Ларгсса нюжмардий «Фейсбукраву» дурккунни «Кавказская политика» кказитраясса ссылка «Дагъусттаннал паччахIлугърал гимн даххана дансса пикри ххалбигьин» ДР-лул Халкьуннал Мажлисрал хъунама Хизри Шихсаидовлул тапшур буллалисса Республикалул БакIчинал хIукму. Апрель зурул 28 — нний бувксса.
Ва пикрилул ялув «Фейсбукраву» гьалаксса дискуссия дур. Официальныйсса хIукму – Указ ттигу кьамул бувну бакъахьурчагу, ва масъалалул чIарах буккан миллатрал кказитращагу къабювхъунни. Цанчирча гимнрал хIакъиравусса хаварду сайки дачIи шинал хьхьичIва сукку бувну, ттининнин щяв багьлай бакъахьувкун. Муния цIухлай редакциялийн оьвтIутIиссагу лак бакъасса цайми миллатирттал инсанталгу чIявур.

Генийтал щях бишлан багьарча

«Поручение — му хIукму ба­къар. ХIукму цар бусса, законодательствалул кьамул був­сса, гимн цIакь дурну душивриясса. Ттун ттулвамур пикри буслан ттигу ччяссар. Му даххана дансса хIукму щаллуну кьамул барчанни на ттулва пикрии бусантIисса», — увкунни Аьра­сатнал Конституцион суд­рал судья ХIадис ХIажиевлул.
ДР-лул Халкьуннал Мажлисрал депутат Камил Давдиевлулгу бувсунни гимнрал хIакъираву пикрирду личIи-личIисса бушиву, амма му ттигу депутатътурал собраниялул повесткалий бишин бувашиву.
Гихунмаймур хIукму цукун­сса кьамул барчагу, ттунгу лап махIаттал бивзунни ва суал гьаз бан сивсусса инсантал буккаву.
Ци чара бакъашиву ду­ссар хIакьину жунна 18 шинал хьхьичI конкурсрал гьанулий кьамул дурну, мунил хъиривгу чIявусса бястру ва ххалбигьавуртту дурхIуну кьамул дурну, 11 шинал хьхьичI дайкун цIакь дурсса гимн даххана дуллан. Ци диялдакъашивуртту ляркъуссар утти муниву, цуми тIалавшиннардацIун къадаркьуну дуссар? Ча агьссар музыкалия мукссава за бувчIусса инсан?
Ттунгу ххуйну дакIний дур гимн кьамул дуллалисса чIун. Ширвани Чаллаевлул дунияллул магьирлугърал ареналий ци кIану бугьлагьиссарив ттунма тани, хIакьину кунма, кIулну къабивкIхьурчагу, ттул — кьура шин къархьусса душнил, аькьлу-кIулшилуву хIасул хьуна жулла цIанасса гимнрачIан дияй­сса гайми дакъашиву. Циван? Конкурс нанисса къачIивисса му­тталий гьарца хьхьуну «Дагестан» программалия махъ руцайва конкурсрайн ккаккан дурсса макьанну. Цаппарассалийла ккаккан увна Ширвани Чаллаев цалла макьандалун гьарцагу ноталул комментариярду дуллай. «ЦIанакул ссавнийх барзу левххун най буссар, шикку хъами къурув зий буссар, ва тIурча неххал ххурххур!». Гьарцагу ноталуву мяъна, мурад, гьарцагу ноталуву миллатрал кьадар бу­сса авадан­сса, загълунсса музыка! Композиторнал цала мукъурттийну учин «жуярда бюхттулсса макьанну». Цукун­ссар яла гимн дикIан аьркинсса? Буссарив мукун мяъна-мурадрал вибувцIусса музыка цамур? Бушиву къакIулли – та конкурс наниссаксса хIаллай цалвамур музыкалун щилчIав мукунсса комментариярду къадуллуна. ХIайп цимурца лаласун къабювхъусса!
Амма 14 шинал дянив бюхттулсса композиторнащал зузисса манзилданий ттун бувчIунни мунал музыкалуву щалва Дагъусттаннал тарих бушиву. ТIайлассар, бур лаласун захIматсса. Амма — оьтту-ттурчIавун, няравун буххайсса, чурххал гьарцагу базулун асар шайсса, бюххайсса. Ца хъатIуй Ширвани Чаллаев балай тIутIисса чIумал хъуна­сса шаэр Расул ХIамзатовлул увкуну бия: «Гьар, ацIу! Дукра канакисса гьиссилу канивура микIларчIунни. Вил балайрдал на пикрирдавун утара», — куну. Ва бакъарив музыкалул гуж!?
