Июль зурул 2-нний ттул хъинсса чIаххучунал, 1-мур ЦIувкIратусса Садикьлул арс Уллубиев ХIусайннул, оьрмулул 80 шинни. Ванал сайки щалва оьрму лавгссар колхозрал ва жяматрал ятту-гъаттаралсса буллай, хIухчил ттархь кIунттища хIура къадуваврицIун, гъайтIала аьркинний гъайтIалану, цулуцала аьркинний цулуцалану зий. Цаппара шиннардий зий уссия Ваччав киномеханикнугу. Шяраваллил кIанттай хъинну бучIи лякъайсса пиша цамургу буссар ХIусайннул, ва ххуйсса электрикри, шяраваллил агьулданул учайсса куццуй, усттарсса «монтёрди». Бакъахьунссар шяраву ва къалавхъсса цавагу ттукIрал ттала.
ПатIимат Рамазанова
Уллубихъал ХIусайн мудангу чялишну хIала уххайссар жяматрал оьрмулуву хъанахъисса иширттавухгу. Ванал паргалсса музыкантнал ва балайчинал гьунардугу буссар. Шяравусса хъатIал, хъиншивурттал сий дуван хIарачат бувайссар, цавувасса гьунарду ккаккан буллай. Кулпат ТIутIищал архIал цивппа кунма захIмат ххирану тарбия бувссар арсру ва душру. Вайннал хъунама арс НухI яхъанай ур МахIачкъалалив, армиялия увкIун махъ зий ур строительствалул личIи-личIисса давуртту дуллай. Рамазан тIима арс ва душ Рая, буттал шярава хIура къавхьуну, хIакьинусса кьинигу буттал шяраву ялапар хъанай буссар. Рамазан тамансса шиннардий зий уссия пагьламантурал школалийгу. ПатIима тIимур душгу ЦIувкIравва яхъанай буссия ласнащал, цаппара шиннардил хьхьичI Бабаюртливсса къутандалийн бивзун, гих захIмат буллай, зий буссар.
ХIусайн ва ТIутIи хъярч-махсара ххирасса лас ва щарди. ХIатта бусалардайнгума кIура бавну буссар вайннал хъярчру. Социал сетирдай машгьурну дуссар ХIусайннул ва ТIутIил бала-гьалайрдайсса видеороликругу.
ХIусайн ва ТIутIи, гьай-гьай, ччинал хьурдай учинсса чIаххулли. Мунил чулуха жунгу хьуну бия тIайлабацIу. Шагьрулийн гьансса иш багьни, жул нитти-буттал мудангу къатрал кIуллигу, ризкьи-кьинигу вайннайн-я тапшур дувайсса. Бухлай, буклай, уссурваврал кунма, оьрму бувтссар жул буттал ва ХIусайннул. Щукруркьай, махIла чанна буллай бушиву вайннал ужагърай чирахъ. ХIусайннул ва ТIутIил арсру, душру ккавктари, уссу-ссу ккавксса кунна, шад шай жул дакIру. Ца-цасса ххаришивурттугу дурссар цачIу, ца-цасса кьурчIишивурттугу духIан багьссар. Утти , жува хъунисса хьуну, жулва- жулва оьрчIру хьувкунгума, жу бувхIуну буссару махIлалул лавгзаманнулгу, оьрчIшиврулгу, дакIнийн бичавуртталгу, махIла гюргутIи байсса тяхъашивуртталгу. Дияча царай ххуйсса чIунну! Бияча цавай тяхъасса чIаххул!
КIицI къалавгун битан къахьунссар вайннал арс МахIаммадкьурбан гьунар бусса художник ушивугу. ТIаннуя дурсса ванал скульптурарду ххал хьума хIайранну личIайссия, ванайн хъунмасса хьул-умуд буссия, ваная Дагъусттаннал телевидениялий гъалгъа тIий буссия. Амма, худграф къуртал буварчагу, кьадиртунни МахIаммадкьурбаннул художникнал даву. Гьунар бусса артист унува, Лакрал театрданувун зун оьвтIий бунува, къаязи бувгьунни артистналмур пишагу. Амма, ниттил ва буттал кунма, МахIаммадкьурбаннулгу чIюлу байссар шяраваллил мажлисру. Музыкантътал хIисаврайвагу, дахIалайкьай укун итххявхсса кулпат шяраву бушаву!
Буттауссу ХIусайн, вил юбилей барча дуллай, чIа тIий буру чIярусса цIуллусса шинну! Ттигу ца ацIра шинай личIаннав ина тивталну, хъарая чIиникI хIура къабуванну, кIунттиву хъарас цIакьну дугьанну!
