Майрал 31-нний Дагъусттаннал БакIчи Рамазан АьбдуллатIиповлул «Труд» стадиондалий тIиртIунни Республикалул фестиваль «Готов к труду и обороне».

ХIасан Аьдилов
Шадлугърал тагьардануву фестиваль тIитIавривух ва яла ГТО-рал нормативру дулаврил иширттавух гьуртту хьунни ДР-лул Халкьуннал Мажлисрал Председатель Хизри Шихсаидов, ДР-лул ХIукуматрал Председатель Аьбдуссамад ХIамидов ва цаймигу.
Фестивальданий гьуртту хьунни 38 команда (цинявппа 320 инсан) тикку бия ДР-лул БакIчинал ва ХIукуматрал Администрациялул, республикалул исполнительный властьрал ва районнал вакилтал.
Фестиваль тIитIлай, Рамазан Аьбду­л­­­латIиповлул бувсунни дагъусттанлувтал муданма ххаллилсса спортсментал бивкIшиву.
«Жува муданма машхул хъанай бивкIссару физкультуралухун ва спортрахун, цанчирча цамур куццуй къашайссар зунттаву яхьун, цалла Ватан дуруччин, оьрмулун аьркинсса къажанжу дуллан. Мунийн бувну цIакьсса цIуллушиву – му Дагъусттаннал халкьуннал тарихрал лишанни. ЦIанасса тагьардануву ГТО цIудуккан даву дархIуну дур хъуннамур спорт Аьрасатнавун зана шаврицIун буниялану: Аьра­сатнал Олимпиада даврияр ххишала, тикку ххувшавуртту ларсъссар. Жулва билаят ххув хьуссар Паралимпиадалул тIуркIурдавугу. Ва щалва жяматрайнсса оьвчавур спортрахун машхул хьияра тIисса. Ахирдангу олимпий чемпионтал, Аьрасатнал чемпионатрал, дунияллул, Европанал чемпионтал буккайссар циняв хIала-гьурттусса спортравату», — увкунни Рамазан АьбдуллатIиповлул.
Ххалбигьлагьисса масъалалул хIа­къираву ихтилатру бунни мукунма ДР-лул куклумур атлетикалул федерациялул президент Оьмар Муртузялиевлул, ДР-лул жагьилтурал физкультуралул ва спортрал комитетрал председатель ХIамзат ХIамзатовлул.
Шадлугърал тагьардануву ПаччахI­лугърал Гимнрал чIунихун ттугъ гьаз бунни олимпий чемпион ХIайдарбаг ХIайдарбаговлул.
Муния махъ фестивальданий гьуртту хъанахъими байбивхьунни ГТО-рал нормативру дуллан. Бяст-ччал най бия оьрмулул категория хIисавравун ларсун – 200 метралул манзилданий лечин, усса кIаная лахъишиврий тIанкI учин, отжимание дан, пневматикалул ттупанграва битан ва цаймигу журардал бяст-ччаллу.
Ми циняв бяст-ччаллавух гьуртту хьуну, норматив ххювалунну дуллусса Рамазан АьбдуллатIиповлунгу, Хизри Шихсаидовлунгу, Аьбдуссамад ХIамидовлунгу дуллунни «Готов к труду и обороне» тIисса мусил лишанну ва ГТО дулаврил хIакъиравусса грамотартту.