МахIачкъалаллал цIусса каялувчи ивтун махъ хъуншагьрулул органнаву байбивхьунни зузалт баххана буллай. Апрельданий баххана бунни районнал администрациярттал бакIчитал. Миннувасса ца – Кировуллал райондалул щаллу бан аьркинсса масъаларттая ва планная жу ихтилат барду му райондалул бакIчинал кIанайма СалихI Сагидовлущал.
— СалихI Камалович, ина райондалул бакIчину ивтун махъ зул администрациялий дахханашивуртту хьунни. Бусила миннуя.
— Мяйжанссар, майрал байранная махъ жу зузалтращал кIул барду райондалул цIусса хъиривчутал ва бакIчинал кумагчи. ЦIусса хъиривчуну ивтссар райондалул ЖКХ-лул отделданул хъунаману зий ивкIсса МахIаммад Юсупов, ЖКХ-лул масъалартталсса буллантIиссар тамансса давуртту канилух дурксса Шайх ГьитIиновлул. Мукуна райондалул бакIчинал хъиривчуну увкIссар Кировуллал райондалул бакIчинал кумагчину зий ивкIсса МахIаммадзакир Закарияев, ванал кIанайн увкIссар ЦIуссалакрал райондалул бакIчинал кумагчину зий ивкIсса Абакар Къапланов.
— Ина къуллугърай авцIуну махъ барз хьунни. ЧIун хъуннасса къаларгнугу, цумур ххуллийх ачинссарив, цукунсса масъалартту щаллу булланссарив цалчин ярглий кIулну бухьунссархха. Цукунсса захIматшивуртту чIалай дур му ххуллий?
— Цалчин ярглий жу щаллу булланну кIанттул жяматрал оьрму бигьа баврин хасъсса, учиннуча, дузалшиннал масъалартту. ЗахIматнийн багьсса масъалартту тамансса бур – дуккаврил учреждениярттая тIайла хьуну, щинал щаллу баврил масъаларттайн биянцIа. Мунияту цалчин ярглий жу цалчинма-цалчин щаллу булланну ЖКХ-лул масъалартту. Му чулуха иш-тагьар захIматсса дур. Масалдаран, Ленинккантлив биялсса бакъар «Скорая помощьрал» машинартту. Цалсса лякъин багьлай бур ца машина. Микку аьркинну бур шагьрулул бакIчинал кумаг. Ганал жун кумаг бан бакIрайн лавсунни.
— Поселокирттай иш-тагьар цукунсса дур?
— Тиккугу буруккинтту бансса ишру гьаксса бур. Масалдаран, тава Ленинккантлив 820 дуклаки оьрчI усса школалий дакъар спортрал площадка. На тапшур бував ччясса ппурттуву му масъала чулийн буккан бан. Семендердай захIматнийн багьну бур цIинцI-ччюрк дукьаврил масъала. Тиккусса халкьуннал цIинцI-ччюрк ххуллийн дичайсса дур. Мукунми тIайла ххуллийн буцлай, мютIи бан захIмат хъанай бур. Тиккува захIматну бур «Кавказ» ххуллу чаннал щаллу баврилмургу масъала.
Муниха зий буссар Пятигорск шагьру, амма жугу хIарачат буллай буру му масъала щаллу буван.
Красноармейскалий аьрщарал инвентаризация дан аьркинни. ЗахIматнийн багьсса масъалартту Щамххаллайгу бур, тикку поселокрал вивсса ххуллурду кьабан аьркинни. Ми давурттугу жура дуллай буру.
Чечен жазира 60 киловаттрал генераторданул щаллу бан аьркинну бур. Га машан ласаву захIматсса иш бакъар, амма ганил гьантлий 90 литра ччуччиялул харж дайссар, мигу хъанахъиссар сайки 3000 къуруш ца кьинилун. Бюджетрах буругарча, ми чIярусса арцур. Амма масъала щаллу буван аьркинни.
— Кугьна хьусса, лекьавайсса къатрава халкь бизан баврил хIакъираву ци учинна?
— Шагьрулул каялувчи цIана унгу-унгуну зий ур му масъалалуха. Ттул пикрилий, яла гъансса чIумуву масъала чулийн буккан бан бюхъанссар. Гьашину бизан банминнал сияхIраву бур 22 къатта – 260 квартира. Миннувату кьутIирду чирчуну дур 170 квартиралул залуннал, цIусса къатри дансса аьрщив личIи дурну дур. Утти аьркинни так ялапар хъанахъиминнащал кьутIи дан бизан рязишиврул хIакъираву. КIира шинавату къатри дантIиссар, инсанталгу бизан бантIиссар.
— СалихI Камалович, Кировуллал район МахIачкъалаллал яла хъунмур район дур, зучIа КФХ-рду (фермертурал хозяйствартту) духьунссархха?
— ЦIана райондалий дур 1063 сияхIрайн ларсъсса хозяйство. Миннувату жучIа учетрай дур 100. ЛирчIми цинярда зий дур кьюлтIну. Тайннул хIакъираву цимилвагу чивчуссар административ протоколлу, амма тайннул каялувчитуран хайрну бур учетрай бацIаяр 500 къуруш аькIлул дулун. Утти миннащал кьянкьасса ххуллу ласун багьанссар.
Гянджеви ХIажиталаев
ХIадур бувссар
ХI. Аьдиловлул
