Лакку кказит-журнал шяравун бучIаннин ялугьлагьисса чIявусса халкь хьунабакьай ттун жулла лакрал щархъаву. ЦIусса наз­мурдал, хавардал лу буккавурив цила багьайкунсса байранну шай Лакку кIану, цала миллат ххиранан. Хъинну дакI ххари хьунни ва ххуллух ттула дус М. Давыдовлул ттунма «ХхуллуцIсса щаращи» тIисса хъунбакъасса назмурдал лу пишкаш баврия. Луттирал автор бур Тамара Ибрагьимова. Ттунна ччянира бавсса цIа, кIулсса фамилия. Лу тIитIайхту итталун дагьлагьисса шакил. Амма циваннив хьхьичIун бурувгсса. Луттираву бумур, ванил чивчумур бакъахьуви Тамара бакI хьхьичIун дутан буллалисса. ТIитIав цалчинмур назму дусса чIапIи. Назму дур «Арснахь» тIисса. ЦIунилгу чIапIи кIура даен дан багьунни, шакилданул хIисав хъиннура дан. Щалава кьянкьану къаавчура ккалай. Ттун хъинну къаччан бикIан най бия, агарда дакIнин асар хьунсса цIанилу, ялттувасса, мяъна куртI дакъасса ххару бухьурча. Буккав цалчинсса мукьва хха.

Ччясса интнил ххяххабаргъ,
Ттул оьрмулий дирзсса аргъ,
Инара арс, инара
Му хъамамабитара.

Цукун ххаллилсса лащан баву дурну дур Тамарал. Ччясса интнил ххяххабаргъ. КъакIулли. Бюхъай цумур-бунугу ца гьунар бусса шаэрнал цуппа лащан бувну бикIангу хьхьичIва ччясса интнил ххя­ххабургъиха, аммарив ниттил арс ххяххабургъиха лащан аву ххишала бакъа тIайласса бур. Цалчин бувккусса мукьвагу ххуттал ттувун аьжаивсса шавкь ва шаэрнал гьунарданийн мукIру хьунсса гъира бувтунни.
Къачичин къашай кIилчин­мур мукьвагу хха. Вара назмулувасса.

…Оьрмугу аьтара бур
Зумардайн ххяхлахисса,
Пикри бакъа ша лавснал
Шаттирдайн хъапатIисса…

Лу бур оьрчIан куну итабавкьу­сса. Ниттин арс хьхьичI авцIукун, цама цу ххал шайссар. Ттуннив ва луттираву чивчусса Тамара Ибрагьимовал жуж байбихьлахьисса «Арснахь» тIисса назму чIалай дур ца оьрчIал назмуну дакъа, хъуниминнан, хаснува жагьилтуран хас дуван аьркинсса назмуну.

…Зунтту лахIан банна тIий
ХьхьичIунгу маххяхларда,
БакIлавай ачин багьний
Махъунгу маагьларда.

Вай махъру учин бучIир аькьлулийн кIункIу бан мюрщинахьгу, жагьилнахьгу, хъунанахьгу. Чансса бурив, хаснува вай махъсса шиннардий, бяйкьлакьисса жагьилтал, хьхьичIун ххяхлахисса, гьарзад цакуну дуван ччисса. Хъиннува чIявусса бур, жагьилтал бакъассагу, оьрмулул тамансса шинну хьуссагума, махъун багьлагьисса, цала кIану лякъин къахъанахъисса.
Тамаран щархъал тагьар ххуйну кIулну дур, шагьрулул оьрму чIалай бур. Тамарайн, ттуйн вих бакъами, курчIил къавхьуну, щархъавух букки, шагьрулул кучардал хIисав дувара. Ххишала бакъа гужсса асар хьунсса кIану бур вава «Арснахь» тIисса наз­мулуву. ХIисав дара цукун цува лявхъу кIану, буттал билаят ххира буллай дур нину оьрчIан.

Даиман дакIний дити
ЧIирисса шяравалу,
Арс, кIиккурича ларгсса
Вил ппухълуннал оьрчIшиву.