Щалла савав гимнрал музыка «похоронкану» баллалавурив? Цукунсса дикIан аьркинссар, чIиникIрал ссиличIайн кунма жагьилтал – щаллусса ник, билаятрал ялун бучIантIимур – кьатI буллалисса республикалул гимн?
«Ци ишрив къакIулли — оьттул гьухъа хьхьицIлацIисса кунмасса асар бияй дагъус­ттаннал халкьуннал балайрдах вичIидихьлахьисса чIумал», — учай композиторнал цалагу. Му оьттул гьухъа хьхьицIлай бакъарув жува хIакьину? ЧIявусса дяъвирду ккавксса, бувхIусса, хIакьинугу чаривсса гужирдал бас буллалисса дагъусттаннал халкьуннал лишан цукунссар дикIан аьркинсса? Агарда, уккар­ча цу-унугу зунсса кIантту бакъа, оьрмулул вайварттай бавцIуну бан-бит бакъашиврул вацIравух вайлул хьуну лавгсса жагьилтал зана бувну, дунил — духларгсса шяраваллил хозяйство гьаз дуллан шавкь рутансса гимн чичинсса композитор, ттул цукунчIавсса щак бакъар му макьан республикалул гимну кьамул дан жула хъунасса композитор цува цалчин уккантIишиврийн. Цанчирча мунал щалла творчество билаятрал лавгмунил ва бучIантIимунил къювулул дурччусса дуну тIий.
Гьай-гьай, ттун хъинну къа­ччан бивкIунни миллатрал пахрулунсса ттула шяравучунал гимн дукьан дан-къадан тIисса хаварду. Амма на так ца муний бакъара аьтIий.
Дагъусттаннал ПаччахI­лугърал премиялул кIийла лауреат, Аьрасатнал паччахIлугърал премиялул лауреат, Аьрасатнал ХIукуматрал премиялул лауреат – чIявусса буссарив жула ми? Дунияллул бюхттулсса шаэртурал, чичултрал произведенияртту музыкалуву бивхьусса, щаллагу дунияллун агьамсса инсаният­рал тема гьаз дуллалисса 10 машгьурсса опералул автор — Совет Союзралгу, Аьрасатналгу тарихран кIулссарив ялагу цама?
Генийтал щях бишлан багьарча, дунияллул лагрулул гьунарду ккуччу буллалисса кIанттайн биярча, цукунсса бурвавли ялун нанимур никирал кьисмат? Миннахсса суру хIакьинува хIадур бан багьанссар.
Ци иш хьхьичIун багьну бивкIссарив, Ширвани Чаллаев Москавлив консерваториялувун уххан чIал хьуну, жагьилсса композиторнаву дуниял хIайран дансса гьунар архниява хIисав хьусса бюхттулсса Шостаковичлул, ганаву гъира къалещан буруккинттарай, танисса республикалул бакIчи АьбдурахIман Данияловлуйн оьвкуну бур: «Ва жагьилнал гьунарданун лайкьсса даву дулара», — куну. Данияловлул кабинетравун ув­ххун: «На Ширвани Чаллаев ура», — учайхту: «Ттун кIулли. ТтучIан цала Шостаковичлул оьвкунни. Ина итлатиссара дахьва пединститутраву тIивтIусса музыкалул факультетрал деканну», — увкуну бур. КутIану учин, Ширвани Чаллаевлул цIаний тIивтIуну бур щаллусса факультет, му факультетрай дуклансса гьунар бусса жагьилтал Дагъусттаннай чIявушивугу хIисавравун ларсун. Муксса бюхттулсса бивкIун бур гьунарданул кьиматгу, ялун нанисса жагьилтурахсса къула­гъасгу. Гьай, балики, укканхьуви ттигу гимн даххана даврияр хьхьичIххуттай бишинсса масъала жула цамур буссар — оьттул тIюпандалухьхьун биривсса жагьилтал ххассал бан, акъарив гимн щил макьандалий кьамул дарчагу, мунихун лавай бизан­сса наслу къаличIавай бурча учинсса, аькьлу-кIулши дусса аькьилтал.

