Июньдалул 3-нний ДР-лул Культуралул министерствалуву хьунни июнь зурул 5-нния 11-ннийн бияннин жулла республикалий хьунтIисса VI фольклорданул ва аслийсса культуралул халкьуннал дянивсса «Горцы» фестивальданул хьунийнсса пресс-конференция. Му бачин бувну бия ДР-лул культуралул министрнал хъиривчу, Республикалул Халкьуннал творчествалул Къатлул директор Марита МухIадова.

Бадрижамал Аьлиева
Ва фестиваль жулла респуб­ликалий гьашину ряххилчинни дуллалисса. «Горцы» фестиваль духлай дур халкьуннал творчествалулсса байсса Дунияллул халкьуннал организациялул фестиваллал календарьданувун. Фестиваль цурдагу дуллалиссар ЮНЕСКО-лул иширтталсса буллалисса АьФ-лул Комиссиялул ва му Комиссиялул Дагъусттаннал отделениялучIасса материальный дакъасса культуралул ирсирал Комитетрал гьурттушиврийну.
«Горцы» фестивальданул чIаравбацIаву дуллалиссар Да­гъусттан Республикалул БакIчинал, Аьрасатнал Федерациялул Культуралул министерствалул ва Аьрасатнал ПаччахIлугърал халкьуннал творчествалул къатлул.
Ва фестиваль 2012-ку шиная шиннай дуллалиссар ЮНЕСКО-лул эгидалулу ва мунихь ихтияр дуссар ЮНЕСКО-лул логотип ишла дуван, печатьрал тIий, цамур тIий, рекламалул продукциялуву.
Гьашинумур «Горцы» фестивальданувух гьуртту хьунтIиссар Азирбижаннавасса, Къазахъис­ттаннавасса, Латвиянавасса, Словакиянавасса, Турциянавасса, Франциянавасса ва Аьрасатнал регионнаясса – Алтай, Къалмукьнал, Къабардин-Балкарнал, Къарачай-Чаргаснал, Марий Эл, Ухссавнил АьсатIиннал, Чачаннал республикарттаясса, Ставрополлал, Краснодардал крайрдаясса, Астраханнал, Ростовуллал, Пензенскаллал областирдаясса, ва жулла республикалул шагьрурдаясса ва районнаясса фольк­лорданул коллективрду.
«Горцы – 2014» фестивальданулмур программа дур хъинну авадансса. Ванил лагрулуву вай гьантрай республикалий хьун тIий дур цикссагу шадлугъру, батIавуртту: Аьрасатнал халкьуннал дусшиврул форум «Традиция», Ухссавнил Ккавкказуллал Федерал Округрал хъуни шагьрурдал халкьуннал творчествалул фестиваль «Кавказ – единая семья», «Культура как важнейшее средство сохранения мира» конференция, «Поэзия народного костюма» фестиваль ва мукунна цаймигу. Фестивальданул тарихраву цалчин, ва ххуллух Дарбантливсса Нарын-Къалагу хьунтIиссар «Горцы» фестивальданул майдан. Мукун, июньдалул 8-нний микку хьунтIиссар «Дербент- перекресток цивилизаций» цIанилусса халкьуннал творчествалул ва аслийсса культуралул фестиваль ва аслийсса культуралул фестиваль-выставка «Голос вечности». Дарбант шагьрулул майдандалий мура кьини хьунтIиссар «Шелковый путь» музыкалул фестивальгу.
Фестивальданул гьантри, щак бакъа, хьунтIиссар дунияллул чIяву миллатирттал, чIяру культурардал бувцIусса гьантрину, цалгу хъинну хъуннасса даву дуллалисса халкьуннал дянивсса арарду, чIахху-чIарахминнащалсса дахIавуртту цIакь давриву, жулла республикалул сий цайми хIукуматирттал ва регионнал хьхьичI ларай давриву.