Дипломру кIунттил бувгьунни

Интнил ахир, гъинтнил цалчинсса нюжмарду дур школа, личIи-личIисса дуккаврил идарартту къуртал бувминнал гихунмай дуклан бурив, зун бурив ххал буллалисса аварасса чIун.
Б. Мурадовал цIанийсса Дагъусттаннал культуралул ва искусствалул колледжраву июньдалул 29-нний хьунни му дуккаврил идара гьашину къуртал бувсса оьрчIан дипломру буллалисса шадлугъ.


Бадрижамал Аьлиева
Гьашину му колледж був­ккушиврул документру канил бувгьунни 69 оьрчIал, миннава 17-ннал колледж къуртал бунни марцIсса ххювардай.
ЯтIул дипломру лавсминнавух ур кIия лакку оьрчIгу: ХIасбулат Татаров («Актерское мастерство» отделение) ва Рамазан МахIаммадов («Инструментальное исполнительство» отделение).

Колледжраву бур личIи-ли­чIисса бутIри (отделенияртту): «Халкьуннал художествалул творчество», «Сольнайсса ва хорданийсса халкьуннал балай» ва м.ц. Колледжрал хIадур бувну, итабавкьунни музыкантътал-инструментъталистал ва социал-культуралул даврил сакиншинначитал. Дипломру лавсунни ванияр 4 шинал хьхьичI тIивтIусса «Актернал искусство» тIисса цIанилусса отделениялул цалчинсса выпускниктуралгу, миннан дуллунни актернал ва преподавательнал квалификация.

Колледжрал директор П. Муртазялиевал барча бунни выпускниктал, чIа увкунни гихунмайгу гьарца дуллалимуниву тIайлабацIу. Барча буллалисса махъру лавхъунни махъсса преподавательтуралгу.
ОьрчIру тарбия ва ду­ккин бавриву захIмат бивхьусса нитти-буттан барчаллагьрал чагъарду буллунни колледжрал каялувшиндарал.

Ва колледжрал выпускниктал чIявуну буххайссар ДГУ-лул культуралул факультетрайн. Ва кьини, дипломру буллалисса шадлугърая махъ, выпускниктал хьунабавкьунни ДГУ-лул культуралул факультетрал декан Нина Аджаматоващал, буллунни мунихьхьун суаллу. Колледжрал ва факультетрал дянив уттигъанну чирчуну дур уртакьшиврий­сса зузаврил кьутIи.