«Жул ппу, ХIажиев МахIаммад, ЧIяйннал шяраву 7 классгу къуртал бувну, дуклай ивкIун ур Каспийскаллал ФЗУ-рай, мичча увцуну ур аьрайнгу, — буслай бур МахIаммадлул хъунма-хъунмур душ Мариян. – Дяъвилий ппу Северо-Западный фронтрай, роталул командирнал хъиривчуну, Украинский фронтрай тIурчарив аэродромрал полкраву, взводрал командирну ивкIсса документру бур. Бавал чIиви буттукьа бикIайва, буттал документру ва медальлу ядуллалисса.
П. Рамазанова
Му буттукьагу ппив бувну, лях-карах, буттал суратру, чагъарду, аьрали документру ххилтIу буллан ххирассия ттун. Ттула ппу мяйжаннугусса виричу ивкIун урхха тIисса пикрилул пахругу бутайва дакIнивун.
Му Сталинградуллал талатавривугу гьуртту хьуссар. Буттал «За оборону Сталинграда» тIисса дакъагу, «За отвагу», «За боевые заслуги» тIисса медальлугу дур. Дяъви къуртал хьуну бур мунал Австриянаву, Вена шагьрулий. Бакуй, МахIачкъалалив аьраличуну зий уссия яла, хъунама лейтенантнал чиндалуву къуллугъ кьабитаннин.
Музыкалул пагьму-гьунар бусса, итххявхсса уну, ппу ЧIяв шяраваллил культуралул къатлул директорну ивтуна хIаписарнал къуллугъ кьабитайхту. Ххюва душ, ца арсгу лайкьну хъуни бувссар жул буттал ва бавал. ЧIяйннал агьалинан ттул ппу дакIний уссар чантI увкусса, итххявхсса инсанну. Му хъамал ххирасса, маслихIатрай ихтилат байсса икIайва, мунияту жунний бухху-буккугу чан къашайва. Буттахь маслихIат цIуххин бучIайва, бутта ххуймур, хъинмур бан ччисса ия гьар ишираву. Цува дунияллия гьаннингу ЧIяв яхъанай уссия».
Каспийск шагьрулий оьрчIал багъраву тарбиячину зузисса Мариян бур Ххувшаврил гьантрай ччя-ччяни ниттил чIиви буттукьрачIан дачай дакI, буттал суратру ва документру ххилтIу буллан бикIара, ппухълуннал никирал агьлу гужну ватан ххирасса, буттал аьрщарах, билаятрах личIисса ччаву дусса инсантал бия, гьаманки ватандалухсса ччаврилли минная вирттал бувсса, чувшиврий дурк кьини лахъансса бюхъугу, тавпикьгу дуллусса тIий.
