На Батунная нанийни Гъумучатусса жула эмиссартурал ттухьхьун Истанбуллив оьрму бутлатисса МахIаммад Нажатий тIисса адаминал адрес дуллуссия. КIюрххил ивзун, на кIа адаминал хъирив лавгра. МухIаммад Нажатий МахIмуд-пашанал цIанийсса кIичIираву «Къирим-отель» тIисса гостиницалуву ия. МахIаммад Нажатий тамансса – 45 шинавусса, загълунсса чурххал адамина ия.

Ванал мина-гьану Гъумучатусса дия. Жагьилсса чIумал шиккун Истанбуллив увкIун, шиккура мина дирхьуну ивкIун ия. Амма Гъумучату щия ивкIссарив ттун дакIний къаливчIунни. Гузунхъая ягу Рашкъухъая ивкIсса хавар бия. Та чIумал ванал кулпат-затгу бакъая. На тиккусса Истанбулливсса чIумал ванал ца яру щарсса дурцуну, кулпат бувуна. Ва усса «Къирим-отель» 3 зивулийсса тIаннул къатри дия. Вайннул заллу цу ивкIссаривгу ттун къакIулли. Вай къатри МахIаммад Нажатийнал ижаралий дургьуну дия. Вайннул лувсса ца чIивисса къатлуву цува икIайва. Махъми къат­ригу цайминнахьхьун ижаралий буллуну бия. Нажатий цува кьянатну ялапар хъанахъисса, мискинсса инсан ия. МахIаммад Нажатийнал на, ца лаккучунал лаккучу кьамул айсса куна, ххуйну кьамул увнав. Жула лакрал ва цинявппа дагъус­ттаннал халкьуннал цачIусса аьдат дур цаннийна увкIсса хъамаличу, мачча-гъаншиврух къабурувгун, ненттабакI тIивтIуну кьамулгу увну, цаннийва уссаксса дукан дукрагу, гьантта икIан кIанттугу буллуну, я айсса. Нагу мукун кьамул увнав.
Ттуплислив уна Гъумучатусса АьлихIажинал арснал Шяпинал, Батуннайгу Гъумучатусса арцул усттар Айгунхъал Айгуннул на ненттабакI тIивтIуну кьамул увнав. Утти Истанбулливгу Гъумучатусса мугьажир МахIаммад Нажатийнал на ххуйну, ненттабакI тIивтIуну, кьамул увунав.
Ттул Батунная нанийни Истанбуллив дуклансса план дуссия, амма тикку, Истанбуллив, ттул ду­ккаврил зат захIмат хъанан бивкIуна. Ттун биялну турк маз кIулссия. ХьхьичIава, оьрчIний, Ашттарханнай дуклай ивкIун, на турк маз ххуйну лавхьхьуссия. На турк мазрай Бакуйннал кказитирттайн макьалардугума чичайссия. Амма ца маз кIулшиву ттун къагьая. Элмулул хIадуршингу дан аьркинну дия. Укунсса хIадуршиннив та чIумал ттучIа дакъассия.
КIива-шанма гьантлий МахIам­мад НажатийначIагу авцIуну, ттула дуккаврил затралсса бан туркнал мааьриф назирначIан* лавгра.
Та чIумал Мааьриф назирну Саэд-бей адамина ия. Мааьриф назирнал дуккаврил зат ца чулухун багьаннин, ца-кIива гьантлийсса ттун «Шишний» тIисса кIанттай общежития кунмасса къатлувун, утту ишин-изан, кIантту буллуну, тIайла увккунав. Цагу, Мааьриф назирнал на учительская семинариялул мудийрнайн*, на учительский семинариялувун уххаврил иширттах ургу куну, тапшур увнав. Та чIумал учительский семинария хьхьирил тий «Тахикуй» тIисса кIанттаву бия. Учительский семинариялул мудийрнугу та чIумал Сарват-бей тIисса, жагьилсса адамина ия.
Сарват-бейнал ттухгу, ттул янналухгу урувгун, на учительский семинариялувун ласун ччан къабивкIуна. Сарват-бейнал аьчухну увкуна: «Вил янна ххуйсса дакъари ва ми янналущал… кьамул ан къахьунссара», — куну. Мяйжаннугу, та чIумал ттул лахху-ликку ххуйсса дакъая, ттул чансса духIин дусса костюм Батунная, Истанбуллив нани ххуллий пароходраву дарцуна. Махъсса янна ххуйсса дакъая… БакIрай бивхьусса суникIурттул кьяпагу, ччаннай лархсса чакмардугу туркнал студентътурал лаххайсса куннасса дакъая… Банмур бакъая. Учительский семинариялул мудийрнан ччан къабивкIун, мааьрифрал* къуллугъчитуращагу ттун цичIав кумаг бан бюхълай бакъая.
Ттул цаппара гьантри хьуна ци банссарив къакIулну Шишнилийн ва Шишнилия Мааьриф назаратрайн занай. Мааьриф назаратрайн* Шишнилия дурус ца ссятрал ххуллу бия. Ва лахъисса ххуллу ттун чIявуну ахьтта битангу багьайва.
Шишнилия Мааьриф назаратрайн нанийни игьалаган щяикIансса скамейка затгу къа­бикIай­ва. Ухлан икIаварда.
Мааьриф назаратрайн гъанну ца хъунмасса «Гюл-хана» тIисса багъ бия.
Ца кьини га багъравун лавгун, Ккавкказнал чулийнай уруглай, ттунна вари чинсса аьркиншивугу дакъа дуна, ца тIайлашиву ччишиврул ххуллий ттула бакIрачIан бувкI-бувкIми дакIнийн бичлай, пик­рирдавун лавгун ца скамейкалий щяивкIра. Шикку ттун дакIнийн багьлан бивкIуна: нава Гъумучату Узун-хIажинал чапхунчитурал аьралунная ливхъун, Щурагьун нанисса ххуллий Бархъаллал ЩутIуй, къаралданий бувксса бархъаллал увгьуну ацIан увшиву. Бархъаллал Малла-МахIаммадлул кумаграйну, бархъаллал бахчу къабувну, укъавгьуну ивтшиву. ЦIахъардал Аьлихан-мащилул авадан арамтуннал цала хIухчалт гьан бувну, на ва ттущалсса гьалмахтал бугьан, жуйнма кьува-зувива ккулла бивтун, ци бунугу, ликъавтIуну ва щаву къархьуну, сагъну ливчIшиву, ва нава угьан гьан бувсса Аьлихан-мащилул халкьуннал цIухлагу бивхьуну, дуснакь увшиву. Ва ци бунугу ялагу итабавкьуну, Щурагьун лавгшиву.
Щурагьун нани ххуллий, Урмайннал бурхIай, имамнал (ХIуциннал Нажмуттиннул) аьралуннал бацIан бувну, жухьва цIухла бивхьушиву, на миннахь мувмур-тамур бувсун, ми хъяврин бувну, Щурагьун лавгшиву.
Щурагьун лавгсса чIумал Гьарун Саэдов жул хьхьичIун увкIун, жу «Париж» гостиницалуву паракьат бувшиву. Ва га чIумал инкьилабчитурал гуж биялсса бакъа, бяйкьу ххуллурдайх ливхъун, ХIурахъун, шиччагу Ахъушав, шичча ялагу Бархъарав бувккун, кьюлтIну Гъумукун учIаву. Миччагу хьхьунил лякьлуву кьюлтIну Ххутив ув­ккун, микку ттула хъамаллуранний кьюлтI хьуну ивкIшиву.
