«Дуниял оьрчIал иттах»

ko_11Москавлив «Дагъусттан» Культуралул центрданул дуллай бур чIярусса шадлугъру, батIавуртту, байраннан, юбилейрдан ва цаймигу иширттан хасну. Миннуя чIа-чIаннин жулва кказитрайгу чичару. Уттигъаннугу, кIа Центрданул хIадур дурну, Москавлив хьуну дур москавуллал дагъусттанлувтурал оьрчIал творчествалул вечер «Мир глазами детей» цIанилусса.

Мероприятие дайдирхьунни Москавуллал культуралул «Дагъусттан» центрданул Президент, профессор, техникалул элмурдал доктор Арсен ХIусайновлул. Ва батIавривух гьуртту хъанахъиминнахь чабувкругу куну, Арсен Буйдалаевичлул цалва ихтилатраву кIицI лавгунни махъа нанисса ник тарбия давриву уку-укунсса мероприятиярттал цукун агьамсса кIану бугьлагьиссарив, Культуралул центрданул цилла давриву хъуннасса къулагъас дуллай бушиву жагьилтал ва оьрчIру тарбия баврих, яни Москавливсса дагъусттанлувтурал творчествалул луртан аьч дуван, му щаллуну ишла дуван дуллалисса давурттив, оьрчIал ва жагьилтурал рувхIанийсса тарбиялуха цачIу зун аьркиншиву паччахIлугърал властьрал органну, общественность, кулпат ва СМИ цачIуну. Арсен Буйдалаевичлул бувсунни бавтIминнахь гьашину Культуралул центрданун 25 шин там хъанай душиву ва мунийн бувну дантIишиву юбилейрал мероприятиярду.
Москавуллал миллатирттал къатлул чулуха хъамаллурахь чабувкру увкунни А. Кулагиннул. Мунал бувккунни Аьрасатнал культуралул фондрал Дагъусттаннал филиалданул директор Луиза Гавриловал Москавуллал миллатирттал къатлул директор Н. П. Комаровлул ва Культуралул центрданул президент А.Б. ХIусайновлул цIардайн гьан бувсса чагъар, цивугу барчаллагь тIутIисса «Дагъусттан» центрданул дуллалисса хъин-хъинсса давурттахлу, махъа нанисса гьунар бусса дагъусттанлувтурал чIарав бацIлацIаврихлу. Луиза Карповна цилва чагъардануву ялагу буклай бур, «Дагъусттан» культуралул центрданун 25 шин хъанахъаврийн бувну, цаппарасса проектру цачIуну дувансса сипталущал, Москавлив дакъа, Дагъусттаннайгу.
Гьунар бусса оьрчIру барча буван ва кьини бувкIун бур АьФ-лул ПрезидентначIасса ДР-лул Постпредствалул вакилталгу — Муданасса Вакилнал хъиривчутал Изумруд МухIуттинова ва ХIажимурад Къажлаев, отделданул начальник Оьмар Ибрагьимов.
Гихуннай оьрчIал бавтIминнан ккаккан дунни классикалул музыкалул концерт. Миннал щаллу бунни П. Чайковскийл, С. Рахманиновлул, С. Прокофьевлул, М. Глинкал произведенияртту.
Классикалул вечермур дайдирхьунни Дагъусттаннал ва Таджикисттаннал лайкь хьусса артистка Азалия ГалиахIматовал (скрипка) ва дунияллул халкьуннал дянивсса конкурсирдал лауреат Альбина Чабаевал (фортепиано).
Цилва чIавасса оьрмулух къабурувгун, уттинин цимирагу дунияллул ва Аьрасатнал конкурсирдал лауреат хьусса Аниса Дажаевал (10 шин) щаллу бунни П.И. Чайковскийл «Колыбельная песня». Ванил ппу КIулушацIрал шяравасса Дажаев Шейхамир Пасттаминнул арс ва нину Аня душ тарбия бавриву, ванин кIулшиву дулавриву цалва буцири гуж бихьлай бур.
Цалва гьунарданийну бавтIми ххари бунни усттарсса скрипач, ДР-лул лайкь хьусса артист Марио Дюрандлул.
Лакрал театрданул цIанихсса артист Балугъовлул правнучка Мусиева Аьйшатлул (12 шин) усттарну бивщунни скрипка ва увкунни ингилис мазрайсса балай. Ванил нину Мусиева Ирина Жабраиллул душ бур КIундиннал шяравасса. Цуппагу философиялул элмурдал кандидат Иринал биялсса гуж бихьлай бур душнил гьунар хьхьичIунмай бавриву. Ва кьинисса классикалул концертрай чIявусса цаймигу оьрчIал ккаккан бунни цалва гьунарду.
Фойераву ва концертрал залдануву ва кьини мукунна дия жагьилсса художниктурал дирхьусса суратирттал выставка. Миннавух композитор, СССР-данул лайкь хьусса артист Мурад Къажлаевлул арснал душ Валида Къажлаевал, лавайсса Строгановский художествалул училищалул (университетрал) студентка, Москавуллал ХIукуматрал стипендиялул лауреат Эльвира Башанаевал (ванил ппу ур Лакрал райондалийсса ЧукIуннал шяравасса, нину — Маидат) давуртту. Ва выставкалувух гьуртту хьусса Губкиннул цIанийсса Москавуллал навтлил ва газрал университетрал аспирантка Тамара Маммаевал (Гъумучату­сса) элмийми ва художествалулми давурттив хьхьичIунну дачин дурну най бур. Ва бур гьарцагу чулуха итххявхсса душ. Цалчинмур классрал дуклаки душ Аьлиева ПатIимал ва ванилва ссурахъу, МОСА-лул студентка АхIмадханова Зариналгу ххари бунни ва кьини тамашачитал цалла ляличIийсса давурттайну. Вай душру бур Лакрал райондалийсса ЧIарттал шяравасса.
Ва батIаврил ахирданий Арсен ХIусайновлул барчаллагь увкунни ва концертравух гьуртту хьусса цинявппагу оьрчIахь ва миннал нитти-буттахь, залданувусса цинявн­нахьвагу, мукунма Президиумрал члентурахь — Земфира Каллаевахь, Жанет Шамасовахь, Нариман Аюбовлухь, ХIажи Аьлиевлухь, цалгу хъунмасса бутIа бивхьусса ва ххаллилсса вечер хIадур давриву. ЛяличIийссава барчаллагь увкунни Арсен Буйдалаевичлул ва вечер дачин дурну бивкIсса Аьлиева Сабинахь (Финансирттал академиялул выпускница). Сабина бур лавай кIицI лавгсса хIурмат бусса ХIажи Сулаймановичлул арснал душ, ЧIарттал шяравасса. Цалва ихтилатраву Арсен Буйдалаевичлул чIурчIав дунни Дагъусттан гьунар бусса оьрчIал чулухагу хъинну авадансса бушиврий, ми Дагъусттаннал, Аьра­сатнал ва Щаллагу Дунияллул бучIантIимур бушиврий, миннал чIарав бацIлан, ми хьхьичIунмай буллан аьркиншиврий.
ХIадур бувссар
Бадрижамал Аьлиевал