Сайки ххюцIалла шинал хьхьичIва Оьргърал шяраватусса АхIмадхан Абубакардул чивчусса «Магьилул къалиян» тIисса лу лакку мазрайн таржума бувну итабавкьуна. Му лу цуппагу жула мазрайн машгьурсса таржумачи КIямашатусса Аьлиев МахIаммадлул бувцуну бия. МахIаммадлун, лакку маз ххуйну кIулшивруцIун, тамансса цIана жучIава чанну бакъа ягу бувавагу ишла къабуллалисса махъру кIула ва цалла чичрурдаву аьркин байва. (На мукунсса му­къурттих хъинну къулагъас дуллан икIайссияв ва ми ттучIара нани дурсса лакку мукъурттил сияхIрайн ласайссия).

Гьамин, кIа «Магьилул къалияндалуву» ттун ца ттунма къакIулсса шаттаз тIисса махъ хьунабавкьуна: «(къужлул) ….. шаттазрачIасса кIукIлусса цухьлул луттирай къуж дуруна» (л.93). Ихтилат арцул ус­ттарная ва мунал дуссукъатлуя бия. ЧIалай бия шаттаз тIисса махъ усттарнал аьркин бай­сса ца ярагърая бушиву, амма мунил мяъна балжину лаласун бюхълай бакъая. Цахьва, аьпа биву МахIаммадлухь, цIуххингу бакIрай къаавцIунав.
Жулла чичрурдаву, луттирдаву, чичултрачIа шаттаз ттун хьунакъабавкьуна. Нара цIуххаву дурминнангу му махъ кIулну бакъая.
Муния махъ, цаппара чIун лях ларгун, на 30-ку шиннардил дайдихьулий сакин бувну бивкIсса оьрусрая лаккунайнсса хъуни бакъасса, ялавай кIицI лавгсса терминологиялул мукъузаннащал (словарьдащал) кIул хьуссияв:
М. Чаринов. Ижтимяисса ва сиясийсса терминну;
М. Къажлаев. Физикалул терминну;
М.Къажлаев. Химиялул терминну;
Ш.Амиров . ХIисаврттал терминну.
Вай луттирдал автортал хъинну дурккусса, чантI увкусса ва ххуйну оьрус маз ва кьатIаллил мазру кIулсса ва мунищала архIал биялну, тамну лакку мазгу, мунил ттуршамашивуртту дурчIусса ва кIулсса аьлимтал бивкIссар. Мунийн бувну, вайннаща вай луттирдаву тамансса оьрус мукъурттин (терминнан) баранбалсса махъру лакку мазраву лякъин ва усттарну, кIанийн бувтун хIасул бан, сакин бан бювхъуссар.
Физикалул ва химиялул терминнал мукъузанну був­сса, Гъумучатусса Къажлахъал МахIалли (1904-1990) Ттуплисуллал гимназия ва Бакуйннал университетрал физикалул ва кьатIаллил мазурдил факультет­ру бувккусса, хъинну итххявхсса аьлимчуя.
«Физикалул терминнаву» М. Къажлаевлул оьрусрайсса пресс тIисса махъ лаккунайн шаттаз куну таржума бувну бия:
Винтовой пресс – бурма-шаттаз (л.6);
Гидравлический пресс – гидравликсса шаттаз (л.8).