ХIисав дара, вай махъру так ца оьрчIахьрив учин аьркинсса. Ттун кIулли чIявусса инсантал оьрчIал оьрчIру хьусса, цивппа лявхъусса шяравун цалагу ша къабивзсса. Бюхъай Тамаран мукунминнаву оьрчIал кIулши чIалай, ми оьрчIан ккалли буллай, мюрщи оьрчIащал лявхъу кIану хъамабивтнангу хас дуллай бикIан цила «Арснахь» тIисса наз­му. Вагу шаэршиврул хъунмасса гьунар бушиву ттун чIалай бур. Гъалгъа къабуван къахьунссар кIилчинмур назмулиягу.

«Вяркъу»
Назмулул цIа ялттурасса дур
…Хъамаличу нанисса
Хавар лавсун бувкIхьурча,
Нагу вин мушттуллугъран
Нисирал чIутI булунна.

ЦIанасса оьрчIан чIявучин къакIулссар, хьхьичIва бявакъул­ттия вяркъу вярхъ тIий бухьурчан, га ци-бунугу ца ххарисса хавар лавсун бувкIссар тIун бикIайва. Цила назмулуву Тамара, хьхьичIрасса чIунну дакIнийн дичаврищал архIал, жула буттахъал аьдатругу цIуницIа гьаз дуллай бур. Мудангу жула зунттаву хъамаллурал хIурмат хъунмасса бивкIшиву буслай бур. Хъамаличуная зунттал инсантал мудангу рязийшиву бусаврищал, ялун нанисса оьрчIахь хъамал лайкьну кьамул баву жула бурж бушиву буслай бур. Тарбиялуя гъалгъа тIутIаву мюрщинахь, жагьилнахь, хъунанахь му хIакьсса шаэрнал бурж бушиву чIалай бур чIавасса жужрал залуннан. ТIабиаьт зия хьуну най дур. Жула зунттаву хьхьичIва бивкIсса лелуххант чан хьунни, цаппарасса бакъава хьунни, хьхьичIра ххяхлай диркIсса урттугу, тIутIивгу махъсса шиннардий ххялтIа дурккунни. Укунсса иширттал сававгу кув чIумал инсан хъанай ушиву шаэрнан чIалай бур.

…Шамуй, да къавкъин Шамуй
Лиянмур лякъай каруй,
Ми кару ччуй диркIхьурча
Дуркния гъургъа чарийх.

Цукун бувчIинну, къавкъиннангу асар хьунну аьй дуллай бур Тамара тIабиаьт зия дуллалисса Шамсуй. Бигьану бикIанссия, агарда цавай мюрщисса Шамсухъул бивкIссания тIабиаьт зия дувулт. Хъунисса, хъунив хьуссагу бурхха ччарчан мурхьру бичлай, ччарчан щаращив лиллай, ччарчагу, авчитал хьуну, лелуххант ва жанаварт кьатI буллай. Шамсухъаяр архну лавгун бакъар жагьилсса ва бугьарасса инсап дакъулт.

…МарцI ххювардай дукланна
Хьунна хъинсса агроном,
Дюкьан данна багъравун
Щаллара шяравалу…

Ххуйшиву, хъиншиву, хъуншиву чIавасса дуклаки оьрчIал пик­рилул. Цалла шяравалу дакIний душиву, ганиха цукун ци хIурмат буван хъинавав тIий ушиву, ва дакъарив цIанасса чIумул жура оьрчIаву тарбия дуллан аьркинмур ва хъинмур. Жунма ва пикри дакIнийн бутлай бур Тамара Ибрагьимова. Ва тIий бур, къааьркинссар шагьрурдайх ва цайми хIукуматирттайх шярайх буклан, жула буттал кIану ххаллил бавур жула гьунар тIий. Тамаращал нагу хъинну рязира. Гьарица духIин дума ххари хьунсса, Буттал кIанттул пикри бума хъун уллали­сса махъру бур «Хияллаву» тIисса назмулуву.

Хияллаву шара
Лаккуй, шяраву,
Ттула оьрчIшивручIа
Бунагь бакъасса.