Бархъарату хьхьунил лякьлуву Гъумукун най унува Шушив, Адамлул итакъабавкьуну, цаннийва хIурматрай бацIан бувшиву.
Шахьував душмантуравун тIайла бавцIуну, цакуну ххуллу кьувкьуну, букъавгьуна битаву ва цайми-цайми чIявусса ккавксса ва бакIрачIан бувкIсса затру дакIнийн багьуна.
Микку «Гюл-хана» лакьирча тIий дакIнин багьуна. Амма ва захIмат-жапа ттунма ссан аьркинну бивкIссарив ттун къабувчIайва. Ттун вай лихъа-хъирившавурттал амругу къачIалай бия. Амма цичIав цанмасса мюнпат бакъа бунува, вай инсантал ци аьркинну ва ссал цIанийрив вакссава чялиш хъана­хъисса ттун ххуйну къабувчIайва.
Ттул хIисаврай, нава чIиви­ну унува, тIайлашиву ва тIайлаба­къашиврул пикри ттул оьттувух ва ттурчIавух хIала хьуну бия. Ттун гьарца зат тIайлану бикIаву ччан бикIайва ва тIайла дакъашиву ттун душман хьуну дия.
Дагъусттаннай ттула бакIрачIан дуркIсса къача-къучшивурттал иширттаву Бархъаллал Малла-МахIаммадлул ттун хъунмасса кумаг бувна. Ва ххуйсса, хъамал ххирасса адамина ия. Жу ва Малла МахIаммадуйхчIин Узун-ХIажи ва ХIуцциннал Нажмуттин оькки уллалисса чагъарду Ахъушиял АьлихIажийначIангу гьан бувссия. Ттуяр цаппара гьантрал хьхьичI вава Бархъаллал МахIаммадхъанний, Узун-ХIажинал чапхунчитураяту кьюлтI хьуну, Авданнахъал Саэдгу (Габиев) Шушиннал Адамгу архIал лабивкIун бивкIун бур. Махъ Габиев Саэд Малла-МахIаммадлуя хъинну рязийну, ганал бувсса кумагру буслай икIайва. Му чIумал ттун цаймигу чIявусса хьусса къума­сса ва ххарисса задру дакIнийн багьуна. Цагу ва чIумал нава Арчиял зунттавух хьуну, Гъулудав нанисса чIумал, нава ЧукIуннал ятти-къушлил ккаччал хIунку авай ливчIсса зат дакIнийн багьуна. Та чIумал Дулттияллил кьаннайх ппив хьуну чIявусса ятти-къушру бия. КIай ятти-къушлил ккаччив биллай буна, къушлия къушлийн тIайла уккаварда. Гьарца ятти-къушлил ккаччив ттул хьхьичIун бувккун, биллан бикIайва. Нагу миннуйн чарил бюкьру итабакьайссия. Ккаччив бюкьал хъирив багьну лагайва. На ахттакьун чIумал ца къушлийн ивунав. Ва къуш ЧукIуннал ятти-къуш бивкIун бия. На ятти-къушличIан най уссияв. Ятти-къуш лагьсса кIанттай бия. На гьаз хьуну, цакуну ятти-къушлил ккаччан ххал хьунав. Ятти-къушлил чIявусса оьсса ккаччив бия. Миннун на ххал хьуну, циняв ттуйн ххявххун бавчуна. Ттухьгу ххаржан дуссия, нагу дурккун ххаржангу, миннуя нава уручлан ивкIра. Ми ккаччал кьацIурдивун тамансса ххаржаннугу щун дурссия. Миннуй щавурду хьухьунссия. Ци-бунугу ятти-къушайн гъанну бия. Левчуну бувкIун хIухчалтрал на ххассал увнав. Ми­чча на хIухчалтрал цачIана увцуну, «Цура? Чунна?» — куну, цIувххуна. Миннахь ттула цIа АхIмад душиву ва ЧIарахъун нанишиву бувсъссия. Та чIумал «Курдий, Курдий» тIий, ттул цIа хъинну машгьурну дия. Нава кIул къахьун, миннахь ттулла цIа тIайлану бусан къархьуна. Ттун цIа АхIмадри куссия. Тания махъ ттул цIа АхIмад Карадий хьуссар. Та хьхьуну хIухчалтрал на цавай хъунисса ххунчIал хъамалугу увнав. Ца кIукIлусса къюллул шаний кIантту бувну, уттуишингу увнав.
Гьунттихавай кIюрххил, кIай­ннахь барчаллагьгу куну, Дул­ттийх хьуну ЧIарахъун увкра.
Цаппара хIаллай Ккавкказнал чулухун уруглай, пикрирду буллайгу ивкIун, ивзун лавай, ялагу Шишнилийн лавгра. Ца-кIира кьини на ци банссарив къакIулну, дуккаврил иш дузал къахъанай ливчIунав.
Ва аралуву навагу оьна къаи­вкIун, чан-кьанну бунугу ттула лахху-ликкулул зат дузал бувну студентътураха лавхьхьунав. Утти Сарватбейналгу манеъ къадурну, Саэд-бейнал ва ванал заместительнал, АхIмад СалахIуттиннул, кумаграйну на «Дарул-муаьлли­миндалувун» лавсунав. На «Дарул-муаьллиминдалувун»* уххан, ттун хъунмасса кумаг бувсса АхIмад СалахIуттин кIа шинал кIинттул Испанкалул* къашавай хьуну ивкIуна.
На дуклан увхсса «Дарул-муаьллимин» Бугъазрал тий Къазикуй тIисса кIанттай бия. Шиккун Истанбуллал «Аьли-Курдийлияту» пароходрай, ца ацIния ххюра-кьура минутIрал ххуллу бия. Шиккун пароход, ца-ца чIумал ХIайдар-пашалийн бивну, лагайва. Ца чIумалгу тIайланма ХIайдар-пашалийн къабивну лагайва. Бу­гъазрал кIиву ламуяту чIалачIисса Къазикуй хIисав дурукун, ттун жула Хъуннеххал кIиву чIалачIисса ХьурувкIуннал шяравалу кунна чIалан дикIайва. Амма Къазикуй ХьурувкIуннал шяравалу куннасса дакъая. Та хъинну ххуйсса, чIивисса курортрал шагьру бия. Шикку чIявусса заграницаллал халкь, хаснува паранг* ялапар хъанай бия. Шикку Къазикуйлий ца хъинну ххуйну французнал зумувну бакьин бувну бувсса французнал пляжгу бия. ХьхьичIава ва французнал школа бивкIун бия (француз мазрай дуклакисса).
1914 шинал французнащал, ингилиснащал ва оьруснащал дяъви буллан бивкIукун, туркнал Къазикуйлийсса французнал школа (колледж) зевххуну, шикку цала «Дарул-муаьллимин» бувну бивкIун бия.
1918 шинал, дяъвилуву турк бух хьувкун, французнал цала Кюлледж махъунмай зевххуна.
Туркгу цала хьхьичIавасса, Истанбулливсса «Дарул-муаьллимин­далийн» куч хьуна.
Ва куццуй утти, ци-бунугу ттул дуккаврил зад дузал хьуну, на игьалавгунав.
Мяйжаннугу, та аралуву ттул Истанбулливсса тагьар ххуйсса дакъая. Ттуща махъунай Ккавкказнавун гьангу бюхълай бакъая. Та чIумал жула циняв инкьилабчийтал душмантурая ххинил хьуну, тихун-шихун ливхъун бия. Контрреволюционерталгу, «чув цума ирияйвав» тIий, миннах луглай бия.
