ХIурмат бусса ПатIимат Рамазановай! Вин хъунмасса барчаллагь тIий ура на, цила чIумал ттущара дан къархьусса даву дурну тIий. КIундиннал шяравасса балайчи Бадира ХIажиеваяту ххуйсса макьала чирчуну дия ина.
На Бадирая чичланна тIисса чIумал жула лакрал балайчитал чув, цумур шяраву бурив ххал буллай ялтту уклай уссияв. Га чIумал на ивра КIундиннал шяравун, балай учаврил гьунар цуманал бурив ххал буллай. Гьарцаннал га чIумал увкуна ттухь: «Жул шяраву балайчи буссар Бадира ХIажиева. МуничIан бучIайсса балайчи цамур ба­къассар», — куну. Му шаппа къалявкъуна. Му бия га чIумал колхозрал оьллу ттизлай душваращал архIал. Ттун багьуна колхозрал фермалийн гьан. КIиккугу ттун багьуна оьллу ттивзуну, накIлил хIисав даннин ялугьлан, яла на кIива-шанма суалгу буллуну, магнитофондалийн ласав Бадирал чIу. Цила чIумал хъанайсса даву диркIссания хъинну хьун­ссия. ТтучIа репортернал ишла байсса магнитофон буссия. На, гуж-къиялий мугу зузи бувну, ца балай чивчуссия. ТтучIа бур му балай чивчуну:

Муштари аьркинссар
Муси ласунгу,
Инсаншив аьркинссар
Кьадру бувангу.

На вин муштарира,
Укку тти машай,
Мусил симан дусса
Садапрал сурат.

Эшкьи дуварчагу,
Вищал дуванна,
Оьнин дуккарчагу
Оьри къачинна.

Ччаву дуварчагу,
Так вищал данна.
Чара бакъанугу,
Чин къаитанна.

Машай буккарчагу,
Вищал букканна,
Машан ласурчагу,
Муси ласунна.

Ци ласав чирчагу,
Мусири чинна,
Мусиват ливкнугу
Кьакъаитанна.

Цал дучIай, цал лагай,
Гьар шинах ххуй инт,
ТIутIайх бичай мурхьру,
ДакIру ххари шай.

Яру бур ялугьлай
Вил чулухунмай,
Вил тяхъасса мурччал
Ттухьва пиш чиннин.

Ттуща га чIумал цIан лакьиннин ва балай бакъа чичин къабювхъуна магнитофондалий. Душварангу хьхьурайсса накI ттизин аьркинну дия.
Гания махъ на чIун хьувкун КIундив занай, ттуща Бадира лякъин къавхьуна, щар хьуну Таджикисттаннайн лавгун бия. На Дянивмур Азиянавун нанисса туристурал поездрай Таджикисттаннайнгу ивра. Амма ттун хьунакъабавкьуна тийхгу Бадира, цIадурксса балайчи. Хъунмасса барчаллагь тIий ура кIундири душнихь Зулайхатлухь, редакциялийн оьвкуну Бадираяту чича куну ПатIиматлухь миннат бувну тIий. КIундиннал шярава ца 80 хозяйство ларгун дур таний Таджикисттаннавун. На Таджикисттаннайн лавгра турист поездрай. Жу бивру ти­ккун дяхтта. Бувгьуну такси, «На базар!» учав. Ттун хIисав хьунни цава-ца кIичIиравух шамилчин нанисса. Лакку мазрай учав на: «Жува хъяврин буллай буру шофернал». Гава цIана бацIан бувну машина: «Ай, аман, зу лак бивкIун бурув. Багъишла ара на зува хъяврин баврил», — увкунни. Шофер лявкъунни кIундиричу. Ма тIий арцугу къаларсун, кка­ккан бунни базар бусса кIану. На учин ччай ура, шамийла цава ца кучалийх лавгру, амма, ма арцу тIий, ласун ан къавхьуна арцу.
Укунссагу бур лак.
Халил Халилов