Августрал 14-нний, «ТIиртIусса власть» проектран хасну, «Дагестан» РИА-лий журналистътуращал хьунаавкьунни ДР-лул промышленностьрал ва энергетикалул министр Ризван ГъазимахIаммадов. Ганал бувсунни цIанасса ппурттуву республикалул промышленностьравусса ва энергетикалувусса тагьардания, мукунма министерствалул хьхьичIсса масъаларттая. Яла журналистътурал суаллахьхьун дуллунни жавабругу.
Август зурул 14-нний МахIачкъалалив Дахадаевлул кIичIиравусса «Рисалат Холдинграву» хьусса конференциялий ихтилат бия ва зурул 23-нний хьунтIисса исламрал продукциялул дунияллул халкьуннал цалчинмур выставкалия. П. Рамазанова Шанма гьантлийсса му выставка «Каспий Халяль Экспо 2013» тIисса цIанилу дикIан тIий дур «Каспий Экспо» тIисса выставкарду дай комплексраву.
Августрал 15-нний МахIачкъалалив хьунни 2020 шинайннинсса ДР-лул вацIлул хозяйствалул масъалартту ххалбигьлагьисса «ккуркки стол». БатIаврий гьуртту хьунни ДР-лул ХIукуматрал Председательнал хъиривчу Шарип Шарипов, ДР-лул ВацIлул хозяйствалул комитетрал председатель Аьлибаг ХIажиев, МахIачкъалаллал тIабиаьт дуруччаврил прокуратуралул каялувчи Аьли НурмахIаммадов ва цаймигу.
• Август зурул 12-нний Къарабудахккантуллал райондалий ВАЗ 21014 автомобильданул ялун КаМАЗ кьювчуну ххюя инсан ливтIуну бур тIий баян бунни республикалул СК-рал. ЛивтIусса ххюннаву кIива мюрщисса оьрчI бивкIун бур.
Августрал 14-нний республикалул журналистътуращал хьунаавкьунни ДР-лул печатьрал ва информациялул министрнал хъиривчу Зубайру Зубайруев.
Дагъусттаннал культуралул министр Зарема Буттаева гьуртту хьунни Аьрасатнаву Культуралул шин даврил ва мунийнсса хIадуршиннарал масъалартту ххалбигьлагьисса Аьрасатнал конференциялий. Му форум хьунни Тамбоврай, мунил модераторнугу бия Аьрасатнал культуралул министрнал хъиривчу Алла Манилова. Конференциялий гьуртту хьунни Тамбовскаллал областьрал губернатор Олег Бетин, республикардал культуралул министртал, ПаччахIлугърал Думалул депутатътал ва цаймигу жаваблувсса къуллугъчитал.
Португалиянал хъуншагьру Лиссабоннай хьунни тайбоксрал Европанал чемпионат ва Европанал первенство. Командарттавату Аьрасатнал цачIундур командалул бувгьунни цалчинмур кIану.
Дагъусттаннал хъунаманал къуллугъ чIумуйну биттур буллалисса Рамазан АьбдуллатIиповлун республикалул хьхьичI бавцIусса ца масъалану чIалай бур Дагъусттанная лавгсса оьрус, жугьутI ва цаймигу миллатирттал инсантал Дагъусттаннайнмай зана бикIанмур буллалаву.
Буцинну мисаллу. Гьашину апрельданий М. Муслимова тIисса хъамитайпалучIан бувкIун бур «Витас Банк» ООО-рал конкурсрал управляющийнал вакилнаясса чагъар (Му банк бур «Агенство по страхованию вкладов» тIисса паччахIлугърал корпорациялул).
ХIурмат бусса чIурду булайми! Жулва чIурду булунну адав-имандалул ва низамрал чулийсса инсаннахлу! Жуна аьркинссар жува аьркинсса бакIчи. Жува увчIайма – АьбдурахIман МахIаммадоври! Увссар 1955 шинал Ккуллал шяраву. 8 класс къуртал бувну махъ зий ивкIссар Каспийск шагьрулий «Дагдизель» заводрай фрезировщикну. 1975 шинал увххун 1979 шинал къуртал бувссар Оренбургуллал лавайсса даражалул бахьттагьалтрал аьралуннал ПВО-рал зенитирттал ва ракетарттал...