На дуккаврих гъира бусса ияв: Дарул-муаьллиминдалуву хьхьу-кьини къакуну, хIарачат бувну дук­лай, ттула диял дакъасса кIулшиву диял дан чялиш хъанай ивкIра.
«Дарул-муаьллиминдалуву» ххуйсса, цIувххумунихьхьун ххуйну бувчIинну жаваб дулайсса му­аьллимталгу* бия. На къакIулмур нач къадурну, миннахь цIуххайссия. Та чIумал «Дарул-муаьллиминдалул» директор Швециянаву дурккусса Сиррий тIисса, зирангсса, ххюцIалла шинавусса оьрмулул адамина ия, ваналгу Ибрагьим Камалуттин ва ИхIсан-бей тIисса заместительтал бия. Ибрагьим Камалуттиннул педагогикалул дарс дишайва. Чансса аьрччасса, чурххалгу чансса лагьсса адамина ия. ИхIсан-бек тIурча хъяйнасса, тяхъасса, дакI хъинсса, загълунсса, Аьрабусттаннаятусса адамина ия. Ваналгу дарс турк мазрай дишайва. ХьхьичIава шикку психологиялул ва педагогикалул дарсру СатIеъ-бей тIисса ца аьраб адаминал дишайсса диркIун дур.
Утти СатIеъ-бей махъунай Сувриянавун лавгун, шикку акъая. Ванан кIанай ИхIсан-бейнал ва цаймигу педагогтурал дарс дишайсса дия. СатIеъ-бейная цIа дия. Ванал, цагу, педагогикалул журнал буккан буллай ивкIун ия.
Истанбуллал «Дарул-муаьлли­миндалуву» цаймигу ххуйну зат кIулсса муаьллимтал бия. Бюхъай­ссаксса вайнналгу ттун зат лахьхьин бан кумаг байва.
Салим Саррий-бейнал ихтисас* физкультура дия. Ванал физкультуралия чивчусса тамансса луттирдугу бия. Салим Сиррий шикку, Истанбуллив, физкультура яла хъинну кIулсса инсаннан ккалли айва. Ванал директоршиврий «Тадрисат мажмуаьсий»* тIисса журналгу буклай бия.
1921 шинал ванал итабавкьусса журналданий дин къааьркинну ккаккан дурсса макьала ляркъуну, Салим Сиррий-бей кIа журналданул директоршивриятугу, Дарул-муаьллимин-мудийиршивриятугу укьан увна. Амма, ялагу цала ихтихасрай (пишалий) физкультуралул муаьллимну ливчIуна.
«Дарул-муаьллиминдалуву» дарс дихьлахьисса муаьллимтал ва ттущал архIал дуклакисса ттул гьалмахтал чIявуми паракьатсса, ссугру къадайсса, цала-цала дуккаврилсса буллалисса инсантал бия. Ва дуккаврил, лахьхьаврил ишираву вайннал ттунгу кумаг байва.
Дарул-муаьллиминдалул тамансса авадансса библиотекарттугу бия. Ттула оьннасса чIун на шиву гьан дайссия. Шиву чIявусса ранг-рангсса элмулул луттирду бия ва вайннуяту на тамансса мюнпат ласайссия.
«Дарул-муаьллиминдалул» чIарав концертрал залгу бия. ЧIявуну шивун музыкантътал бувкIун, музыка бищайва. Шаэртал бувкIун, цала чивчусса шеърирду буклан бикIайва ва оратортал бувкIун, цала пасихIшивуртту ккаккан дуллан бикIайва. Шикку чIявуну Орхан Сейфий, ЯхIъя Камал, Якьуб Кьадрий, Юсуп Зия кунмасса шаэртал ва ХIамдуллагь Оьбудий кунмасса туркнал машгьурсса оратортал гьуртту шайва. Шикку ца-ца чIумал АхIмад Журатбайналгу, цува Бакуйн лавгсса чIумал цанма Бакуй ккавкмур-бавмур буслай, ихтилат байва. Шикку ца-ца чIумал Мирза Фата-Аьли Ахундовлул чивчусса: «Мирза Халил-кимиякар» тIисса ва цайми комедиярттугу бишайва. Шикку, «Дарул-муаьллиминдалул» залдануву, тарбиялул, психологиялул докладругу байва.
Хуласа* тикку «Дарул-муаьлли­миндалуву» дуклакисса семинаристътал бялахъансса ва миннан зат лахьхьинсса чIярусса давуртту дайва.
КутIану учин, муаьллимтурал семинаристътуращал ва семинаристътурал муаьллимтуращалсса арарду оьккисса дакъая.
На Истанбуллив нанийни туркнал хIаписартурал дянив цаннащал цаннал хъинну вахIшийсса аралугъру ккарккун, ттун минная хъинну дакI дяркъуна.
На «Шам» тIисса пароходрай, кIилчинмур каюталуву уссияв. Ва каюталуву Батунная Истанбуллив нанисса цаппара туркнал хIаписарталгу ва миннавух ца немецнал хIаписаргу ия. Микку, ва немецнал хIаписарнаятугу нач къархьуну, туркнал хIаписартал бувччу хьуну, куннащал кув биллай ва куннал кув батлан, аьтIутIи буллан бикIайва. Ттун кIа немецнал хIаписарнаяту нач хъанан дикIайва. КIагу цичIав бакъасса куна: «Жан дуккича!» — тIисса куна, миннал биллалавривух хIала къашайва ягу букьан къабайва.
Вава пароходраву ттул царай ххуйсса яннагу дарцуну, янна дакъа личIан увнав.
Ца-ца чIумал Дарул-му­аьлли­миндалул жун, семинаристътуран, дуниял ккаккан ва зат ла­хьхьин бансса мурадрай, экскурсиялийнгу буцаварду.
Масала: ца ххуллухь жу Дарул-муаьллиминдалул муаьллимнал Гьарун Рашид-бейнал ца хъинну интереснайсса экскурсиялийн бувцунав. Гьарун Рашид-бей тIабиаьт-элмулул дарс дишайсса адамина ия. Жу мунал ца хъинну хьхьичIавасса заманная лирчIсса магъара (нух) ккаккан Истанбуллия ца кIира-шанна ссятрал манзилданийсса, поездрай лагайсса кIанттайн, бувцунав.
КIа нух Чагъарталлал чулух, туркнал сельско-хозяйственный институтрачIан гъансса кIанттай дия. Ахттая махъ поездрайн лавхъун, кIа институтраву гьанттагу бивкIун, гьунттихавай кIюрххил, кIа нух ххал дан лавгру. КIукунсса нух таниннин ттун къаккаркссия. Ттун кIа хъинну аьжаив дирзуна. Нух хъинну къумасса ва чIарасса, буххайсса-буккайсса кIанттурду бусса дия. Жу чирахъругу лавхъун, бухлай-буклай кIа ххал дуллан бивкIру. КIиву чIявусса ххячара-чIелмулт бия. Щарурду бия. КIай щарурдах бурувгун, кIа нухлил цимигу азарда шинал оьрму бушиву чIалай бия. КIа нуххувун бувхсса кIанттай ца зал кунмасса хъунмасса къатта бия. КIа къатлувура христианнал диндалул махъру ва цайми ишарартту дурсса чичрурдугу дия. Ттул хIисаврай, бухсса заманнай христианнал монахтал батIайсса диндалул къатта бухьунссия.
КIа нухличIа жулла суратругу рирщуну, ахттакьунмай зана бивкIун, махъунмай шаппай бувкIру.