Вай пасихIсса, Лакку билаят­рай дакI цIуцIисса мукъурттил ттун цамургу лакку хъамитайпа, хха бюхттулсса шаэр, ТтурчIиясса Шагьмарданова ПатIимат дакIнийн бувтунни. КIивагу ххаллилсса лакку душругу цанниха ца хъинну лав­хьхьу бивзунни.

…Агь, ттул Лакку кIануй,
Буллугъсса улчай,
Мудан дакIнивусса
Шадшиврул хъюлчай…

Лакку кIану, Буттал шяравалу, миччар дайдишайсса Ватан, вайннухар къуллугъ ва хIурматгу бикIан аьркинсса. Хъинну ххарину дуккав «Инт дуркIунни» тIисса назму. ТIабиаьт чIумущал даххана шаву, интнищал лагмара гьарзад цIудуккаву асар хьунну чIалачIи дуван бювхъуну бур Тамараща. Интнил ххуйшиву чIалачIи дуван бюхъаву бюхъай цила дакIнил ххуйшиврул гьунаргу бикIан. ДакI ххуйдакъасса инсаннаща, ваксса асар хьунну интнил сурат чIалачIи дуван шайссарив.

…Хъуруннайсса марххала
Щинайн кIура бавунни,
Дараччи тIутIал къупру
Аьрщарава ливчунни.

Так гьарзад асар шайнан дакъа къадурчIай дараччи тIутIул нахIушиву. Ва тIутIуву бур цалчин­сса гъилисса асардугу, дакI ххари дуллалисса хияллугу, ванищал дур ларгсса оьрчIшивугу, мудан дакIнийсса, жагьилшиврул асардугу бухкъалагайсса. Ттун Тамара Ибрагьимовал шеърирдугу ца чулуха бувккума ххари уллалисса, пикри бума рахIат уллалисса, дараччи тIутIул кунна дакI тирх учин дуллалисса назмурдуну чIалай бур. Амма ца хъуннасса личIишивугу дур дараччи тIутIувугу, Тамарал назмурдавугу «Дараччи» тIутIи ца пархгу куну ччяни дакъа шай, цIунилгу дучIан. Тамарал наз­мурдурив, ттун чIалачIиссаксса, дакъа хьун най дакъар. Умудгу бур, гьарца интту зунттал сунну дараччи тIутIал щапI учайсса кунна, чIяруну дукланшиврийн Тамара Ибрагьимовал назмурду. На къаацIланна гьарцагу ва хъунма бакъасса жужравусса назмулий. Буккултран ва жуж бакIрайн багьаву тIайлабацIу бушиврий на вихну ура.
Инсан икIай цал хьунаавкьуну хъунмасса асар биян бувсса, ччяни дакIнийн агьлагьисса. Мукунсса инсаннащал хьунаакьаву, цуксса оьрму бувтун бухьурчагу, ца хайр бусса, ци-бунугу цIусса зад лавхьхьусса дарсну бацIай. Ттун ккавккунни Тамара Ибрагьимова «Лицом к смерти» тIисса М. Давыдовлул луттирал презентация дуллалисса кIанай. М. Давыдовлул: «Вагу жула цIуну нанисса, уттинин личIину машгьур къавхьусса, амма ляличIисса гьунар бусса шаэрди», — увкукун, на, къакIула циванъяв, най уна вих хьура ттула хьхьичI бунияла гьунар бусса, оьрму бувчIусса, оьмур ва хъинмур личIи бан бюхъайсса лакку душ бушиврийн. Ца ссятраварив мукIру хьура назму чичаву дакъасса, цаманал чивчумунил ва цаманал гьунарданул хIурмат байсса, циламур мукъулгу заллушиву дан бюхъайсса, яла-яларив цуппа бумур кIану ххаллил бувайсса инсаннащал нава дус хьушиврий. Хъиннува ххари хьура ва уттинин личIину кIулну къабивкIсса шаэрнал Лакку кIанттухсса ччаврил марцIшиврий, Буттал щарнихсса хIурмат хъунмашиврий. Вихну ура Тамара Ибрагьимова кутIасса чIумуй машгьур хьунтIишиврийн.
ТIайлабацIу вин, Тамара Ибрагьимовай!
Даниял Магьдиев