Май зурул 31-нний МахIачкъалалив «Труд» стадиондалий хьусса ГТО-лул (готов к труду и обороне) нормативрду дуллалисса спортрал мероприятиярттаву гьуртту хьунни Лакрал райондалул гьарцагу идаралул пишакартурал командагу:
администрациялул Спортрал ва физкультуралул комитетрал пишакар Малик ХIусманов, ГО ЧС-рал отделданул пишакар Надир ХIасанов, аналитикалул ва информациялул отделданул хъунама ТIагьир АхIмадов, администрациялул хозяйствалул иширтталсса буллалисса пишакар Амин Чутуев, КIулшиву дулаврил управлениялул пишакар АхIмад МихитIаев, цIу лещан дай идаралул хъунаманал хъиривчу Салим Закарияев ва мува идаралул зузала Минкаил Куяев.
Циняврдагу нормативрдал хIасиллайн бувну, Лакрал райондалул пишакартурал командалул бувгьунни 1-мур кIану.
Шиккува кIицI бан, Лакрал райондалий яла хъуннасса хъар ларсун зузисса, райондалул ва республикалул лагрулийсса турнирду дуллалисса отдел дур спортрал ва физкультуралул отдел. Ми бяст-ччаллайгу чIявуну хьхьичIунсса кIантту бугьай Лакрал райондалул командарттал. Сайки 3-4 шинни ГО ЧС-рал буллалисса агьалинал мюхчаншиву дуруччаврил конкурсрай лув-ялув Надир ХIасановлул хьхьичIунсса кIантту бугьлай. Гьашину тIурча ванал бувгьуссар 1-мур кIану. АхIмад МихитIаевлул каялувшиннаралу, райондалул дуклаки оьрчIал «Безопасное колесо» тIисса республикалул бяст-ччалливу бугьайссар мукунма хьхьичIунсса кIантту. Вайми пишакарталгу райондалул администрациялий ххуйсса сияхIрай буссар.
Барча буллай жулва жагьилтал, чIа тIий буру миннан давриву тIайлабацIу.