Истанбуллал дарулфунун­далувун* уххаву

Ттула чанмур дузал дуллай, ва диял дакъамур диял дуллай, чансса хIал «Дарул-муаьллиминдалувугу» бувну, кIа шинал на Истанбуллал Дарулфунундалул (Университетрал) адабиятрал факультетравун увхра.
Истанбуллал университет, БаязедрачIан гъанну, царай оькки­сса шанна зивулийсса тIаннул къатраву бия. Вай къатри хьхьичIара цурив ца паччахI щарссанил къатри диркIун, Дарулфунундалун пишкаш дурссар учайва.
Истанбуллал Дарулфунундалул мукьва факультет бия хIисаб – элмурдал факультет*, хIукьукь – элмурдал факультет*, адабият -элмурдал факультет* ва финанс — элмурдал факультет.
ХIисаб – элмурдал факультет ХIайдар-пашалий бия. Махъми факультетру ва миннул шюъбарду (адабиятрал, гъалгъалул; тарихрал, географиялул шюъбарду (отделенияртту)* Истанбуллив бия.
Гъалгъалул шюъбалул мяйва бутIа (отдел) бия: ислам бутIа; ахлакьрал* бутIа; психологиялул бутIа; гъалгъалул ва метафизикалул бутIа; социологиялул бутIа; гъалгъалул тарихрал бутIа; мантIикь-элмулул* бутIа; тарбиялул бутIа ва тажрубий* психологиялул бутIа.

***
Истанбуллал Дарулфунун французнал Сорбонна университетрал пландалий бувссар учайва. Ва Дарулфунундалул ректор та чIумал Амин СабихI Оьмар-паша тIисса ия. Проректоргу Саэд-бей тIисса ия.
Адабият-факультетрал декан профессор МахIмуд-бей ва факультетрал оьмувми* секретарь, Багьжат-бей тIисса педагог ия.
Гъалгъа шюъбалул дарсру дишайва профессор Исмаэл ХIакъи-бейнал (Иэмирлийнал), фалсафа ва метафизикалул дарс дишайва профессор доктор Риза Тавфикь-бейнал. МантIикь-элмулул дарс дишайва профессор Наэм-бейнал, тарбия-элмулул дарс дишайва профессор Исмаэл ХIакъи-бейнал (Манастирлий). Ахлакьрал дарс дишайва муаьллим Эззат-бейнал, психологиялул дарс дишайва муаьллим Мустафа Шакир-бейнал. Гъалгъалул тарихрал дарс дишайва муаьллим Амин-бейнал. Социологиялул дарс дишайва муаьллим Нажмуттин Садыкь-бейнал ва тажрубий психологиялул дарс дишайва муаьллим Аьлий ХIайдар-бейнал.
Жула шикку – Совет Союзрай аьлимтурал элмурдал ряхва даражалул степенну бур: 1) элмурдал кандидат 2) доцент 3) элмурдал доктор 4) профессор 5) элмурдал Академиялул член-корреспондент, 6) академик.
Укунсса элмулул даражартту та чIумал Туркнаву бакъая. Тикку анжагъ кIива даража бия: профессор ва муаьллим. На Истанбулливсса чIумал жул гъалгъа-элмурдал факультетраву Риза Тавфикь-бейгу, Измирлий Исмаэл ХIакъи-бейгу, Манастирлий Исмаэл ХIакъи-Лейгу ва Наэм-бейгу профессортуран (мударристуран) ккалли байва. Махъми дарс дихьулт муаьллимтуран ккалли байва.

