Вай гьантрай МахIачкъалалив, Дусшиврул къатлуву, хьунни дуснакь бувминнал ихтиярду дуруччаврил цIаний зузисса АьФ-лул субъектирдал ОНК-дал (Общественные наблюдательные комиссии) ПаччахIлугърал властьрал органнащалсса ва ихтиярду дуруччай структурардащалсса хIала-гьурттушиврул хIакъиравусса «ккуркки стол».

Ванил сакиншинначитал хьунни АьФ-лул ПрезидентначIасса граждан общество хьхьичIуннай даврил ва инсаннал ихтиярду дуруччаврил совет, АьФ-лул инсаннал ихтиярду дуруччаврил Уполномоченныйнал ва Жяматийсса палаталул вакилтал.
Июнь зурул 16-нния байбивхьуну, 23-ннийн бияннин Ухссавнил Ккавкказнаву най дуссия Жяматрал вакилтурал дуснакьру ххал баврил нюжмар. Ва «ккуркки столгу» мунил лагрулуву дуллалисса давурттавасса цану хьунни. Советрал, АьФ-лул ихтиярду дуруччаврил Уполномоченныйнал ва Жяматийсса палаталул вакилтал бивунни Ухссавнил Ккавкказуллал федерал округрай­сса субъектирдайн дуснакьру ххал баву мурадрай.
Дагъусттаннал колониярдайсса тагьардания бусласисса ихтилат хьунни «ккуркки столданух».
Шикку гьуртту хьунни ОНК-дал ва пенитенциар системалул реформардал чул бувгьусса Аьрасатнал ПрезидентначIасса Советрал муданмасса комиссиялул каялувчи Андрей Бабушкин, АьФ-лул инсаннал ихтиярду дуруччаврил Уполномоченныйнал вакил Александр Маланкин, Жяматийсса Палаталул член, Аьрасатнал ФСИН-лучIасса Жяматийсса Советрал ва Аьрасатнал ПрезидентначIасса Советрал (по развитию гражданского общества и правам человека) член Мария Каннабих, мува Советрал член Игорь Каляпин ва м.ц.
— ОНК-лул члентал бивунни республикалул кIира колониялийн. Шиккусса шартIру оьккисса дакъая. Жу цIухху-бусу барду щябивтминнахь дукиялул, медициналул кумаг баврил тагьар ци дуссарив, цукун дуручлай буссарив миннал ихтиярду. Амма цуя ца инсан къаувккунни я аьрза, я тавакъю буллалисса, — увкунни А. Бабушкиннул.
Цалва ихтилатраву ванал кIицI лавгунни чIявуми ИВС-ву радиоприемникру, дежурныйнайн оьвчайсса кнопкарду, электрический пачру бакъашиву, республикалул цаппара районнайсса ИВС-ву марцIшиву дакъашиву. Ванал бусласимунийн бувну, чIал къавхьуну тархъан хьунтIиминнал вайминнай къия дуллалисса, вай кьювкьу-кьадар буллалисса кIанттурдугу хьунакъабавкьуну бур. Амма тахсир хьушиврий щак тIий бувгьуминнал чулухунмайрив мукунсса ишру хъанай бусса бур.
— Районнал виваллил иширттал отделлайн бувцуну бувкIминнахь цIухху-бусу буллалисса чIумал РОВД-ву миннал ихтиярду ссуссукьу дурсса кIанттурду хьунабакьлай бур. Мукунсса ишру хьунабакьлай бур гьар мудан ва цинярда респуб­ликалул райотделлаву. Масала, уттигъанну жуйн аьрза бунни ца адаминал. Ванал бувсунни цува гужирай ИВС-ву (изолятор временного содержания) увгьуну, атлай, къюкI хьушиву. Ванан уттигу медициналул кумаг бан бувар, — бувсунни А. Бабушкиннул.
Ванал кIицI лавгунни цалла даврил агьаммур мурад инсаннал ихтиярду дуруччаву, ОНК-щал ва ОВД-лул зузалтращал дахIаву даву бушиву. Наблюдательтал цаймигу дуснакьирттайн биян дакIний бур. Вай хIадурну бур дуснакь бувминнал ихтиярду ссуссукьу даврил хIакъиравусса цумур бухьурчагу аьрзлул хъирив лаян.
Вайва масъаларттал хIакъираву ихтилат бунни Дагъусттаннайсса инсаннал ихтиярду дуруччаврил Уполномоченный Уммупазил Оьма­ровал, ихтиярду дуруччай организациярдал вакилтурал. Циняв ихтилатчитурал кIицI лавгунни вай масъаларттал агьамшиву ва бувсунни цивппа ОНК-дал дуллалимунил чIарав бацIан хIадурну бушиву.
Конференциялий гьаз хьунни ОНК-дал даврия ххишаласса мюнпат хьунсса чаран лякъаврил масъалагу.
ДР-лул ХIукуматрайн тапшур бунни республикалул ОНК-лун организациялул ва техникалул чулухасса ва арцуйнусса кумаг бан.
ДР-лул Виваллил иширттал министерствалийн ва Федерал Миграциялул управлениялул къуллугърайн тапшур бунни вай дуснакь бувми щябивтсса идарарттайн бияврил низам дуруччинсса чаран лякъин.
ДР-лул Прокуратуралийн тIурча тапшур бунни, ялавайми къуллугъирттайсса прокурортурая тIалавшинна дурну, бувгьусса, щак бусса ва тахсирлу буллалисса инсантурал ихтиярду дуруччаву. Масала, ми бувгьуну бушиву мачча-гъаннайн баян баву, бувгьуминнаща адвокатнайн буккан бюхъансса иш баву.
Силистталул комитетрая­рив тIалав бунни СИЗО-1 щябивкI­минначIан ОНК-лул вакилтал ва адвокатътал буххаврин дайшишру къадан.
Асият Абачараева