Август зурул 19-нний «Сборная Дагестана» КВН-далул команда ларгссар Анапалийн, сентябрь зурул 5-нний Москавлив Цалчинмур телеканалданий хьунтIисса тIуркIулийн хIадур хъанан ва Краснодардал КВН-далул лигалий, хъамал хIисаврай, гьуртту хьуншиврул.

П. Рамазанова
«Жун кIулли дагъусттаннал агьалинал жуйнна хъуннасса вихшала душиву, КВН-далул Премьер-лигалул финалданийн жу буккавугу му вихшала цIакь дуллалисса хIуччари. Дагъусттаннал бакIчи Рамазан АьбдуллатIипов, Федерациялул Советрал член Сулайман Каримов, Жагьилтурал иширтталсса буллалисса комитет ва Ректортурал совет жул чIарав бацIлай бур, миннал вихшала цIакь дувансса даражалий тIуркIулуву гьуртту хьун хIадур хъанай буру», — тIий ур командалул капитан Абсалуттин ХIамзатов.
Дагъусттаннал КВН-щиктал Анапалийн тIайла буклай, ми финалданий ххув хьунссар тIисса хьул-умуд бушиву бувсунни Дагъусттаннал культуралул министрнал хъиривчу Муслим Телякавовлул ва «МахIачкъалаллал бродягахъул» командалул КВН-щик Карен Мкртчаннул:
— Дагъусттаннай мудангу КВН-далул тIуркIу сийлий бивкIссар, жулва оьрчIал бур му пагьму-гьунар, муниятур «МахIачкъалаллал бродягахъул» машгьур хьуссагу. Утти зулгу сант дур мукун ххув хьунсса, хьхьичIун личинсса. Ца региондалий КВН-лул кIира чемпионтурал команда дуккаву му нажагь шайсса иш бухьунссар. Ттунгу хъинну ччива мукунсса иш хьуну, «МахIачкъалаллал бродягахъал» хъирив «Сборная Дагестаналулгу» чемпионтурал цIарду ларсун», — увкунни Кареннул.
Жувагу ялугьланну сентябрь зуруй «Сборная Дагестана» ххувшаврил ттугъгу лавсун зана хьуннин. ТIайлабацIу баннав.