***
Истанбуллив, Университетравун увххун мукьах, ттул багьу-бизулул иш чансса ххуй хьуна.
Истанбуллив, хаснува Чаргаснал дурккуми, оьрус мазрай чивчусса Ккавкказуллал сочинениярттах хъинну мякьну бикIайва. Шикку тамансса чаргаснал дуркку арамталгу бия. На миннан Пушкиннул, Лермонтовлул Ккавкказнаву чивчусса жужру, луттирду турк мазрайн таржума бувссия ва вайннух ттун тамансса гонорар дуллуна.
Ттул Истанбуллив ялапар шаврил иширайн вай гонорардал тамансса кумаг бувна. Вай бакъассагу, Истанбуллив, кказитирттай чан-кьанну бунугу статьярду, Ккав­кказуллал оьрмулия мувмур-тамур чичайссия. Вайннухгу ттун чан-кьансса дунугу гонорар дучIайва.
На Истанбуллив ца-кIива элмулул лу чивчуссия. Микку на Якьутнал диндалул хIакъираву ца серьезныйсса лу чивчуссия. Ва лу чичинсса материал Ккавкказнал луттирдая ларсъссия.

***
Профессор Риза Тавфикь-бей* Истанбуллив туркнал дянив яла машгьурсса ва хъунасса аьлимчунан ва философнан ккалли айва. Риза Тавфикь-бей хъинну ххуйну дурккусса: кIива-шанма факультет къуртал бувсса, чIявусса ажнабийсса* мазру кIулсса, сайки цаняв фалсафалул* теорияртту кIулсса ва кIай теориярттал мухIлухIин дурчIин, бусан бюхъайсса даражалул аьлимчу ия.
На Истанбулливсса чIумал Риза Тавфикь-бей мукьцIа-ххюцIалла шинаву ухьунссия.
Туркнал ва цала яла хъунама философнан ккалли айва. Мяйжаннугу, ванал тамансса элмулул давурттив дия. Цагу ва, анжагъ философ акъаяча, гьамгу ххуйсса шаэргу ия. Ванал ххуйсса, тIааьнну чивчусса шеърирдугу бия. На ти­ккусса чIумал ванал фалсафалул энциклопедия чичлай ия, ва на тикку уссаксса ва энциклопедиялул ца том бувккуна. Махъмигу тания махъ бувкхьунссия. Риза Тавфикьлул «Фалсафа дарсий» («Философиялул дарсру») – тIисса бугьарасса лугу бия чивчуну.
Риза Тавфикьлул «ХIамид-наме» тIисса туркнал машгьурсса шаэрнал Аьбдул ХIакь ХIамидул философиялул пикрирдая чивчусса, хъинну агьамиятсса лугу бия.
Риза Тавфикьлул француз мазрай хIурувфийтурал* хIакъираву чивчусса элмулул лугу бия. Мунал цаймигу философиялул луттирду, макьаларду ва ххуй-ххуйсса шеърирду ва цаймигу луттирдугу бия.
Риза Тавфикьлун француз маз, ингилис маз, италиянал маз, аьраб маз, парс маз, грекнал маз ва жугьутI маз кIулсса бия, амма ца немецнал маз къакIулну бия. (Циван къалавхьхьуну бивкIссарив къакIула. БучIир мунан немец къаххирасса бивкIун бикIангу).
Риза Тавфикь диндалийн вихсса ва дин дайсса адаминагу акъая, амма дин оькки дурну, мунийн оькки­ссаргу къачайва, диндалул масала инсаннал цала шахсийсса* иширан ккалли байва. Цува, тIурча, му иширавун хIала къауххайва. Риза Тавфикьлун аьраб маз хъинну кIулну бия, амма аьрабнал маз ва аьрабнал адабият танан ххирашиву аьлтту къашайва.
Иран ва ираннал адабият чIувну ххирая. Цувагу чIувну Ираннал адабиятрайн хъар хъанан икIайва.
Риза Тавфикь хъунасса англофилгу ия. Ингилиснал культуралуя цIа дуллан икIайва. Укун англофил унутIийгу туркнал жагьилтуран мув къаххирая.
Ванал мина-гьану часса диркIссарив цIана ттун дакIний къаливчIунни. Миллат хIисаврай халисъсса турк ивкIшиву къакIулли. Ванан иттихIадчийталгу1 къаххирая. Ванал политикалул хиял «хIурият ва иътилафрал»2 чулухунмай бия. Халисъсса турк маз гьаз бан, утта буккан бан ччисса «турк-юрдий»3 ва «турк ужагъчийталгу»4 ванан къаххирая.
Та чIумал Туркнаву чIявусса миллатру куннивун кув хIала бувххун бия.
Риза Тавфикьлул ца-ца цанналусса хасият, аьдатругу дия. Ца чIумал кIа цала хъуннасса аьсавгу канил дургьуну, увкIун кIанттуйгу щяивкIун, лекция буккайва. Укун лекциялийн аьсавращал, янналущал учIайсса аьдат цаймигу муаьллимтураву дакъая. Чансса къагъссагу ияв, къакIула.
Ца-ца чIумал цала чIивисса арсгу архIал увцуну увкIун, лекциялун кIанттай арснахь жун, студентътуран, скрипка бищун байва.
Риза Тавфикьлул Саэд цIа дусса ца ххуйну тарбия увсса ва ххуйну скрипка бищайсса 8 шинавусса арсгу ия. Жува ванал цала буттал кабинетравун занай, бухсса грекнал философия тикрал барду. Ризвал жухь буклакисса лу чивчуну, бивщуна турк мазрай. Вава лу жуйх, студентътурайхгу, бавчIуна ва ванил ца экземпляр ттучIагу ливчIун бур.
Риза Тавфикь ингилис маз ххирасса адамина ия. Ца ххуллух ингилиснал военный командующий туркнал шагьзада Мажийдлущал ккаккаву дан университетравун най ур тIисса аваза бувккун, университетрал хьхьичIсса конференциялул залдануву чIявусса халкь батIлай бия. Ва чIун дяъвилуву турк бух хьусса, амма, гьалаки, ингилиснащал дакьаву дурну къуртал къархьусса чIун дия. Ци бурив ххал бан, нагу кIа конференц залданувун лавгра.
Ца кIанттай (ложалий) щябивкIун шагьзада Мажидгу ва цаймигу тамансса туркнал хъунимигу бия. Цаппара хIал хьувкун, ингилиснал хъуними бувкIун, гъалгъа тIун бавчуна ва цама ца адаминагу кIайннал тIимур буслай, перевод буллан ивкIуна. Переводчикнал ингилис маз ххуйну къакIулну, къукI-мукI тIун ивкIуна. Шикку Риза Тавфикьгу ия. Переводчик къукI-мукI тIун ивкIукун, ххявххун ивзун Риза Тавфикьлул переводчик укьан увну, цала переводчикшиву дуруна. Шикку чIалай бия Риза Тавфикьлун ингилис маз ххуйну кIулну бивкIшиву. Ца чулухатугу чIалай бия Риза Тавфикьлул ингилиснал хъуниминнащал гъаншиву диркIшиву.