Шикку ттун чIалан бивкIуна, М. Аьлиевлул аьркин бувсса шаттаз лакку мазравусса ва, цаппараннан бухьурчагума, кIулсса махъ бушиву. Мукъул мяънагу балжи хъанан диркIуна, бувчIлай бия, му ци-дунугу чIуен дайни ишла байсса (усттарнал), ярагърал цIа душиву. Нагу мунил хъирив лаллан ивкIра. Луг­лагинан лякъайссар учайхха, му махъ ттун бархъаллачIагу хьунабавкьуна. Бархъарату­сса Кьаландаров МахIаммади (1942-2001) бархъаллал лугъатрая ххаллилсса элмийсса даву чирчусса, элмурдал кандидат хьусса, Педуниверситет­рал ламса мазрал кафедралул хъунаману ивкIсса итххявхсса аьлимчу ия. Бархъаллал лугъат элмийну ххалбивгьуну, мунал му лугъатрал мукъузандалунсса чIярусса материаллу дартIуна. Ми мукъурттивугу ттун нава хъирив агьсса шаттаз тIисса махъ бакIрайн багьуна. Му мукъул мяънагу усттартурал аьркин байсса ярагърал цIа дия ва оьрус­райн «станок» куну бувчIин бувну бия (шиккува «верстак» учингу бюхъанссия, яъни дазга тIисса мукъуйн букIлай бия). Ва ишираву тIурчан, шаттаз лакку мазрая ятсса ва миннан къакIулсса махъ бакъашиву исват хъанай бия. Амма мува ку­ццуй ца затгу балжину бувчIлай бия: ва махъ аслийсса лакку махъ бакъашиву, цайми мазурдива бувкIсса бушиву. Мунияту ххал буллан ивкIра цайми мазурдивугу, хьхьичI ирглий дагъусттан мазурдиву. Шикку ттун цал тIайлабацIу къавхьуна: къапкъазуллал, машрикьуллал мазурдиву (азирбижан, парс, турк, гуржи, армани, аьраб мазру) ттун ва махъ къалявкъуна (бюхъай щала ххуйну ххал къабувну бикIангу). Дагъусттан мазурдивугу ляхълай бакъая. Яру мазрал чичрулул мазраву ва циняв яруссаннан аьмсса «болмацIраву» (яъни «жяматралмур, аьралунналмур мазраву») му махъ бакъая. Амма мунил аьш-бакI яруссаннал аьндархъиялмур лугъатраву, хасну кIицI бан Ссугъращиялмур лу­гъатраву, ляркъуна. СсугъурдачIа шаттат тIисса махъ бур, мунил мяънагу «къяцIа, бурма-къяцIа» (оьрусрай «тиски, клещи»), яъни “ци-дунугу чIуен дан аьркин дайсса зат” дур. Ванищала архIал, ссу­гъурдал ва махъ нирпахI тIисса, яъни «лубихьу, Кьуръанбихьу» тIисса мяъналийгу ишла байсса бивкIун бур. ЧIалачIиссаксса, вай мяънарду жулла шаттаз («пресс» ва бархъаллал «станок, верстак») дакIнин дичлачисса, миннуцIун дахIин бюхъайсса дур. Ялунма бурувгун ва яру махъгу, жулва шаттаз-гу цава-ца мукъул журарду (вариантру) бур учин бюхълай бур. ЧIурдал тапават («з» ва «д/т») личIи-личIисса мазурдиву цава-ца мукъуву хьунадакьайсса аьламатри: устаз – устад – остIатI – усттар, Рамадан – Рамазан, лак. зума (кьацI) – даргал. дуб, зунтту – даргал. дубарти ва м.ц. Жулва шаттаз-рал ва ссугъращиял шаттат-рал агьаммур мяъна «усттарнал аьркин байсса ца ярагърал» цIа дур (ци-дунугу дайни ишла дайсса хъундакъа­сса дазга; мура лагрулийсса ци-дунугу чIуен дайсса, дугьайсса, хьхьичI дирхьуну дикIайсса зат). Бюхъай ва зат нирпахIраха («Х» хIарпираха) лархьхьусса лакьайсса-тIитIайсса затраха лащан дурну дикIан, дазгалуха ва чIуен дайсса затраха къяцIухагу лащан дурну дикIан. Вай кIивагу мукъул гьануну шаддад тIисса махъ бухьунссия, яъни: шаддад-раяту шаддаз/шаттаз ва шаттат хьуну чIалай бур.
Амма ва махъ цила къалипрах, хахлих, диц-куццух бурувгун, аслийсса дагъусттан махъ бакъар, цалва дянив лакку мазрава яру мазравун багьмурну ккалли бан бюхъанссар. Мукун бухьувкун, ва махъ жучIанма чату, ци чIумал, ци сававну багьссарив кIул бан багьлай бия. ЖучIанма хьхьичIава бувкIсса махъру хъунмурчIин машрикьуллал (букказандалул) мазурдива лавсун бикIай. Ми мазурдил мукъузаннаву, лавай увкусса куццуй, ва махъ бакъая. Бакъая вай мазурдива цавунма чIявусса махъру кьамул бувсса цайми мазурдивугу. ЧIалай бия, мукъул аввалданиймур чIалачIин да­ххана хьуну душиву ва му зат аьч бансса кIула аьркинну душиву.
