форумрай гьуртту хьуминнахь аьла-ссалам бунни ДР-лул ХIукуматрал Председатель Аьбдуссамад ХIа­мидовлул. Ганал бувсунни ва форумрал мяъна Дагъусттаннан хъинну агьамсса душиву, махъсса шинал Дагъусттаннай террорчишиврул преступленияртту чан хьуну душиву.
— Билаятрал каялувчитурал кумаграйну, гужирдал структурарду гужлан буллалаврийну, бювхъунни тамансса диверсиярттал ва террорчишиврул подполье бухлаган буван, цаппара кьюлтI хьуминнал бакIчитал бат буван ва миннуйну чан хьуссар терактру, тахсир бакъа ливтIуми. БучIир учин ми иширттан хасну хъин чулийсса дахханашивуртту хъанай дур куну, — увкунни Аь. ХIамидовлул.
Республикалул премьер-ми­нистрнал, мукунма, бувсунни кьамул дурну душиву «Информационное противодействие идеологии экст­ремизма и терроризма в РД на 2014-2016 годы» тIисса паччахIлугърал программа.
Республикалул ХIукуматрал Председательнал бувсунни Да­гъусттаннай ми масъаларттан хасну дуллалисса давурттаяту гьартану, мукунма захIматнийн багьсса масъаларттаятугу. Сергей Ченчик­лул гьартану бувсунни СКФО-рай махъсса 10 шинай хьусса тагьардания ва тагьар хъин чулиннай да­ххана даншиврул дуллан аьркинсса давурттая.
Форумрай ихтилат бунни ДР-лул Диндалул иширттал, диннал организациярдащалсса дахIавурттал комитетрал председатель Сулайман МахIаммадовлул, Муфтийнал хъиривчу Давуд Тумалаевлул, ДР-лул дуккаврил, элмулул ва жагьилтурал политикалул министрнал хъиривчу Заур Кьурбановлул, Дагъусттаннал аграрий университетрал ректор Зайдин Жанбулатовлул.
Форумрай хъунмур ихтилат бунни Комиссиялул председатель, ХIукуматрал вице-премьер Рамазан ЖахIпаровлул. Ванал бувсунни цува бакIчисса комиссиялул дурсса давурттая.
Форумрал хIасиллу дунни Аьбдуссамад ХIамидовлул.
Яла форумрал хIакъиравусса цалвами пикрирду бувсунни Сергей Меликовлул.
ХIадур бувссар ХI. Аьдиловлул