Ца ххуллухгу кIава конференц-залдануву Риза Тавфикь софизмалул хIакъираву доклад буллай ия. Ва аралуву кьиблалул чулухату дурккун цаппара ингилиснал самолетру, Истанбуллал ялтту лехлай, бомбарду бичлан диркIуна. Та чIумал Туркнал Ингилиснащал дакьаву дурну къуртал къархьусса чIун дия. Ва та чIумал чIявуну, хаснува нюжмар кьинирдай, оьбан-хъинбан кунма, ингилиснал самолетру дуркIун, бомбарду бичлан дикIайва. Бомбардая нигьабуслай, чIявусса инсантал докладрая лихълан бивкIуна. Лекция ккалаккисса Риза Тавфикьлул цала чIунил такьварагу даххана къадурну, ахирданийн бияннин цала доклад бувккуна. ЧIалай ия Риза Тавфикь кьянкьасса, нигьакъаусайсса инсан ушиву. Риза Тавфикь цувагу жандалул зираксса, чурххалгу оьвхъусса адамина ия.
Риза Тавфикь Туркнал националистътуран, панисламистътуран ва пантюркистътуран салахI акъасса ва вай пантюркистътал къаххирасса инсан ия. Ва адаминал ахир ссайн дуркссарив ва ванан туркнал националистътурал ци бувссарив ттун къакIулли.
Мустафа Камаллул революциялул душмантуращал – Аьли Камалхъащал, Дамад Фарийд-пащахъащал, ва азадшиврул душмантуращал Риза Тавфикьлул хъуннасса дусшиву дия. Ми бучIибакъултращал архIал ивзун Риза Тавфикь дакьаврил конференциялийн Лондоннайнгу делегатну лавгуна.
Риза Тавфикь туркнал хъинну машгьурсса ва туркнан ххирасса шаэрнащал АьбдулхIакь ХIамидлущал1, цагу машгьурсса арамтал, шаэр ХIусайн Данишлущал хъинну дусну икIайва.
Риза Тавфикь туркнал ингилис-французнащал дакьаву дуллалисса чIумал Дамад-паша кунасса учIиакъул магъ дургьуну, дакьаврил туркнал конференциялийн делегатну Лондоннайн лагаву туркнал жагьилтуран хъинну ччан къабивкIуна. Туркнал мустакьил2 шаврил ххуллий Ингилис французнащал ва кIайннащал биллалисса МустIафа Камалхъангу Риза Тавфикь хъинну къаххирая. Социализм, коммунизмрах Риза Тавфикьлул ургавуртту ххуйсса дакъая. КутIану учин, Риза Тавфикь буржуазиянал философ ия. Ва Туркнаву реформартту дан ччиминнангу къаххирая. Ттун доктор Риза Тавфикь ци политикалул ва цумур партиялул адамина уссарив ххуйну кIул къавхьуна. Та чIумал тикку кIира хъуннасса партия дия: ца партиялийн «ИтихIад ва таракъийчитурал» партия учайва, кIамур партиялийн «Иътилаф ва хIуриятчийтурал» партия учайва. «ИтихIад ва таракъийлул» партия пантюркистурал ва панисламистурал партия дия. Ва партия турк мазрай гъалгъа тIутIисса циняв инсантал ца бан ва ца мазрайн бичин ва циняв бусурманталгу Оьсманлув хIукуматрал канилу ца бан чялиш хъанахъисса хъинну реакционнайсса пикрирдал партия дия. Ва партия Германнал кумаграйн хъар шайсса, антисемитизмалул магъ дургьусса ва ванин кумаг буллалисса партия дия. Туркнаву ва партиялул бакIчиталгу: ТIалааьт-бей, Жамал-бей, Анвар-бей кунмасса авантюристал бия. «ИтихIад ва таракъий» партиялул кумагчиталгу «Турк юрду» тIисса журнал ва «Турк ужагъий» тIисса ташкилат (организация) дия.
«Иьтилаф ва хIуррият» партия тIурча, Ингилис ва Французнал кумаграйн хъар хьусса ва вайннал империалистътуран ва миннайн кумагчишиврул политикалул кумаг буллалисса, мура куццуй хъинну реакционнайсса партия дия. Ттул хIисаврай, «ИтихIад ва таракъий» партия турк мазрай гъалгъа тIутIисса халкьуннаву ва туркнал панисламистътурал дяниву ппив хьуну дия. «Иътилат ва хIуррият» партия тIурча, аьраб, курд, арнавуд1 ва чаргас кунмасса, турк бакъасса цайми халкьуннал дяниву чанну дунугу ппив хьусса партия дия. Амма цамур миллатрая бухьурча, Туркнавусса мискин-гъарив кунмасса халкьуннан вай партиярттая хъунмасса хавар бакъая. Цала мискиншиврулсса буллай бикIайва ва партиярду миннан муксса къакIула ва ми миннал муксса личIигу къадайва. Гьам «Иттлаф ва хIуррият», гьамгу «ИтихIад ва таракъи» партия – ми буржуазиянал мурадру буручлачисса партияртту дия. Миннул хIакъираву туркнал мискинсса халкь муксса къайгъулий бакъая.
Профессор Риза Тавфикьлул жухь метафизикалия ва эстетикалия лекцияртту буккайва. Мунал цала лекция вичIидишин гъира багьанну буккайва, студентъталгу мунал лекциялий рязийну бикIайва. Амма аьвам халкьунналгу, аристократналгу цасса маз бушаврий Риза Тавфикь вих къашайва. Аьвам – ца мазрал, аристократ тIурча, цамур мазрал халкьри чайва. Аристократнал маз мураккабсса1 мазри, аьвам халкьуннал маз тIурча простойсса мазри учайва. Вай кIива маз ца бан, цаннийн кIурабаен бансса пикрилийгу му рязий къашайва. Ва куццуй, Риза Тавфикь аристократ ххирасса инсан ия. Дин ваца аьдатран ккалли дайва. Халкьуннал аьдатирттан хIурмат бан багьайсса кунма, диндалийнгу хIурмат бан аьркинссар чайва.
Профессор Риза Тавфикь ва куццуй буржуазиянал аьлимчу ва миннал пикрилул адамина ия. На хьхьичIавагу увкусса кунма, Риза Тавфикьлул чIявусса луттирду чичайсса бия. Амма ми циняв луттирду идеалист характерданул луттирду бия.
Профессор Риза Тавфикь цува инсантуравух хIаласса, иминсса ва тяхъашиву ччисса адамина ия. Ца-ца чIумал жул факультетрал, адабият факультетрал, душру, оьрчIру цачIун бавтIун, ца чIирисса вечерду ва тяхъашивуртту дайва ва вай тяхъашивурттаву профессор Риза Тавфикьгу гьуртту шайва. Цала чивчусса балайрду, шеърирду буккайва, цайминнал бувсъсса балайрдах вичIидишайва. Душварахь балай учин байва ва миннахь муму-таму буслай, ми тяхъа буллан икIайва.
Ца ххуллухь студентътурал вечерданий «Ахтар» цIа дусса ца душния нагу ва балай чивчуссия:

