Шанна никирал ватанну хьусса Новостройрай агьалинал оьрмулул маэшат гьаз бансса ххуллу-чараннах луглай бур райондалул хъуними. Апрельданий «Алмар-Кас­пиан» тIисса туркнал предприятиялущал чирчуссар кьутIи Новостройрай дикIул комбинат буллансса. Му комбинатрал 700 инсаннан­сса зузи кIантту хьун бантIиссар, 2015 шиналнин бувну къуртал бан­сса ният дуссар. «Алмар-Каспиан» фирмалул уттинингу дурссар ва дуллайнма буссар райондалул агьалинан хайр-мюнпатрансса даву: муххал конструкциярдал завод буллай буссар Новостройрай, Туркнава оборудованиегу дучIан дурну продукция итадакьлай байбивхьуну буссар. Гьай-гьай, жу Новостройрай чун биярчагу, хъунмур буруккин бикIай агьалинал давурттив дакъашиврул ялувсса. Аьйгу дакъар. Цал буттал аьрщи кьаритан багьсса, яла цала захIматрай дацIан дурсса гьарта-гьарзасса къатри кьаритан багьсса, цIунилгу мина даххана дуллан кьисматну лявкъусса агьалинан, чIярусса захIматшивурттал ялун даву дакъашиву – оьнкьарахсса къурхъ дур. Мунияту 700 инсаннан даву дулунтIисса дикIул комбинат – жяматран хъуннасса ххаришивур. Му завод буллангу кIанттул агьалигу кIункIу буллан тIий бунавхьур. Майрал 7-нний тIурчарив ЦIуссалакрал райондалул бакIчи ХIажи Айдиев хьунаавкьунни израилнал инвестортуращал. Микку гьуртту хьунни Халкьуннал Мажлисрал депутат Зайнуллагь Мирзоев, райондалул бакIчинал хъиривчу З. Жиржисова, райондалул Жяматийсса Советрал председатель М. Оьмаров ва дяъвилул Ветерантурал советрал председатель М. Шагьмилов. Израилнал хъамаллурал бувсунни цивппа ччянива зий бушиву Аьрасатнаву, хъунмур давугу здравоохранениялул ва агропромышленный комплексрал объектру буллалисса душиву, Новостройрай медициналул центр ягу реабилитациялул центр бувансса ниятрай бушиву. ХIажи Айдиевлул бувсунни хъамаллурахь цIусса миналий чIявусса медициналул зузалт даву дакъа личIансса нигь душиву, инвестортурал медициналул центр буварча, ми давурттал щаллу бан бюхъантIишиву. Израилнавасса инвестортал бивунни Новостройрайн, медициналул центр буван кунмасса кIану ххал буван. Цалла проектирдая бусан ми хьунабавкьуссар ДР-лул Минздраврал ва экономикалул министерствалул вакилтуращалгу. Райондалул хъуниминналгу, агьалиналгу вихшала дур кьатIаллил билаятирттаясса, цалла даву ххуйну кIулсса ва лажин кIялану дувайсса инвестортал кIункIу бувну, цIусса миналий хъинсса объектру хъанан­ссар тIисса. Хъиндайдихьу дунни туркнал фирмалул, израилналми инвестортуращалсса хьунабакьавугу хайр-мюнпатрансса кьутIи чичавричIан нанисса духьунссар, ва лахъи къаларгун даву щирикIинссар тIисса умуд бишинну.