Вай гьантрай ДР-лул Миллатирттал политикалул министерствалуву ларгунни гужирай цалла минардая бизан бувсса халкьуннал масъаларттал хIакъиравусса заседание. Заседаниялий гьуртту хьунни ДР-лул БакIчинал советник Деньга Халидов, ДР-лул миллатирттал политикалул министр Алексей ХIасанов, мунал хъиривчутал БахIанд МахIаммадов ва Роберт Аьлиев, ДР-лул юстициялул министрнал хъиривчу Гулайбат Ибрагьимова, жяматийсса организациярдал, элмийсса экспертътурал ккурандалул вакилтал. Шикку ихтилат бунни ДР-лул миллатирттал политикалул министрнал цалчинма хъиривчу Зикрулла Илиясовлул. Цалва ихтилатраву ванал кIицI лавгунни мугьлат бакъа щаллу бан багьлагьисса масъалар­тту. — Агьали цалла минардая бизан баврил масъалалух хIакьину хъуннасса къулагъас дуллай бур жяматийсса организациярду ва республикалия бизан бувминнал вакилтал. Тай репрессиярттал хIасиллу цукунсса хьуссарив жунна кIулли. ЦIанасса чIумал Дагъусттаннай бур 60 азарунния ливчусса инсантал республикалул 186 шярава ли­хъан бувну бивкIсса. Агьали цалла минардая бизан баврил чIявусса баларду бувцуссар минналгу, миннал аьрщарайн бизан бувминналгу бакIрачIан. Аьдат бакъасса шартIирдай, чIявусса къари-къужа, мюрщи оьрчIру ливтIуссар, бизан бувсса агьалинал шанма бутIул ца бутIа бухлавгссар. Дагъусттаннал Халкьуннал Мажлисрал ПаччахIлугърал Думалул хьхьичIун ларсун диркIссар гужирай бизан бувсса халкьуннал хIакъиравусса федерал закондалул проект, амма му кьамул къадурссар. ЦIунилгу ва масъала гьаз хьунни бизан бувну бивкIми паччахIлугърал властьрал органнахь му федерал даражалий ххал бигьияра тIий тавакъю буллай буну. ХIакьину жунма аьркинну бур ва масъалалулшиврий респуб­ликалул бакIчитурайн буккан. Цукунсса, ци маслихIат банссарив ххуйну пикри бан аьркинни, ахир хайрданийн дукканшиврул. ХьхьичIва-хьхьичI, му масъалалул хIакъиравусса цинявппа документру ххуйну ххал бан аьркинни, ишла дан аьркинни ва аралул пишакартурал кIулшивуртту. Уттинин ва масъала элмулул ххуттаву ххалбивгьусса кIанттурду хьуну бакъар. Мунияту масъалалул хIакъираву зузиминнан цалла даву документру ххалбигьаврия дайдишин аьркинни, — увкунни Зикрулла Илиясовлул. Деньга Халидовлул бувсунни ва батIаврил сиптачи республикалул БакIчи Рамазан АьбдуллатIипов хьушиву, ванал маслихIат бувшиву жяматрал ва бизан бувминнал вакилтал бавтIун, республикалул кьатIув гьан бувминналгу, миннал аьрщарайн бизан бувминналгу ихтиярду ва мурадру ссуссукьу къахьунсса, миллатирттал дянив питна къахьунсса хIукму бан. Масъала ххалбигьавриву чялишну гьуртту хьунни Лакрал миллатрал советрал вакил Камалуттин Будайчиев, «Толеранс» тIисса жяматийсса организациялул председатель Абсалуттин Мирзаев ва м.ц. КIицI лавгсса масъалалул хIакъиравусса ихтилатру къуртал хьуну махъ, хIукму бунни жяматрал, экспертътурал ва аьлимтурал ккурандалул вакилтурая ва масъалалул хIакъираву ца пикрилийн бучIансса группа салкьи бан.