Ахтар, ина бура эшкьилул цIуку
Вин я бивнан цIа чай эшкьи-ччаврил баргъ.
Дуривав цамургу эшкьи куннасса
ХIаз буна хIасратсса, хIасратгу хIазсса!

МакьнатIис дуривав вил яруннаву
Буцан бан къашайхха вих буруг яру.
Ци тIилисин бурвав вил жандалуву
Дуниял цIан шайхха ина бакъаний.

Зурул чаннал ранг дур вил жандаливу,
ХъуручIнияр лухIир иттал жавгьарду.
Вил мурччай хъякувкун къуппуву тIутIи
ТIутIайх дичай чачун янин ххал шаймур.

Ламус мяърувфасса1 вил бургаву дур,
Бунагь къабухханну кIучI хьусса дакI дур.
Жунавран лархьхьусса ххуйсса мурччив дур,
Урувгма хIайран шай вил сувратрая.

Вил ххуйшиврул бакъар ина ччан бувсса,
Ттун ччаву дурунни вил махIрумшиврул,
КIулши ва кIушиву душварай дакьай,
Ахтар, вил кIушиврул на куклу увнна.

Истамбул 1919 ш.

Ца-ца чIумал дакI лухIи-цIан ларгун бакIравусса пикрирдал дакI бувгъ дуллай, ттула ихтияр дакъасса куццуй, лагмара чIалачIисса тIайла дакъашивурттайн сси бизлай лякъаварда. Дунияллул ишру аьжаивсса буну, чувчIав чIалай дакъар марцIсса хъиншиву.
Уттарашиврул ца мяъна дакъар. Куннан нахIу хьуну, куннан кьурчIи шай.
ТIайласса, лирцIусса цичIав дакъари. Дард хъирив дакъасса тирхханну дакъар. Ххаринма ва оьрму бутан къабюхъай.

***
Жандарталмий бур кьай «Адамлул оьрчIру»
Бивгьусса ссихIгума макру бусса бур.
Цала бюхъай чIумал багьайссар куну,
Къабюхъайцириннахь загълунну «да!» чай.
Дардисансса бяс-ччал «Адамлул оьрчIан»,
Хъиншиву дакъари ва дунияллий.

Гувж бунал бакъама хIунку увайсса,
Янин чIалай най бур инсаннал оьрму.
ТIайлашиву ччима оьнан ккалли ай,
АвккунацIун авкьнайн ххуйсса, хъинсса чай.

Инсаннан ччай бур тIий, я къаччай бур тIий,
ТIайла бацIайссарив дунияллул ишру!
Азад ТIусил тIимур на тIайла бара:
Ва дуниял дакъар, марцI аьвамшивур,
Хъун балугърал бюкьай чIиви балугъру.

Истанбул 1921 ш.

***
Бургъил-зурул чанна лавхъ буттал кIанттух
ЦIурхьхьу тIинна дикIай ттул дакI даиман,
МурчIинангу чаннасса лахъсса зунтту
Яла къагьай ттул иттату хьхьу-кьини.

Архну агьну ура вай тIутIал зунттайн,
Ттуна ччай акъана гъурбатрайн агьну.
Дюхлул къашай кIири ларгсса дикIул дакI
ИштахIну дур ва дакI кавсар щаращух.

Амма хIал бияй ттуйн
Ттул дакI махIрумсса,
Ци-цигу чIунну шай
Къув-аьс тIутIисса.

Хьухьлий гъели дуллай,
Ппай тIий хъун дурсса
Силул хьурвав тти тIий
Зунттал банавша!

Истамбул, 1920 ш.