Мукунсса кIула, тIурчан, жула хъунасса аьлимчуначIа Замир АьличIа (Аь.Къаяев) ляркъуна. 20-30-ку шиннардий мунал сакин бувну бивкIсса «Лакку маз ва тарих» тIисса кьамусраву (басмалий бивщу­ссар 2006-ку шинал) лакку мазраву ишласса чIявуми махъру, миннул мяънагу дурчIин дурну, мина-гьану чату наниссаривгу бувсун бур. Бувсмургу гьарца чулуха тамсса, цичIав ххи-чан бан аьркиншиву дакъасса ва хIакьсса бур. ЧIалай бур, чивчумур хъинну чантI увкусса, гьарца зарая хавар бусса аьлимчунал канила бувккун бушиву. Гьамин, вана ва луттираву кIа шаттаз тIисса мукъул бакI-щаращи чату наниссарив ккаккангу бувну, мукъул мяънагу аьщуйн щуну диялну дурчIин дурну дур. Амма му махъ жува зумух ласласисса куццуй шаттаз тIий буллуну бакъарча, шаддад тIий чивчуну бур ва шикку аьлимчу цукунчIав аьйкьлай, гъалатI итабакьлай акъар. Луттираву бусса куццуй жувагу ва махъ шикку булунну:
шаддад аь., шаддад тIисса аьраб мазрай чIувин буву тIиссар. Дагъусттандал аьлимтурачIа бурмардай чIувин дайсса ца зад дикIайва. Луттирал макьбалду (макьабиллу ? – Я.Э) лачIайни му задрахь бугьан бувну, мукун бурмардай чIувин бувну лачIайва. Мунингу шаддад куну учайва (л. 382).
Учин бюхъай, вай мукъурттил дянив тапават дурхха (шаттаз ва шаддад), вай цаннин ца цукун букIлакIиссар, цукунни вай ца мукъуя нанисса, куну. Шиккусса тапаватшиву дурчIин дансса хIуччарду буцин бюхълай бур, мигу аьраб чичрулул ва аьраб махъру цавунма лавсъсса бусурман халкьуннал мазурдиву ми чичлачаврил цаппара кьяйдардацIун бавхIуну бур. Ми кьяйдардаяту хавар бикIан аьркинссар. Бусурман халкьуннал цанна аьркин дурсса аьраб чичрулуву, яъни «аьжам-хатIлий», аьраб махъру аьраб мазрал кьяйдалий чичайсса бивкIссар (ми махъру бахханану, цаламур мазрал кьяйдардайн мютIий бувну зумух ласлай бивкIхьурчангу, учиннуча, цIана жура оьрус чичру гьануну ларсун дурсса чичрулуву кунма). ХIакьинусса кьинигу, аьраб хатI ишла буллалисса парсналгу укунсса махъру мукун чичлайнма буссар. ХьхьичIава лакку мазран ва цаппара дагъусттан мазурдин аьраб чичру аьркин дурну сакин бувсса «аьжамрайгу» жучIанма бувкIсса аьраб махъру аьрабрай кунмава, хIарп даххана къадурну, чичайсса бивкIссар. Хаснура ва кьяйда аьраб дурккуминнал цIакьну дуруччайсса диркIссар. Масала, Нажмуттин (чичрулуву Наджмуддин), Аьппас (чичрулуву Аьббас), мутта (чичрулуву муддат), къуппа (чичрулуву къуббат), Ситтикь (чичрулуву Ссиддикь) ва м.ц. Укун кIива ца куццуйсса чIу (б-б, д-д) ахIал буний, аьрабрай ми ца хIарпирай чIу чIуяврил лишан (ташдид «чIуен баву») ялув дирхьуну чичайссар. Ла­ккунай му лишандалийн чIурчIав, ярунай кьайи учайссар, яъни «чIу чIуяву, чIу чIуен баву» тIиссар. ЧIурчIав тIисса махъгу чIу чIуяву баххана хьуну хIасул хьусса махъри. Цаппара мисаллу: чIурчIав дурну чичин, чIурчIав дан, чIурчIав дурну учин. ЦIана ва махъ жула мазраву «чIу лахъи баву» (ударение) ягу «ссах-дунугу гужну къулагъас даву», «я битаву» тIисса мяъналий ишла бай.