P.S. Макьала хIадур дуллали­ссаксса хIаллай щак-щуклий буссияв мяйжансса бурвав вай хаварду, бакъарвав, тIий. Кказит буккан хьхьичIмур кьини Халкьуннал Мажлисрал депутат Камил Давдиевлулгу: «Ттигу му суал повесткалий бишин бувассар», — увкукун. Хъиривмур кьини, яни лахьхьу, ИТАР ТАСС-рай дурккунни информация Халкьуннал Мажлисрал ирглийсса сессиялий Республикалул БакIчи Рамазан АьбдуллатIиповлул депутатътурайн тапшур бувшиву композитортал ва шаэрталгу кIункIу бувну, республикалул гимн даххана давриха зун. Ванал кIицI лавгун бур Гимн, халкьуннавун гьавас бутлатисса, гьунарданийн хъит чин уллалисса, бюхттулсса патриотизмалул музыкану хъанахъишиву.
Цитата: «Гимн хьун аьркинссар жулва халкьуннал рухI чIалачIи дуллалисса дагьанину. Му бакъассагу, гимн дикIан аьркинссар актуальныйссагу.
Гимн даххана дансса хIуччану ва гьануну лавсун бур 3 шинал хьхьичIва дунияллия лавгсса жяматийсса деятель Суракьат Асиятиловлул махъру: «Республикалул гимн тIутIисса чIумал, на ттуна нава Дагъусттаннал барзуну чIалан къаикIара», — тIисса.
Шикку макьалалувун ххи бансса пикрирдугу хIасул хьунни, амма тти чIун дакъар. Умуд бур халкьуннал цалва-цалвами пикрирду бусанссар тIисса.
Зулайхат Тахакьаева

————————————

Туруллайн ка къадияйссар

«Фейсбукирттаву» ххалбигьайссарив мукунсса масъалартту? ХьхьичIва-хьхьичI ттуй – авторнай, бакъарив бишин аьркинсса, ва сававрай да­ххана дан багьлай бур, куну. На ци учиви мунихун. Ттул макьан ххуйссарча, мунийн ка малаяру ягу къаххуйссарча, дукьан дара, учивив?
Му даххана дан дакIнийн багьнахь цIуххара. Ина цура? Вихьхьун щил дуллур му даххана дансса ихтияр? Ци хIучча буссар му даххана дансса? – куну.
На му макьан щихачIав къадацав, базаллуву машан къаласав. Баян бувну бия конкурс. Чичав нагу, цимирагу ацIра шинал лажиндарай Дагъусттаннал цинявппагу миллатирттал щархъавух уклай, миннал халкьуннал балайрду лавхьхьуну, миву ттунма чIалачIисса Дагъусттан кка­ккан буллалисса музыка. Гьай-гьай, ттун кIулли ттулва музыка гьарцаннан ххуй къабизайшиву, гьарцаннан къабувчIайшиву. Инсантал жура-журасса буссар – цаннан щин ххуй дизай, ваманан – хIан. Ттуруллал ранггу бюхъай гьарцаннан ххуй къадизайсса дикIан, амма кIайннул ранг даххана дансса къауккантIиссар, цанчирча кIайннуйн ка къадиявай тIий. Музыка ва литературагу ттуруллал даражалийсса затрур.
Ширвани Чаллаев

—————————————

Къалайкьссар!
КъабучIиссар!