На Истанбуллив дуклакисса 1918-1921 шинну Дагъусттаннай хъанахъисса хъунисса аьлагъужардал, питнардал ва биявурттал шинну дия.
1919 шинал генерал Халиловхъал ва кIинияз НухI-бек Тарковскийхъал питнакаршиврия Дагъусттаннал халкь гъюжу-гъярж буккан бувну, мютIий бан хIисаврай Дагъусттаннал ялун нанисса Деникинхъал аьралунная цала цивппа мудафааь1 бан ва иш ца бан мудафааьлул штаб сакин бувну, биллалисса Дагъусттаннал халкьуннан чIявусса баларду ккавккун бия. КIания махъгу Гуржиял меньшевиктурал ва хаснува, Французнал, кумаграйну Дагъусттаннай большевикшиву духлаган дан ниятрай, майданнив бувккун, биллалисса ХIуцциннал Нажмуттиннул ва Французнал капиталистурал арцух машан лавсун, Дагъусттаннайн тIайла увксса Шамиллул арснал арс авантюрист Саэд-бейнал дурсса восстание лещан дуллай, Дагъусттаннал халкьуннан, хъунисса захIматру ккавккун бия. Амма, Дагъусттаннай цивхьуссарив, ци хъанахъиссарив ттун ххуйну цичIав кIул къашайва. Та чIумал пучру занай бакъая. Дагъусттаннай ци бурвав – ци бакъарвав тIий дакI хъювусулну, буруккинттарай ияв.
Ца ххуллухь Истанбуллал газетирттай Дагъусттаннай цала цивппа мудафааь буллай Деникиннул аьралуннащал биллалисса Дагъусттаннал халкьуннал дяниялу зия хьуну, миллатчийтурал большевиктал ливтIуну бусса бур тIисса хавар бавуна. Амма цу ивкIуссарив ва цивхьуссарив къакIулнугу, дакI хъинну хъювсул дурккун, буруккинттаравун увтунав. Та чIумал туркнал Казим-бей тIисса ца авантюрист хIаписарнал Урмав Султан-Саэд Казбеков ивкIушиву кIул хьуна.
Султан-Саэд Казбековлущал ттул чан-кьансса дунугу кIулшиву дуссия. На Щурагь «Илчий» газетрал редакторсса чIумал, мунащал ттул личIи-личIисса сиясийсса1 масъалардая ихтилатру шайссия. Цувагу му «Дагъусттан чанна бай бюрорал» яла активныйсса члентурал ца ия.
Гьарун Саэдовлущалгу мунал хъуннасса дувсшиву дия. Ва инкьилабрал ххуллий кьянкьану авцIусса жагьил ия ва ивкIушиву бавну, дакIнин хъуннасса махIрумшиву дагьуна.
Ца аралувугу Истанбуллив ттун, Батуннай маша-хашай увкIсса ца лаккучуная Деникиннул аьралуннащалсса дяъвилуву ттула буттауссил арс Заку ивкIушиву бавуна. Ва хаварданулгу на хъинну хъювсул увнав.
Заку (Закария) ттул буттал уссил, Аьммал (ХIажи-МахIмудил) арсъя. Ва хIан-къалиян бакъасса ва хъинну дугърисса адамина ия. Ва ивчIай чIумал мукьцIалла шинаву ухьунссия. Ванал ттун, на Истанбуллив дуклакийни, арцуйну кумаггу байссия. Хъинну кьянкьасса, виричусса адамина ивкIун ия. Ца ххуллухь Къазакъуллава Ттуплислив нани ххуллий ва хъямала ан, ванахьсса арцул чиллу зеххин ччай къачагътал мунайн ххявххун бивкIссар. Минная Закул шамасса ивкIуну, цагу ищун увну, цайрагу хъунисса щавурду хьуну, Ттуплислив увкIун ивкIссар.
1919 шинал Гъумукун нанисса Деникиннул аьралуннащал иян ва минная Буттал кIантту буруччин Заку цайва цува, хушрайну Ваччиял Гьарун Саэдовлущал аьрайн лавгун ивкIссар. Ва чIумалгу тайннал Жунгутайннал бурхIайсса дяъвилуву, ца ша махъунмай къалавсун, душмантурал лажиндарай хъинну кьянкьану авцIуну ивкIссар ва виричуну ивкIуссар. Щурагьун нанисса ххуллий ца-кIива шаттирал лавай увччуссар цувагу. Ттун ва ивкIушиву Истанбуллив 1920 шинал бакIрай (6.1.1920) бавуна.
Заку ивкIушиву бавукун, Истанбуллив дакI къума-цIан ларгуна ганал аьпалун вай ца-кIива байт чивчуссия:

Закуй, ттул ссурахъуй!
Цан гъагъан дара
Укуннагу гъаргъсса
Ттул дакI инагу?

Язи-язиминнал
Дардру ккарксса на
Вил лухIи хаваргу
Цукун бухIави?

Бувцири дяъвирду
Вин гьа къавхьунав,
ИчIунай ияннин
Дяъвилийн лавгсса?

Зур ялун бавчукун
АцIан къавхьунав,
Буттал кIанттул ххуллий
Жан дулун лавгсса?

Жунгутайннал бурхIай
Гьав ччай дуссияв,
ХIалтIилух нанинал
АлхIан буккаван?

ЯхIирачIа бивкIу
Кьукьин бувссияв.
Лакрал оьрчI-вирттаврал
Эбрат ласаван!

Утти пайда бакъар
Ттул агь-чаклия.
Лавгмунил бан шайсса
ЦичIав бакъари.

ХIат дакъасса бур вай
ЦIуртти ссавруннай,
Ца баргъ ва барз бакъа
Цамур къабугьай.

1920 ш. Истанбуллив

3. Инкьилабчи – революционер
1. Дарул-муаьллимин – учительтал хIадур байсса институт
2. Испанка – гриппрал ца жура.
1. Паранг (паланг) – Европанал инсантал.
1. Муаьллим – дарс дишайма, учитель.
2. Ихтисас – сянат, пиша, специальность
3. «Тадрисат мажмуаьсий» — «Лахьхьин баврил, дарс дишаврил хIакъиравусса сборник».
1. Хуласа – кутIану учин.
1. Дарулфунун – университет
1. ХIисаб-элмурдал – математикалул
2. ХIукьукь – элмурдал – юридический
3. Адабият – элмурдал – филологиялул
4. Шюъба – отделение
5. Ахлакь – этика
6. МантIикь – элму – логика
7. Тажрубий – опытрал
8. Оьмувмий – аьмсса
1. Муаьллим – дарс дихьу, преподаватель
1. Риза Тавфикь Белюкьбаши – (1868-1952 ш.ш.) – Туркнал машгьурсса шаэр, философ, аьлимчу ва политикалул иширттаву гужну гьуртту хъанай ивкIсса инсанни. «Белюкьбаши» тIисса фамилия ванал ларсъссар 1934 шинал Туркнаву фамилияртту нани дурсса чIумал Туркнал ванайн чIявуну «Файласуф Риза» («философ Риза») учайссар.
2. Ажнабийсса мазру – кьатIаллил билаятирттал мазру
3. Фалсафа – философия
1. ХIурувфийтал – XIV-XV векирдай Ираннай хIасул хьусса, суфизмалул гужсса асарданулугу бусса шинал динисса ца секталул инсантал.
2. Шахсийсса – инсаннал цалва биялалисса, цала ихтиярданийсса
1. ИттихIадчитал – «ИттихIад ва таракъи» («Цашиву ва хьхьичIунмайшиву») тIисса партиялул члентал. Оьрус мазрай миннайн «младотурки» учайссар. Му партия диркIссар XX векрал дайдихьулий 20-чинми шиннардийн дияннин.
2. «ХIурият ва иътилаф» («ХIуррият ва рязишиву, бакьаву») – дунияллул цалчинмур дяъви хьуннин Туркнавусса буржуаз партия.
3. «Турк юрду» («Туркнал Ватан») – Истанбуллай 1911-1912 шиннардий буклай бивкIсса туркнал миллатчитурал журнал.
4. «Турк ужагъ» — XX векрал дайдихьулий Туркнаву миллатчитурал сакин бувсса клубру. «Турк ужагъчий» — мукунсса клубрал член.
1. АьбдулхIакь ХIамид (1851-1937) – машгьурсса шаэр, 1934 шинал ванал цанна «Тархъан» тIисса фамилия ларсъссар.
2. Мустакьил – цала бияла цахьва бусса, чин хъар бакъасса
1. Арнавуд – албан
1. Мураккабсса – сакин бувсса, бавзусса (сложный)
1. Мяърувфасса — цIа дурксса
1. Мудафааь – буруччаву (оборона)
1. Сиясат – политика, сиясийсса – политикийсса, политикалуцIун бавхIусса