Майрал 26-нний байбивхьунни, ккаккан бувсса графикрайн бувну, Ккуллал райондалийгу ЕГЭ-рду дуллай. Миннул хIакъираву цIуххаву дуван на хьунаавкьуссияв Ккуллал райондалул КIулшиву дулаврил управлениялул бакIчи АхIмадов Шамил Аьвдурашидовичлущал.
— ЕГЭ-рду дулайсса пунктну хъанахъиссар Ккуллал 2-мур школа. Гьашину 11 класс къуртал буллалисса 121 оьрчI ур. Уссия ларгсса шиннардий экзаменну дулун къавхьусса 4 ученикгу, амма ми экзамен дулун къабувкIунни. Уттинин, майрал 26-нний, дуллуссар литературалул ва географиялул экзамен, 29-нний – оьрус мазрал экзамен. Ми гьан дурссар Республикалул ЕГЭ ххал дувай центрданийн.
Школарду къуртал буллалисса оьрчIал чара бакъа дулун багьлагьисса экзаменнуну хъанахъиссар оьрус мазрал ва математикалул экзаменну. Гайми дуллалиманал хIукмулийну дулайссар. КIицI буван ччива ЕГЭ дуллушиврун хIисав дувантIишиву яла чанну вайксса баллу лавсъсса давуртту: оьрус мазрал – 36, математикалул – 24, физикалул – 36, химиялул – 36, историялул – 32, географиялул – 37, литературалул – 32, обществознаниялул – 39, ингилис мазрал – 20, информатикалул – 40. Нажагь цания ца ЕГЭ дулун къахьурча, июньдалул 16-19-нний Гергебиллай му кIилчингу дулун хьунтIиссар. Чара бакъа дулун аьркинсса оьрус мазрал ва математикалул кIирагу экзамен дулун къахьурча, бучIи бувну бур ми ялунчIин дулун. ОьрчIал ххишала цала хIукмулийну дуллалисса ЕГЭ-ду дулун къахьурча ца дунугу, ххишала дунугу, чара бакъа дулун аьркинми дуллуну духьурча, буллалиссар школа къуртал бувшиврул атесттат. Гания гихунмай цалва оьрчIалгу хIарачат бувну, ЕГЭ-рду ххуйну дулунссар тIисса умуд бур. Навагу тIайлабацIуртту чIа тIий ура жулва оьрчIан.
