Цалчинмур ЦIувкIратусса Мусал арс Мусаев МахIам­мад революциялул хъирив­сса шиннардий Къиримнавун, Алупкалий яхъанахъисса бу­ттауссу СултаннучIан, лавгун ур. ХIалтIилий ччянива Къиримнавун лавгсса буттауссу тиччава­сса душгу бувцуну, мина дурну ивкIун ур.

Яла махъату Совет Союзрал кIийла Виричу хьунтIисса арс АхIмад-Хангу хъун уллай. МахIаммад ва АхIмад-Хан цачIу ялапар хъанайгу бухьувкун, цаннан ца ххирасса ссурахъал бивкIун бур. МахIаммад цал ххуллурдал даврий зий ивкIун ур, яла – паччахIлугърал органнаву. Буттал миналийнай лавгсса МахIаммад дяъви байбишайхту цал райондалул интернатрай зий ивкIун ур военрукну, яла – Ккуллал школалий мура даврий. Аьрайн увцуну ур дяъви къуртал шайсса шинал, чIавами лейтенантътал хIадур байсса курсругу къуртал бувну, Рокоссовскийл каялувшиву дуллалисса фронтрай ивкIун ур артиллериялул батареялул командирну. Берлин ласавриву ккаккан дурсса чувшиврухлу лайкь хьуну ур Сталиннуясса барчаллагьрал чагъарданун.
МахIаммад Мусаевлул аьрали наградарттавух дур ЯтIул ЦIукул орден, Буттал КIанттул цIанийсса дяъвилул орден ва чIярусса медальлу. Дяъви къуртал хьуну махъ буттал шяравун зана хьусса МахIаммад, шяраваллил кIанттай даймур дуллай, яхI буллай уссия.
Угьара хьувкун, Каспийскалий яхъанахъисса Кьурбан тIима арсначIа уссия цува дунияллия гьаннин. «Дяъвилул цIарава зана хьурчагу, ппу мудангу ччанну цIий икIайва, амма цащаласса гьалмахтал дяъвилул бувкунни тIий, цIуру-кIуру банмагу ламус хъанай бур тIун икIайва.
Яла-яла мунал пахру бикIайва цащала цачIу хъуна хьусса ссурахъу АхIмад-Хан дунияллийх цIа ларгсса летчик-испытатель, Совет Союзрал кIийла Виричу шаврия. Амма я дяъви буллансса, я Ххувшаврил байран дуллансса къабукканнав, тIун икIайва», — тIий ур Кьурбан, ппу дакIнийн утлай.
ХIакьину, та дяъвилий ххув хьумигу нажагьсса ливчIун бухьукун, Ххувшаврил байран Аьпалул кьинигу хъанахъиссар: дяъвилий шагьид хьусса виртталгу, вир­тталну талай бивкIун, мушакъат хьуну ватандалийн бувкIмигу, къинттуллух фронтраха зий бивкIмигу дакIнийн бутан – жуйвасса буржри.
Аьпа баннав миннавасса ттул шяравучу Мусаев МахIам­мадлулгу. Ватан дуручлай бивкIсса виртталсса ппухълуннал кьюкьлувасса зунтталчунал.