Август зурул 14-нний МахIачкъалалив Дахадаевлул кIичIиравусса «Рисалат Холдинграву» хьусса конференциялий ихтилат бия ва зурул 23-нний хьунтIисса исламрал продукциялул дунияллул халкьуннал цалчинмур выставкалия.
П. Рамазанова
Шанма гьантлийсса му выставка «Каспий Халяль Экспо 2013» тIисса цIанилу дикIан тIий дур «Каспий Экспо» тIисса выставкарду дай комплексраву. Мунил сиптачи дур «Рисалат Холдинг» тIисса компания. Выставкалул чIарав бавцIуну бур Дагъусттаннал хIукумат, республикалул бусурманнал РувхIаний управление ва Аьрасатнал Муфтийтурал совет. Щаллагу дунияллул лагрулийсса му выставкалий гьуртту хьун тIий бур ккавкказуллал билаятирттаясса бизнесментал бакъагу, кьатIаллил билаятирттаясса, Малайзиянавусса, Турциянавусса, США-навусса, Пакисттаннайсса фирмардал вакилталгу.
Му выставка дуван дакIнийн багьаврия журналистурахь бувсунни «Рисалат Холдинграл» гендиректор МахIаммад Мукошдибировлул. Мунал бувсмунийн бувну, му каялувшиву дуллалисса компания махъсса кIира шинал лажиндарай гьуртту хьуну дур Москавлийсса мура журалул выставкалувух.
Гьашину «Рисалат Холдинг» выставкалул спонсоргу хьуну дур.
«Москавуллал выставкалий ихтилат бувна хIукуматрал председательнал хъиривчу Абусупиян Хархаровлул. Мунал бувсуна укуннасса выставка МахIачкъалаливгу дуван дакIний бушиву, Дагъусттаннал президентгу «ХIалал» индустриялул бизнес-проектру бартдигьин ччисса инвестортурацIун кабакьин дакIний ушиву. Выставкалий 15 миллиондалунсса кьутIирду дуван дакIний буссару», — увкуна М. Мукошдибировлул.
Журналистурахь бувсунни выставкалий исламрал лаххия, дуки-хIачIия дакъагу, исламрал бизнесраясса форумругу хьунтIишиву. Масалдаран, исламрал театрданул ккаккан бан тIий бур мюрщисса пьесардугу.
Выставкалул модератортурал бувсунни выставкалий ислам диндалул вакилтурал бакъагу, гьуртту хьун тIий бушиву исламрал хIурмат бусса цайми диннал вакилталгу. Исламрал лаххия ва ислам диндалул дучIи дуллалисса дуки-хIачIия машан ласун ччиминнан къулайну бикIаншиврул, выставка нанисса шанмагу гьантлий МахIачкъалалия, Жумаъ-мизитрачIату Каспийскалийн дикIан тIий дур украсса транспорт.
