ЦIуссалакрал райондалул больницалул цIа дур къашайшалтрах ларайсса аякьа дусса бушиврийсса. Мукун агьамсса, къашайшалт рязий бансса куццуй хIакинтурал коллективрал ялув бавцIуну зий бур шикку ва азарханалул хъундухтур Султанова Людмила.
Имара Саидова
Шиккун багьсса циняв къашайшалт, ца зумату кунма, буслан бикIай хъундухтур Султанова Людмилал хIарачатрайну цивппа азарханалий цалва ичIува кунма бикIару тIий. Мяйжаннугу шиккусса, унгу-унгусса хIакинтурал иминсса ихтилатрал, буругаврил къашайшала сайки хъин уллай ур. Му бакъассагу, ва азарханалий ччя-ччяни, хIакинтурал пишакаршиву аьч даву, ларай даву мурадрай, тамансса конкурсру, мюнпатрансса давурттив дай. Ва ххуллухгу ЦIуссалакрал райондалул больницалий хьунни «Лучшая медсестра 2014 года» , «Лучшая медсестра-акушерка 2014 года» тIисса конкурсру. Шикку гьуртту хьунни райондалул больницалий ва ФАП-рай зузисса 20-хъул медсестрахъул. Вайннал конкурсраву ккаккан дурсса усттаршиврун кьимат бишлашисса жюрилул хъунмур бия ЦIуссалакрал райондалул больницалул хъундухтур Людмила Султанова ва азарханалул отделениярдал хъуними. Конкурс сакин хьуну бия 5 шачIанттуя: хIакиннал пишалул даража ххалбигьаву мурадрай сакин бувсса билетирттая, кIул бакъасса суал булаву, анаварну жуав дулун аьркинсса суал булаву, «дарваграву думур» кIул даву, ичIува ишла бан аьркинсса маслихIатру.
Медсестрахъул шикку цил багьайкунсса экзамен дуллалини кунма билетругу лавсун, миннун жавабру дуллай бия. Конкурсраву гьуртту хьуминнан ляличIину ххуй бивзунни «дарваграву думур» кIул даву ва «ичIува ишла бансса маслихIатру» бусласими журарду. ХIасил шикку гьуртту хьусса цинявннал ккаккан бунни цалва пиша цанма лавайсса даражалий кIулну бушиву. «Лучшая медсестра 2014 года» конкурсраву 1-мур кIану бувгьунни ва азарханалул хирургический отделениялул медсестра З. Шахмиловал, 2-мур кIану бувгьунни терапевтический отделениялул медсестра Г. Мусаевал, 3-мур кIанугу бувгьунни реанимациялул отделениялул медсестра А. Аьбдуллаевал.
«Лучшая медсестра-акушерка 2014 года» тIисса конкурсраву 1-мур кIану бувгьунни хъаннил консультациялул медсестра-акушерка А. Темирсултановал, 2-мур кIану бувгьунни Чапаевкаллал шяраваллил ФАП-рал акушерка Н. Маммаевал, 3-мур кIану бувгьунни хъаннил консультациялул акушерка А. Агъасиевал. Мукунма шикку гьуртту хьуну ххув хьуминнан буллунни дипломру ва арцуйнусса бахшишру.
Ахирданий циняв гьурттучитурахь барчаллагь увкунни Людмила Султановал.
