Дагъусттаннал гимн даххана дуллалиссар тIисса аваза багьну бур жучIава. Гьаксса къахъина: цIакь дурсса хIукуматрал символика хIурматрай, сахълану ядан аьркинссар.

Гимнрал автор щалла дуниялл­лийх цIа машгьур хьусса, дагъус­ттаннал арс Ширвани Чаллаеври, ацIа яла гьунар бума композиторналуксса даву дурну, цалва ляличIисса музыкалул Дагъусттангу, Аьрасатгу, Щалла дуниялгу хIайран ва махIаттал дурсса жулва пахру!
Ттун ччала хьуну, кьувтIунни, бюхттулсса композиторнал цIания хъисрагу адав къархьуну, гимнрал диялдакъашивурттая аваза сукку баву. Мурив жулла обществалул чара бакъамур, хьхьичIунмур мурад?
Ш. Чаллаев ур мэтр. Мунащал архIал ацIансса цу уссар жула? Отличныйну Дагъусттаннал музучилище, Москавуллал Чайковскийл цIанийсса консерватория, гиккува аспирантура къуртал бувссар мунал. Ширванинахь дарсру дирхьуссар щалла дунияллун бусравсса Шостоковичлул, Леманнул, Тихоновлул ва м.ц. Мунал гьунардая пахрулий бивкIссар циняв педагогтал.
Ширвани Рамазанович бюх­ттулсса даражалул композитор, профессионал, цалла даврил усттар. Мунийн щища щак учин бюхъай­ссар?
Гимнрал хIакъиравусса хаварду ттун къабагьайсса хавардуну чIалай бур. Пахру бан кIанай, циванни, щилчIав къабувсса хъинбала респуб­ликалун бувсса, цIа дурксса композиторнан цIун хьун бан, дакIнин щун бан? ХIайп!
Ци чарабакъашиву дуссар цIана ххаллилсса гимн зия дан? Цу уссар мунияр ххуйсса гимн чичаврил заллу? Ци диялдакъашивурттур муниву дусса? Гьарца миллатрал цалла-цалла ххаллилсса гимнру дур. Амма Ширванинал гимнраву ляваличIисса гьавас, гуж бур. Гимн­раясса тIалавшиннарду ттун жулла гимнраву щаллуну чIалай дур.
Цалчин, гимн язи дугьлай хъуннасса конкурс диркIссар. Хъинну хъирив лавнуя Ширвани Чаллаев гимн язи дургьусса. Му ишираву композиторнан кумаг бансса «махъ чIира» къабивкIссар. Цал пагьму-гьунарди ххув хьусса. КIилчин, жулла гимнраву му жанралул кьанунну, тIалавшиннарду тIайлану ва багьайсса куццуй биттур дурну дур: торжественность, шадшиву, патетичность, гьа­лакшиву, гьулусаншиву, хьхьи­чIунмай кIункIу тIутIаву. Ша­милчин, ттун муниву ххал шай Дагъусттаннал яргсса тарих: Пар­тIу ПатIима, Хан Муртаза­аьли, Шамил, душмантурал оьттул нехру нани дурну, Ватан ду­рурччусса. ХьхьичI бацIай граж­дан ва Буттал КIанттул цIа­нийсса дяъвилул Вирттал, ххаллилсса аьлимтал, чичулт, пагьламантал, зузалт ва хъузалт, космонавтътал.
Цукунни хIисав къахъанахъисса бюхттулсса зунттурду, майдансса арду, някI хьхьирил щатIив, зун­ттал чувнал ас-ламус? Миннуяр ххишалагу муниву ттун баллай бур оьрчIнийва ххира хьусса, караматсса Ширванинал балай. Махъ бакъа, жулла гимн дур гужсса, тIанкI куну вичIидирхьума изан уллалисса, авторная пахру дакIнивун бутлатисса.
АцIнияхъайсса операрду щил чивчуссар? Дагъусттаннайн кIийлва бувкIссар магьлувун багьсса Н. Сацлул театр «Маугли» бишин; Ленинградуллал театрданул жучIава бивхьуссар опера «Горцы». Ширванинал жунма опера цирив ккаккан бувссар.
Ш. Чаллаев кIийла Дагъусттаннал паччахIлугърал, Аьрасатнал хIукуматрал премиялул, Аьрасатнал паччахIлугърал премиялул лауреатри. Яла-яла, интернационалист ва патриотри.
Жагьилсса чIумал бургъилухгу, гъаралухгу, аькъавай, кIири шавай, ахьтта щалва Дагъусттан кIувчIуну, миллат личIи къабувну, зунттаву яхъанахъисса халкьуннал 100 балай бавтIун, нотардугу чирчуну, чув мяш хьунсса луттирду итабавкьуссар. Муна вин багьа бакъасса бахшиш гьарца миллатран.
На мукIруну бура, виричусса ва бюхттулсса цIанил заллу Ш. Чаллаевлул му тIааьн бакъасса хавар кьюлтI чинсса ссавур диял хьуншиврий. Ширвани Рамазановичлул жува мукьахунмайгу ххари булланшиврий. Цалва гьунар, тIайлашиву, аькьлу, инсаншиву ххи хьуну, марцIсса композиторнал захIматрал аьйрду яла ласунссар тIий.
Жун вия пахру буссар, ххаллил­сса миллатрал арс! ЦIуллушиву чIа тIий бура вин.
ПатIимат Фаталиева,
педагог