МахIачкъалаллал Кировуллал райондалий, Новостройрайн бияннинсса мизитрал махъ, цIусса, 3 зивулийсса базар буллай бур. Микку дахлантIиссар, хъунмурчIин, шяраваллил хозяйствалул бакIлахъия.
Вай гьантрай ДР-лул ХIукуматрал Председательнал хъиривчу Шарип Шарипов ивунни МахIачкъалаллал Кировуллал райондалийсса«Универсервис» ООО-лийн, тикку ганал ххал бунни га компаниялул буллалисса объектру, миннувасса ца хъанай бур цIана буллалисса дуки-хIачIиялул базаргу.
ХIасан Аьдилов
Шарип Шариповлущал архIал бивзунни ДР-лул шяраваллил хозяйствалул ва бакIлахъиялул министрнал хъиривчу Шамил Аьлиев, ДР-лул машлул, кьатIаллищалсса дахIавурттал ва ишбажаранчишиврул министрнал хъиривчу Арсен МахIмудов, ДР-лул БакIчинал ва ХIукуматрал администрациялул АПК-рал отделданул хъунама Шамил Жамалов, ДР-лул Экономикалул министерствалул управлениялул хъунама Шагьимардан Мудуев, МахIачкъалаллал Кировуллал райондалул бакIчи СалихI Сагидов ва цаймигу.
ОьмарасхIаб Аьлиевлул хъамаллуран ккаккан бунни цIуну буллалисса базар, бувсунни мунил хIалкьазиярттугу. Ганал мукъурттийн бувну, шяраваллил хозяйствалул бакIлахъиялул базар бикIан тIий бур 12 азарда квадрат метралуяргу хъунмасса, зий байбишин тIий бур ялун нанимур шинал июнь-июль зурдардий.
Республикалул СМИ-рдал журналистътурал суаллахьхьун жавабру дуллай, вице-премьер Шарип Шариповлул бувсунни базар буллай бушиву «Эффективный АПК» тIисса ДР-лул БакIчинал приоритетсса проектрайн бувну, тикку агьаммур кIану бугьлантIишиву агропродовольствиялул базаллул логистикалул.
Ганал мукъурттийн бувну, хIакьинусса кьини МахIачкъала ччясса мутталий хъун хъанай бур, шагьрулуву тIурча бувагу ца базар бур, мунияту цIусса базар бан багьлай бур, хъузалтран бакIлахъия машай дуккан дуллан аьркиншивугу хIисавравун лавсун. ЦIанасса ппурттуву республикалул хъузалтран захIмат хъанай бур цалла ласласисса бакIлахъия машай дуккан дуллан.
«ЦIусса базар шагьрулул кьатIув бавриву ххуйшивугу дуссар. Цалчин, чIарахсса микрорайоннал инсантуран, «Новостройрал» шяраваллал жяматирттангу, къулайну бикIанссар, тиччава-тиккун бувкIун, цанна дуки-хIачIия ласун. КIилчин, тиккусса бакIлахъия кьюркьуну дахлантIиссар цайми базардавунияр. Мунияту жу хIакьину шиккун бувкIун буру ва базар баврил давуртту анавар дуккан дансса ххуллурду лякъин. Инвесторнал цалвагу мурад бур базар анаварну бувну чулийн буккан бансса», — увкунни Шарип Шариповлул.
СалихI Сагидовлул мукъурттийн бувну, шагьрулул цIусса бакIчи МахIаммад Сулайманов зун айивхьуну махъ, ганал гара кьини гьаз бувну бур базардал хIакъиравусса масъала, яни базарду шагьрулул кьатIув буккан баврил масъала. Ва куццуй хъунмасса базар баврил щаллу буллалиссар тамансса зузи кIанттурду ва инсантурал аьркиншин бартдигьаву ххуй дуллалиссар.
«ХIакьину жулва агьаммур масъала – ларсъсса бакIлахъия машай дуккан давур. МахIачкъала хъунмасса, сайки миллион инсантурал бусса шагьрур, амма базаллуву машачитурансса кIанттурду биялну бакъар. Шагьрулул хъунмур базар машачитурал бувцIуну бур, цамургу базар барча, конкуренция хьуну, хъуслил багьри кьюкьинтIиссар», — увкунни вице-премьернал.
Инвесторнащалсса даву анавар дуккан даншиврул, Шарип Шариповлул сипта дунни зузи группа сакин бан циняв мурадлувсса министерстварттал ва ведомстварттал, мукунма МахIачкъала шагьрулул вакилталгу хIала-гьуртту бувну.