Шиккува бусан, жула аслий­сса лакку махъругу аьжамрай чивчуний чIурчIав дурну чивчуну бикIай, масала, къадда (къатта), ббал (ппал), ддул (ттул), ддархь (ттархь), бюхддул (бюхттул) ва м.ц. Ва кьяйда 20-ку шиннардий бувксса цаппара луттирдавугу хьунабакьай (ХI.-М. Аминовлул «Алиф-ба» тIисса луттираву ва лакрал шаэртурал «Лакку балайрду» тIисса луттираву).
Аь.Къаяевлул цалва кьамусраву жучIанма бувкIсса аьраб махъругу аьрабрал кьяйдалий чивчуну бур: мудда(т), яъни мутта, аьппас(и) – аьппаси ва м.ц. ХIатта мяйжан тIисса («лакку бувсса») аьрабнал муаьййин баххана бувну хьусса махъгума аьрабрайва кунма чивчуну буллуну бур. КутIану учин, жучIава шаттаз тIий зумух ласласисса махъ аьраб кьяйдалий шаддад тIий чивчуну бур. Шаддад-раву ахирданий­сса «д» баххана хьуну «з»-лийн лавгун бур. Микку жучIава «д» (ягу «т») бивкIун бикIан бю­хъайшиву ссугъурдал шаттат ( <шаддад /шаттат ) тIисса пурмалул исват буллалиссар. Гьаннайсса, лакрал шаттаз тIисса мукъул бакI-щаращи аьрабнал шаддад хъанай бур. (Амма шиккува ца задгу кIицI бан багьлай бур. Аьлимчунал лу дунияллийн буккан буллалийни кIукунсса аьраб махъру цайми мазурдиву чичаврил кьяйда дукъарчIуну лирчIун, жулва «тт» бусса кIанттай «дд» бивтун бур. Мунищала архIал, ва мукъул хIакъираву редакторнал цукунчIавсса бувчIин бавуртту («комментарияртту») дакъар, амма цичIав аьркиншиву дакъа дунура чIявусса мукъурттин лахъисса «комментарияртту» шаттирахун тIиссакссагу хьунадакьлай дунура).
Аьраб мазрал кьамусирттаву шаддад тIисса махъ (жула мазравусса мяъналий) ттун къалявкъунни ва цайми мазурдивугу бакIрайн къабагьунни. Аьраб мазраву мукъул мархха-гьану шадда «чIуен бан, чIуен» дур ва муния шиддат «чIуен баву, чIуяву» тIисса махъ хIасул бувну бур. Ва мархлуяту тамансса личIи-личIисса цаннива ца нанисса мяънардащалсса махъру бубувну бур. Миннувух ташдид (ва шаддат) «чIуен баву, (чIу) чIуен баву» (яъни чIурчIав) тIисса махъру бур. ЧIалай бур, жулва шаттаз ва ссугъурдал шаттат мяъналул чулуха тIайланма аьраб мазрал шаддад-лийн букIлакIишиву. ЦIанасса аьраб мазраву ва мяъналуцIун бавхIуну, вава мархлуя був­сса мишадд-(ун) «чIуен буву» тIисса махъгу бур. Мунил мяънагу «ци-дунугу чIуен дайсса зат» (оьрусрай «зажим») ва корсет («лялалу чIуен дайсса зат») дур. БувчIлай бур, жулва шаттаз личIину чIявучин кIулсса махъ (термин) бакъашиву ва анжагъ макьабиллу дайни ми чIуен дайсса алатрал (ярагърал) цIа душиву, яъни хасъсса термин душиву ва аьмсса мазраву личIину ишласса махъ къабивкIшиву.
