Август зурул 14-нний Дагъусттаннал журналистурал пресс-клубраву журналистуращал хьунаавкьунни Дагъусттаннал медакадемиялул ректор АьбдурахIман ХIусманов, медициналул элмурдал доктор, профессор, Аьрасатнал лайкь хьусса хIакин. Мунащалсса хьунабакьаву дуван багьлай бивкIшиврия байбивхьунни ихтилат Республикалул Журналистурал союзрал председатель Аьли Камаловлул:«Медакадемиялул хIакъираву хIакьину агьалинаву хаварду личIи-личIисса бур. Июль зурул 14-нний медакадемиялуву спецоперация бувну, документру, компьютерду зеххаврил агьалинавун биялсса аваза бувтунни. Мунияту жу оьвчарду жучIанма ректорнайн, ци иш-тагьар дуссарив жухьва бусаншиврул».

ПатIимат Рамазанова
АьбдурахIман ХIусмановлул бувсунни июль зуруй­сса спецоперация закондалул кьаралданий къабувшиву: «Оператив-розыскрал даврил протоколданийн бувну, медакадемиялуву цIухла бишинсса багьана-савав хьуну дусса дур медакадемиялуву ишла дуллай бушиву лицензия дакъасса ва программардал щаллушиннарайн ихтияр дакъасса компьютерду, — увкунни АьбдурахIман ХIусмановичлул. – Аьркинсса техника жу машан ласару, Интернетраву конкурс баян бувну, цалла даву лавайсса даражалий дувайсса фирмардаща. Кьювкьу базаллаву машан къаласару жу техника. Мунияту гьанулун ласунсса хIучча бакъанувасса цIухла бишаву дия. Му щил-дунугу тIалавшиннарайн дурну дуллалисса даву душиву чIалай бия. Вузрал финансирдал документругу, оргтехникагу ларсуна. Документру зана бунни, компьютердуми цавагу зана буван бувассар хIакьинусса кьининийн. Компьютерду бакъа ректоратгу ласу-ка бувхIуну ливчIун буру, даву дуван къахъанай.[pullquote]Ттул кIанайн тамахI буминнал даву бакIуйн къадуккантIиссар. На даврия укьан увансса ихтияр дуссар анжагъ Дагъусттаннал Президентнахь ва ттущал кьутIи цIакь дурсса Аьрасатнал Минобразованиялул министрнахь.[/pullquote]
Ттул кIанайн тамахI буминнал даву бакIуйн къадуккантIиссар. На даврия укьан увансса ихтияр дуссар анжагъ Дагъусттаннал Президентнахь ва ттущал кьутIи цIакь дурсса Аьрасатнал Миноб­разованиялул министрнахьри. СМИ-рдал баян бунни ттуй аьй ккаклай бушиву закондалул ххуттава ливчусса иширттавух хIалашаву (мошенничество – П. Р.) му къатIайласса информацияр».
Вузраву лулттурасри ласаврищал цукун талай буру тIисса суалданухьхьун жаваб дуллай, АьбдурахIман ХIусмановлул увкунни:
«Циняв вузирдайн дирсса азарду жулмунийнгу дирну дур, на му инкар буллай акъара. Жу хIарачат буллай буру му азарданун ххуллу кьукьин.
Нава ректорну зун айишайхту на хIасул бував аналитикалул отдел, студентътурал ялув бавцIусса, миннал дуккаврил лекциярдайн заназаврил иш-тагьар кIулсса, сессиярдал хIасиллу кIулсса.
Му отделданул хъуннасса даву дуллалиссар. Ва ялагу, коррупция духлаган даву мурад­рай, циняр экзаменну электрон тестированиялул журалийн дутарду».
Буллунни журналистурал арцу дуллуну бакъа медакадемиялувун кьамул къабайшиврул хIакъиравусса суалгу.
«Медакадемиялувун студентътал кьамул бувару так ЕГЭ-лул хIасиллайн бувну. Я ректор, я академиялул хъуними дуклан бухлахиминнал экзаменнавух хIала къашайссар, жул зузалтрал так ЕГЭ-рдал свидетельствардал хIасиллу федерал базалийминнущал цачIу дирхьуну, ххалли дувайсса», — увкунни мунал. АьбдурахIман ХIусмановлул бувсунни вузравун кьамул бай­сса проходной балгу ялу-ялун гьаз хъанай бушиву, масалдаран, 2009 шинал стоматологиялул факультетрайн 212 балл аьркинну бивкIхьурча, гьашину 278 баллануяр чан бакъасса бикIан аьркинссар тIисса тIалавшинна диркIшиву, оьрчIал хIакинтал хIадур байсса факультетрайн 266 бал тIалав буллай бивкIшиву.
Бувсунни ятинсса ва муша­къатсса абитуриентал хьхьичI ххуттай кьамул бувайшивугу. Миккугу личIи-личIисса хIилларду, аьмаллу ашкара хъанай, ВТЭК-райн запрос гьан дувайшиву, студент мяйжаннугу инвалид ушиву исват буллалисса документру тIалав бувайшиву.
Дагъусттаннал медакадемиялул диплом сийлий бакъашиву мяйжанссарив, циванни зул выпускниктал хьхьарасса бур тIий цайми шагьрурдайн зун къабуцлацисса тIисса суалдану­хьхьун жаваб дуллай, ректорнал бувсунни цалва выпускниктал чIявусса регионнай зий бушиву, миннаяту рязийну бушиву.
«Микку иш вузраву бакъар буссача, дагъусттан фамилиярдавур, Аьрасатнан Ивановхъул, Петровхъул ччай бур. Жулми выпускникталгу ссалчIав лувсса бакъассар, цIанихсса клиникардай цIа данну зий бу­ссар», — увкунни АьбдурахIман ХIусмановлул.