Дагъусттаннал гимн даххана давриясса ттул пикри?
ДакIний бур республикалул гимн кьамул даврил ялув да­гъусттаннал жяматравусса ва парламентравусса гьалаксса ххалбигьавуртту. Танийсса депутатътурал ккурандалувугу закондалул хьхьичI цалла дурсса даврил жуав дулун бюхъайсса депутатътал бия, ттун дакIнийссаксса. Конкурсрал гьанулий кьамул бувссар, ттизаманнул хъунасса композитор ва музыкант Ширвани Чаллаевлул музыка. Щак тIий ура Ширвани Чаллаевлухь цахьва къацIувххуну гимн даххана ягу дукьан дан цукунчIавсса я моральныйсса, я юридический­сса ихтияр жухьра душиврийн. Акъарив му так ца авторнайх дакъассагу, му гимн кьамул дур­сса депутатътуралгу «чIаврдайх» рищавуну хьунтIиссар.
ДакIнийн бутанну, Аьрасатнал Гимн кьамул дуллалисса чIумал билаятрал Президент Владимир Путиннул адав дусса тIул. Ганал маслихIат ккав­ккуна Сергей Михалковлущал, либералтурал аьлагъужалухгу къаурувгун, цIакь дуруна чан-кьанну даххана дурсса бюхттул­сса Совет Союзрал Гимн. Ва ялагу дакIнийн бутанну хъунасса шаэр Расул ХIамзатовлул цалва луттираву ишла бувсса: «Агарда жува лавгмунивун ттупанграва битарча, ялун бучIантIимунил жуйнма ттуплива битантIиссар», — тIисса АбутIалиб Гъапуровлул бивкIу бакъасса махъру.
Къалайкьссар, къабучIиссар Конституциялущал, Гимнращал, Ттугълищал, Тарихращал, Биографиялущал аьлахълан. Му аькьил­шиву дакъарча, оьрчIшивур. Агарда, камилсса пикрилухгу вичIи къадирхьуну, цIанасса Гимн ккуччу дарча, коррупциялиясса, тухумру лащу-щаллу бавриясса байт цIусса Гимнраву ххуйну бакьинссия.
«Заннал инсаннан ци-бунугу бан ччан бикIарча, га аькьлулуцIа айссар», — увкуну бур Софоклул жула эралийн бияннин 442 шинал хьхьичIва.
Щалва иш мукъурттиву бухьурча, махъ бакъа, аьжаив бизлай бур Ширвани Чаллаевлул музыкалун махъру чичинсса шаэр Дагъусттаннай акъашиву. БучIир Гимнрансса мукъурттил конкурс баян бан. Ттун ттунма хъинну ххуй бизай Расул ХIамзатовлул Дагъусттаннаха­сса махъру.
МахIаммад
Аьбдулхабиров,
профессор

