Аьрасатнал Федерациялул цIаний бивхьусса захIматрахлу, билаятрал социал-экономикалул оьрму хьхьичIунмай бавриву, гуманитар аралуву ватандалул цIаний бувсса хIарачатрахлу Дусшиврул Орден дулун ккаккан дурну дур директор, ДР-лул «Республиканская школа искусств М. Къажлаева для особо одаренных детей» ялун ххисса кIулшивуртту дулайсса бюджетрал хIукуматрал идаралул художествалул каялувчи Къажлаев Мурад МахIаммадовичлун.
Аьрасатнал Федерациялул Президент В. Путин
Москва, Кремль, 23 июнь 2014 шин №447
Ва бюхттулсса наградалущал щалва жулва миллатрал чулуха барчагу уллай, жула пагьму-гьунар бушиврул цIа дунияллийх ларгсса Мурад МахIаммадовичлун чIа учин ччай буру цIуллу-цIакьсса оьрму ва каши-кьудрат. Бюхълай личIаннав, творчествалул оьрмулуву тIайлабацIу баннав!
Цаппара нюжмардал хьхьичI жул кказитрай, цува композитор Ширвани Чаллаевгу гьурттусса, Республикалул Гимнрал хIакъиравусса, цайми изданиярттал журналистъталгу гьурттусса, батIаву хьуссия. ХIукуматрал даражалий ттигу ца бази къахьурчагу, интернет сообществалуву ва масъалалул хIакъираву халкь кIи-шан бивщуну, чIявусса гьалаксса ихтилатру най бур. Вай хавардал гьуз учин бувсса журналистуралгу цIухлай, уттимур гимнрал макьан язи дугьлансса конкурсраву гьуртту хьуннав ягу къахьуннав тIисса суаллая бизар хьусса жулва миллатрал цама бюхттулсса композитор Мурад МахIаммадович Къажлаев, вай цIухху-бусурдал ахир дуллай, уттигъанну бувксса «Дагестанская правда» кказитрай чичлай ур:
— Ххирасса ттул ватанлувтал! ЛичIи-личIисса кказит-журналлая Дагъусттаннал гимнрал хIакъираву телефондалийн оьвтIий ва миннащал гъалгъа тIутIаврия увххун, ва иширал хIакъираву ца бази буллай, чичлай ура «Дагестанская правда» кказитрайн.
Ттул хIурмат бусса уртакь Ш. Чаллаевлул чирчусса гимнрая цичIав учин къахьунссар, цанчирча ттун му къабавну тIий. Хъунмур чIумал гимнру щаллу дувай сессиярттай ва шадлугърал батIавурттай. На тIурча 1989 шиная шихунай ивкIра Москавлив ялапар хъанай, сайки 20 шинай СССР-данул Гостелерадиолул Хъуннасса концертрал оркестрданул каялувшинна дуллай. Дагъусттан Республикалул Гимн баянгу ттун къабюхъайссия тийх.
Мяйжаннугу, Дагъусттаннай 1994 шинал Гимн кьамул дуллалисса конкурсравух нагу, Расул ХIамзатовгу, Николай Доризогу гьуртту хьуссияв. 1994 шинал октябрь-декабрь зурдардий республикалий най дия Н. Дагировлул, М. Къажлаевлул, Ш. Чаллаевлул, М. ХIусайновлул чирчусса мукьра гимнрал мадара гьарта-гьарзасса «всенародное обсуждение».
1994 шинал октябрь-декабрь зурдардил ппурттувусса «Дагестанская правда» кказитрал подшивкарду гьаз дурну кIул хьун бюхъантIиссар гимнрал макьаннах вичIидирхьуминнал чивчумунищал ва кказитрай бишлай бивкIсса нотардащал.
Дагъусттаннал Верховный СоветрачIа та чIумал сакин бувсса комиссиялул республикалул символикалул хIакъираву ца чулийн бувккукун, Гимнрал кьадаргу бакIуйн бувккуна. Ттун кIулссаксса, га комиссиялуву къабивкIссар культуралул деятельтал.
Цаппара хIаллава жун кIул хьуна комиссиялул Ш. Чаллаевлул чирчусса Гимн кьамул дуршиву ва гания гихунмай мунил хIакъираву на хавар бакъа уссияв.
Жу таний Расул ХIамзатовлущал пикри бувссияв жулла «Клятва» тIисса сочинениялийн «Гимн моему Дагестану» тIисса цIа дизан. Ва цIанилу му произведение дунияллул каталогравунгу багьссар.
Вай ялув чивчумунил хIакъираву жаваблувну утти баян буллай ура: «ЦIусса Гимн чичавривух на цукунчIавсса гьурттушинна дан тIий акъара. Акъар хIакьину ттущал ттул ххирасса соавторгу ва Гимнругу кIил-кIилла къачичайссар. ЦIусса Гимн кьамул дуллалисса комиссиялувухгу гьурттушинна дуллай акъара. Ва чулийнмайсса ттул поезд лавгссар! На учин ччимур увкуссар.
Ца ялагу, 83 шин хьусса хIакьинусса ттул оьрмулуву утти так цайми масъалартту бур.
Хъинну бикIияра!
Ттула циняв ватанлувтуран дуцири хъиншивуртту
чIа тIисса зул
Мурад Къажлаев,
композитор, СССР-данул халкьуннал артист
ХIадур бувссар
З. АьбдурахIмановал
