Дагъусттаннал БакIчи Рамазан АьбдуллатIипов Москавлив къуллугърал аьрххилий лавгун уна хьунаавкьунни АьФ-лул Президент Владимир Путиннущал, мукунна ганал хьунни цаппара хъинну агьамсса хьунабакьавуртту.
ХIасан Аьдилов
В.В. Путиннущалсса хьунабакьаврий ххалбивгьусса масъаларттал хIакъираву республикалул каялувчинал бувсунни СМИ-рдал вакилтурахь. В.В. Путиннущал хьунаавкьуну Рамазан АьбдуллатIиповлул бувсунни региондалийсса социал экономикалул тагьардания.
«Экономика лядуккан даврин хасъсса лагрурду хIисавравун ласурча, жучIара думургу хIисавравун ласурча, республика уттигу тамансса хIаллай личIанссар махъва-махъми кIанттурдай, цанчирча къахьунссар гьарзад тIайла дацIан дан кутIасса мутталий. КIицI бан аьркинни укунсса затгу, Совет Союз пасат хьуну махъ муниципал сакиншиннал 100% биттур бувссар налогру датIаврил бурж, муниннин тачIав миксса къадатIайссия. Му хъанахъиссар федерал органналгу, республикалул органналгу, муниципал органналгу цачIусса хIарачат», — увкунни Р. АьбдуллатIиповлул.
Дагъусттаннал БакIчинал мукунма бувсунни хьунабакьаврий ххалбивгьуну бушиву билаятрай Президентнал ХIукмурду ишакаш баврил хIакъиравусса масъалагу. Р. АьбдуллатIиповлул увкусса куццуй, даххана хъанай дур халкьуннал культура ва аькьлу-кIулши, хIакьину цамур куццуйсса тагьар хьуну дур – агьали дузалшиннарал иширттайн кIункIу хьуну бур, террорчитурацIун ва экстремистътурацIун кабакьлакьисса лап чансса бакъасса ливчIун бакъар.
Дагъусттаннал БакIчинал бувсунни хьунабакьаврий ххалбивгьусса цаппара масъаларттал хIакъираву тапшур бавуртту дурну душиву Федерал ХIукуматрайн ва Президентнал Администрациялийн.
Хъиривмур масъала бия агропромышленностьрал комплексралсса. Мунил хIакъиравугу АьФ-лул ХIукуматрал Председательнал хъиривчунайн, АьФ-лул шяраваллил хозяйствалул министрнайн, «Росагролизинг» ОАО-райн тапшур бувну бур Дагъусттаннан кумаг бан.
Президентнащалсса хьунабакьаврий гьаз бунни хьхьирил портрал хIакъиравусса масъалагу. Ялун нанисса чIумуву чан-чанну тIий акционертурахьхьун булун, реконструкциягу дурну, хьхьирил портрай ца оператор дузал ансса пикрилийн бувкIун бур. Мукун къабарча портраха зузисса личIи-личIисса структурарттал битлай бакъар портрал къажанжу дуллан.
Тиккува гьаз бувну бур мукунма республикалул энергетикалул системалул заллу цама аврил масъалагу. Республикалул БакIчинал пикрилий, аьркинну бур «Дагэнергосбыт» ва «Дагэнергосеть» цачIун бувну «Дагэнерго» буван.
Ххалбивгьуну бур мукунма Дарбантуллан 2000 шин шаврил шадлугъру даврил масъалагу.
Хьунабакьаврий ххалбивгьуну бур промышленность лядуккан даврил масъалагу. Р. АьбдуллатIипов хьунаавкьуну ур Аьрасатнал промышленностьрал ва машлул министр Денис Мантуровлущал, тикку ххал дурну дур 7 проект. Икьрал хьуну дур республикалий дуван хасъсса совещание региондалул промышленностьрал потенциал лябуккан баврил хIакъираву.
Республикалул БакIчинал В.В. Путиннухь бувсун бур Каспийскаллал пюрунтирттал завод зий байбивхьуну бушиву.
Хьунабакьаврий ххалбивгьуну бур цайми масъаларттугу.