——————————————-

Жяматрал пикрирду

Лариса ХIажиева, Да­гъусттаннал халкьуннал артистка:
— Гимнрал макьан даххана даврийну щаллу хьун тIий бусса бур утти жулва циняв масъалартту… Гьарзат щаллу хьуну, циняв масъалартту дузал хьуну бухьунссар жучIава, ца къаххуйсса гимн личIаннин. КъакIулссия вай масъаларттал багьана-савав уттинин жулла гимн диркIшиву.
Дунияллийх машгьурсса, хъунасса композиторнал чирчусса, гьакссагу ххуйсса, жулла тIул-тIабиаьтрацIун, тарихрацIун, маданиятрацIун даркьусса гимн дур. Ширванинан кунна лап ххуйну цайминнан кIулшиву къакIулли дагъусттаннал гьарцагу миллатрал макьанну, миннул хасиятру. Муналлихха, щархъа-щархъавух занай, дагъусттаннал миллатирттал халкьуннал макьанну нотардайн ларсъсса. Духларгсса ягу духлагаврил ккурккай диркIсса макьанну цIудуккан дурну, миннун оьрму буллусса. Ширванинал дакъарив дагъусттаннал макьанну хьхьичIра-хьхьичI дунияллул цIанихсса сахIнардай руцлаци бувсса, ца яла гужсса публика миннуй махIаттал-хIайран буллали бувсса.
Ттухь ттухьва машгьурсса композитор Гергиевлул увку­ссар, Дагъусттаннал гимнраяр ххуйсса цамур гимн бавну акъара, куну.
Бюхттулсса композитор Шостаковичлул куну бивкIссар, Дагъусттаннай зунттурду къабивкIссания, Ширванинал макьаннайну ми ляхъан бан бюхъанссия, куну.
Уттигъанну Ширванинал арснал Парижрай дуллусса концертрай жулла гимн бавну махъ, французнал халкь бия тIар махIаттал хьуну, цал гимн тIутIийни халкь куннайн кув хIусут буллалисса, цаннайх ца ришлаши буллалисса куннасса дур, тIий, зул гимн тIурча, жуятува бияла бакъа, ссавнийн гьаз буллалисса куннасса, Заннайн лабизлази буллалисса куннасса дур тIий.
ГимнрацIун махъру бакъар тIутIавугу къабувчIай. Хъинну ххуйсса махъру буссар жула хъунасса шаэр Расул ХIамзатовлул чивчусса. ЦIакь буварача ми шаэрнал Дагъусттанная увкусса махъру.
Дагъусттанлувтал хъинну аькьилсса ва ссавур дан кIулсса халкьри. Ва иширавугу жулва халкь, вайра хасиятру дурур­ччуну, ца хIукмулийн букканссар тIисса умуд бур. Ширванинал макьанну жулва миллатирттал ххаришивугу, къювугу, дакIнил къириятгу дусса макьаннур.

МахIаммад Ссунгъуров, Лакрал райондалул УСЗН-рал хъунама:
— Жулла гимн, кьамул даннин бусравсса халкьуннал ккураннаву ххалгудиргьуну, Республикалул Халкьуннал Мажлисрал кьамул дурсса гимнри. Мунил автор Ширвани Чаллаевгу дунияллийх цIаларгсса композиторди. Ттул пикрилий, гимн даххана дан кьаст лархIусса пикригу щалва ххуйсса пикри бакъар. Гимнрал махъру бакъар тIий бухьурча, Дагъусттанная гьакссагу ххуйсса шеърирду ляхъан бан бюхъан­ссар гьунар бусса шаэртураща.
Совет хIукумат лирну махъ гимн даххана дурну дуссия жула Аьрасатнал билаятрал каялувчитуралгу. «Боже царя храни» тIисса революция хьунниннасса гимн дияв дакIний бакъар. Къакьамул хьунни му жучIара. Зана дурунни гара жунна кIулсса, жулла дакIурдичIан гъансса гимн. ГъалатIирттал хъирив гъалатIру къабуллай, гайннуя жунна дарс хьун аьркинссар.

Качар ХIусайнаева, «Илчи» кказитрал хъунмур редактор:
— Бюхттулсса Ширвани Чаллаевлул чирчусса гимн дакъа цамур макьан республикалул хIукуматрал лишанну чIалай дакъар. Ва гимнрахун пахрулий лавай бигу-бизара. Ванал гимнраву дуну тIий жулва зунттал алвагьшивугу, някI хьхьирил азгъуншивугу. Зунтталчунал яхI-къириятгу, дугъришивугу. Дагъусттаннал дур кусса дуцири рангру ва лишанну. Гьарца гимн­рах вичIидишайнигу хIайранну, ттула шяравучуная пахрулий вичIидишара. Ширванинаяр ххуйсса гимн Да­гъусттаннан щил чичинтIиссар ва щища бюхъантIиссар? Ширвани ур дагъусттаннал макьаннал язи­сса ххазинарду дунияллун баян бувсса хIакьсса зунттал арс.
Гимн даххана данмур масъала бакъа цайми ма­съалартту ба­къарвав жучIава? ДакIнийхтунусса барчаллагь учин кIанай, хъуна­­сса, гьунар бусса инсан кьювкьин-кьадар ан ччан бивкIсса кунмасса иш чIалай бур. Ва гимн цурдагу бусравсса инсантурая сакин був­сса комиссиялул кьамул дурсса гимнри.