КIа аьраб мукъуя (шаддад/шаддат) лакку мазраву ша­ттаз хьун бюхъаврия жува лавай бусарду (устад – устаз, Рамадан – Рамазан, зума – (дарг.) дуб ва м.ц. Мяъналул тапаватгу, ттул хIисаврай, дурчIлачIисса дур: усттарнал аьркин байсса хъун бакъасса, хьхьичI бишайсса ярагъ (алат); чIирисса, дазга куннасса зат, ци-дунугу чIуен дайсса (нирпахIраха лащин дусса) зад (ярагъ). Вай мяънардугу ва мукъуву исват хъанай дур бархъаллачIа ( яъни дазга «станок, верстак»), ссугъурдачIа (къяцIа, яъни «тиски» — циятура ци-дунугу дуллалисса материал (кьай) чIуен даншиврул аьркин дуллалисса зад; луттирал лув дишайсса зад – нирпахI), гъумучиял (пресс – чIуен дуву). Му махъ жучIава бивкIшиву лакрал личIи-личIисса щархъал чиваркIуннал тасттикь буллай бур: Гъумучиял Замир Аьлил ва Къажлахъал МахIаллинал, КIямашрал Аьли­ев МахIаммадул, Бархъаллал Кьаландаров МахIаммадил. Мунищала архIал, ялунссаннун ва зат чIаххуврайсса Аьндархъиял махIалданийсса Ссугъращиял лугъатралгу циннасса барашин дуллай дур. Гьаннайсса, ва махъ лакрангу, аьндархъиянгу гьурттусса махъ бур, яруссаннал вайми лугъатирттаву бакъари. Ссугъращиялгу лакку мазрава лавсун чIалай бур.
ЦIана ва махъ жунма хъамавабивтсса махъ бур, му ярагъ аьркин бувну луттирдан макьабиллу (мужаллатру) давугу ччянива бивкIсса пиша бур. «ЧIуен байсса ярагъ» тIисса мяъналийгу оьрус мазрава лавсъсса пресс европанал мазурдил махъ бур. Амма кIа мукъул чулухуннай­сса мазралмур археологиялул «диххавурттал» («раскопки») жула миллатрал тарихрал ва культуралул тарихрал цаппара яргсса чIапIив аьч дуллай дур. Ванил жухьва лакрачIа луттирал, луттирду чичаврил, миннул нусхарду (копияртту) баврил пиша (мукун луттирду чичавриха зузиминнайн катибтал учайсса бивкIссар) ттуршра­хъул шиннардил хьхьичI, ХV-чинмур аьсрулия байбивхьуну ХIХ-чинмунийн бияннин, хаснува ХУII ттуршукулий, хъинну бусравну ва сийлий бивкIшиву бувсунни. Мунищала архIал, мукунсса луттирдан чIюлу дурсса, ххалилсса макьабиллу давугу хъинну сийлий диркIун дур, му завугу усттарнал сянат кунна­сса заву диркIун дур. Мунияту тай хьхьичIарасса мужаллатру магьирлугърал гьайкаллан ккалли дан бюхъанссар. Лакку кIантту ва Гъумучи Дагъусттаннай мукунсса сянатрал луттирдал копияртту баврил, миннун макьабиллу даврил ца агьамсса центр бивкIун бур. Укунсса сянатрацIун бавхIусса махъ шаттаз-гу лакрачIа ишлану бухьунссия. Гъумучиял цIанихсса катибтурая машгьурсса дагъус­ттан аьлимчунал Амри Шихсаидовлул 1992-ку шинал кказитрай чивчуна (ургу: «Переписчики из Кумуха», «Дагестанская правда», 4 июль). Яла му макьала, гьарта-гьарзагу дурну, цайми кIанттурдугу аьч бувну цалла элмийсса давурттал жямсса лу­ттирайгу рирщуна (ургу: Очерки истории, источниковедения, археографии средневекового Дагестана. Махачкала, 2008, с. 181-187).
Жулва мазравусса ца му­къул тарихраясса хаварданул Гъази-Гъумучи ва Лакку кIану Дагъусттаннал культуралул ва дуккаврил ца агьамсса центр бивкIшиву дакIнийн бувтунни ва му зат хъинну балжину исват ва тасттикь бувунни. Мукунсса мукъурттил тарихирттал жулва лавгмуния хIакьсса ва тIайласса барашин дай ва миннух хъинну къулагъас дан аьркиншиву, му жуйвасса бусравсса бурж бушиву жунма бувчIин бай.
Явюбукухъал Эса