Майрал 27-нний Дагъусттаннал БакIчи Рамазан АьбдуллатIипов гьуртту хьунни Аьрасатнаву къюмайтIутIи бугьаврил ва чахир дуккан даврил хIакъираву Новороссийскалий АьФ-лул ХIукуматрал Председатель Дмитрий Медведевлул каялувшиврулу хьусса совещаниялий.

Майрал 27-нний Дагъусттаннал БакIчи Рамазан АьбдуллатIипов гьуртту хьунни Аьрасатнаву къюмайтIутIи бугьаврил ва чахир дуккан даврил хIакъираву Новороссийскалий АьФ-лул ХIукуматрал Председатель Дмитрий Медведевлул каялувшиврулу хьусса совещаниялий.
Д. Медведевлул увкусса куццуй, цIанасса ппурттуву къюмайтIутIи бугьлай дур сайки 300 хозяйство. 2009-2013 шиннардий къюмайтIутIул бакIлахъия шайва 325 азарда тоннарду. Ми хъанай дур Аьрасатнаву 1980-ку шиннардий ласайминнуяр 2,5-лаксса чансса. Мунияту ХIукуматрал кумаг бансса ният дур къюмайтIутIи бугьаврил давурттан. Субсидияртту итабакьлай бур, амма миннуйну щаллу хьунссарив ягу къахьунссарив му масъалагу ххалбигьин аьркинни. Махъсса ппурттуву итадаркьуну дур 1,5 млрд. субсидиярттал. Цамургу масъала бур 2020 шинайннин къюмайтIутIул багъру гьарза бан 140 азарда гектардайн биянцIа.
АьФ-лул Шяраваллил хозяйствалул министр Николай Федоровлул ихтилат­райн бувну, ларай кIицI дурсса 300 тIутIи бугьайсса хозяйстварттавату 60-яр ххишалассаннучIа дур тIутIуя чахир дуккан дайсса кьай-кьуй. КъюмайтIутIи ххяххан бавриха зий ур сайки 90 азарда инсан. Министрнал бувсунни къюмайтIутIул багъру гьарза буллай бушиву Чачаннал Республикалий, Ставрополлал крайрай, Ростовуллал областьрай. Миннаяр чансса гектардал гьарза бувну бур багъру Краснодардал крайрай ва Дагъусттаннай. МуницIун бавхIуну Д. Медведевлул бувсунни Краснодардал крайрай ва Дагъусттаннай къюмайтIутIул бакIлахъия цайми регионнайнияр ххишала ласлай бушиву, мунийн бувну багъру ххишалану гьарза баврил мяъна дакъашиву.
Дагъусттаннай гьар шинах ласайссар Аьрасатнал ласайсса къюмайтIутIул бакIлахъиялул 35%. АьФ-лул къюмайтIутIул багъирдал 33,5% Дагъусттаннай бур, яни 2-мур кIану бугьлай бур Краснодардал крайрал хъирив. Мунияту учин бюхълай бур, билаятрай къюмайтIутIул бакIлахъия ласавриву ва чахир дуккан давриву хъунмур кIану Дагъусттаннал бугьлай бур куну.
ХIадур бувссар
ХI. Аьдиловлул