Жанна Абуева, профессор, публицист, шаэр:
— Му хаварданул хъинну махIаттал бувунна, тIайлану бусан. Республикалул гимн кьамул дайни, конкурсгу баян бувну, сий дусса ккураннаву ххалгудиргьуну, кьамул дурсса дакъаяв му жучIара. Гимн даххана дан аьркинну бур тIисса пикри дакIнийн багьавува щала лайкьну чIалай бакъар.[pullquote]Дагъусттаннай зунттурду къабивкIссания, Ширванинал макьаннайну ми ля­хъан бан бюхъан­ссия.
Дмитрий Шостакович[/pullquote] Жулла гимн дур гьакссагу битавсса, шадлугъшиву хIасул дуллалисса. Ванияр ххуйсса гимн щил-дунугу чичиншиву ва баян бувсса конкурс духIаншиву къакIулли. Чаллаевлул даражалийсса композиторнал чирчусса гимн жучIара душиврия пахру бикIан аьркинссар.

Рамазан Фаталиев, ДР-лул Композитортурал союзрал председатель:
— Ширвани Чаллаевлул чирчусса гимнрачIан дияйсса цамур гимн ттун чIалай да­къар. Гимн даххана дан аьркин­ссар тIисса хавардугу гьану ба­къасса хавардуну чIалай бур. ХIукуматрал лишан­сса гимнрал макьаннал жанрданул циняргу тIалавшиннарду дусса гимн дур жулла. Дагъусттаннал гимн язи дугьаннин, хасъсса коми­ссиялул ккаккан дурсса цимирагу ятIаправух дурксса макьанни ва. Гимн даххана дан багьлай бур тIисса хавардугу музыкалуву за къабувчIайсса дилетантътурал бачIвасса хаварттан ккалли бавияв.

Миясат Муслимова, ДР-лул печатьрал ва коммуникациярдал министрнал хъиривчу:
— Гимн даххана даврил хIа­къиравусса пикрирду – му резонансъсса ишри. Бяйкьусса пикрирдур. ЗакондалуцIун бакьлакьисса хIучча бикIан аьркин­ссар му хIукмулуву хьхьичIун ласунсса, масалдаран, миллатравун питна бутлатисса, жямат куннайн ку хIусут буллалисса. Дакъархха жулла гимн мукун­сса.
Багьана гимнрансса махъру бакъашивруву бухьурча, макьандалий ци тахсирди. Бу­ссар мунинсса махъру Марина АхIмадовал таржума бувсса Расул ХIамзатовлул махъру. Ми ХIукуматрал кьамул къабаву гимнрал ягу му чирчусса авторнал тахсирдив? Ттигъаннугума ми мукъурттил цIусса таржума дуллуссар Ширвани Чаллаевлул ХIукуматрайн.
Хъунисса пишакартурая сакин хьусса комиссиялул кьамул дурсса гимн дакъарив му. Ци вариант дуссар мунил кIану бугьансса – кIира-шанна ноталийсса макьан? Маршрал журалийсса, дакIнивун бюхттулсса, алвагьсса асарду бутлатисса багьайкунсса гимн, симфониялул жанралийсса. Дунияллий яла ххуймур гимн учай музыкалул хьхьичIунсса пишакартурал Дагъусттаннал гимн­райн. Мунияту, жува цукунчIав къабучIиссар гимн даххана дан битан.

ЦIухху-бусу бувссар
Залму АьбдурахIмановал