Махъсса ппурттуву цалла кIулшивурттайну, цалва захIматрайну хьхьичIунсса ВУЗ-рттавунгу бувххун, дуклан гъира бусса, ххаллилсса пишакартал хьун ччисса оьрчIру нажагьсса бакъа ба­къар. ЦIанасса чIумал мукунсса пишакартурах мюхтажну бур щалва Аьрасатнал билаят. Мукунминнащари, уттисса заманнул цIу-цIусса технологиярттугу ишла дурну, захIматсса пишардай зий, машгьурсса пишакартал хьун бюхъантIиссагу. Цумацагу лаккучунал, хаснува жагьилминнал, оьрмулуву хьусса хьхьичIуннайшивурттая ххари хьуну, жу мудан хIарачат буллан бикIару минная жулва кказитрайхчIин буккултрахьгу бусан. Укунсса оьрмулул ххуллу чIаванияцIа язи бувгьуну, школалий дуклай буна элму ахттар дуллалаврихун багьну бур жулва лакку душ, Хъюйннал шяравасса Хизриева Ххадижат.

Имара Саидова
Уттигъанну ва Москавлив хьу­сса ХII-мур щалагу Аьрасатнал элмийсса ахттаршиннардал ва творчествардал конкурсрай гьур­тту хьуну, 1-мур кIану бувгьуну бувкIунни. Ххадижат ваниннингу гьуртту хьуссия республикалул даражалийсса жагьилтурал дянивсса конкурсирдай ва форумирттай. Ва буниялагу итххявхсса, гьунар бусса душ бушиву тасттикь хьуна жун ванил цила буттал шяравучу, бусса оьрмулий тарихрал ва географиялул дарсру дихьлай хъунмасса захIмат буллай ивкIсса бусравсса учитель Хизриев Оьмаханнуя пасихIсса мазрай чирчусса макьалалийнугу. Му макьала жу рирщуссия «Илчи» кказитрай.
Ххадижат дуклай бур МахIач­къалаллал 9-мур гимназиялий 11-мур классраву. Ва гимназиялийгу Хадижат занай бур гьануцIакул литература лахьхьайсса классравун. Шиккугу ванил цIа яла хьхьичIунну дуклакисса оьрчIал сияхIраву дур.
Ххадижат ва конкурсраву гьур­тту хьун цукун хIадур хъанай бивкIссарив ва хьхьичIунсса кIану бугьан цуксса захIмат хьуссарив бусан бувкIунни «Илчи» кказитрал редакциялийн.
— 9-мур классрая тихунмай жул лицейраву дуклакисса оьрчIал язи дугьан аьркинссар цалва пишалун аьркинсса хасъсса дарсру. На нава, оьрус мазрал литература куртIну лахьхьайсса класс язи бувгьунугу, архIала химиялул ва биологиялул дарсирдахунгу багьну бура. ХIасил, ттун гимназиялий лахьхьин гъира бакъасса дарс царагу дакъар. ЧIаванияцIава ляличIину ххирасса дикIайва оьрус мазрал ва литературалул дарсру. Гимназиялийгу жухь литературалул дарсру дишайсса учительница хъинну гьунар бусса, оьрчIру дарсирахух гьан буван кIулсса, куртIсса кIулшивуртту ду­сса бур. МунийхчIин жун литературалул дарсру хъиннура ххира хьунни. Ва классравун заназисса махъсса 2 шинал лажиндарай личIинува ххира хьунни ттун учительнал ва журналистнал пиша. МуницIун бавхIуну, цIанакул на бура уттинин чувчIав чивчуну, аьч бувну бакъасса Хъюйннал шяраваллил тарихраягу чичлай. Шяраваллил тарихрая чивчусса лу чичлай, итабакьин хIадур хъанай уссар Хъюйннал школалий тарихрал ва географиялул дарсру дихьлахьисса учитель Хизриев Оьма­хан. Оьмахан, 90-нния лирчу­сса шинну дунагу, школалий зий ур ва архIала му даву бакIуйн дуккан дуван хIарачат буллай ур. Ттунмагу ттула шяраваллил тарих кIулну бикIаву мурадрай, укун куртIну шяраваллил тарих кIулсса шяравучуная за лахьхьин хIарачатрай бура. Ялагу нигьачIий бура жулва тарих цIанава ябувну, луттирдай къачичирча, яла му кIулсса инсантал къабикIанссархха тIий.
Литература ххишалану ла­хьхьайсса класс язи бувгьунугу, ттун хъинну ххирар химиялул ва биологиялул дарсругу. Мунияту на, гьануцIакул химия ва биология лахьлай, гьашину Дагъусттаннал медициналул академиялувун дуклан буххан хIадур хъанай бура. Вай дарсру цирдагу хъинну захIматсса дунагу, чIаванияцIава ттун ми куртIну лахьлай, ахттар дуллансса гъира бикIайва. 10-11- классирттаву на чичав химиялул экспериментру буллалисса 3 даву. Шамилчинмур даву ттул хьунни сайки ца элмийсса цIушинна тIитIлатIисса даву. Вай давуртту гьан дурссия республикалул даражалийсса личIи-личIисса конкурсирдайн. Ца даву дуссия Дагъусттаннал зунттаву ва кьанив ххяххайсса уртту-тIутIал, ххяххияр­ттал физикалул ва химиялул анализру дуллалисса. На ттула элмийсса каялувчинащал ахттар дуллай бивкIра ми уртту-тIутIаву цумуниву циксса хайр бусса затру дуссарив ва миннул кумаграйну цуку-цукунсса азарду хъин дан бюхъайссарив. Исват хьунни бургъичIан гъанну, лахъну зунттаву ххярхсса уртту-тIутIи кьанив ххяххайминнуяр хайрсса ва инсаннал чурххан бузсса душиву. Ва даврищал ДГУ-рал элму ахттар дуллалисса оьрчIал конкурсрай гьуртту хьуну, ттун буллунни 1-мур кIану ва диплом. КIилчинмур даву дуссия Дагъусттаннал ва Ставрополлал мяъданнаясса навтлил физикалул ва химиялул анализ дуллалисса. Ва анализралгу чIалачIи бувна дагъусттаннал навт цимигу даражалул марцIсса ва куклусса бушиву Ставрополлалссаннуяр. Шамилчинмур даву дуссия Къазахъис­ттаннал навтлил химиялул анализ дуллалисса ва му личIи-личIисса металлацIа марцI буллалисса. Ва даврищал на гьуртту хьура Москавлив хьусса ХII-мур Аьрасатнал жагьилтурал элмийсса ахттаршиннарду дуллалисса конкурсрай. Му конкурсрал даврил хIасиллу дуллалисса комиссиялул оьвкуну, на лавгра Москавлив, ххув хьуми барча буллалисса форумрай гьуртту хьун. Москавлий ттун кIул хьунни Аьрасатнавусса дуккаврих гъира-шавкь дусса оьрчIру итххяххан баву мурадрайсса чIярусса проектру ва конкурсру дикIайшиву. Жулла республикалий, ттун кIулссаксса, хьхьичIунну дуклакисса оьрчIру гьуртту хьунсса конкурсру ва проектру хъинну чансса дур. Жун багьлай бур жулва хIарачатрайну, миннул хъиривгу бивзун, гьурттушинна дуллан. ХIасил, та форумрайнгу буттащал бувкIсса ца на бакъа бакъаяв. Цинявппагу оьрчIащал, миннал чирчусса элмийсса давур­ттал ахттаршиннарду дуван, бувкIун бия цалва-цалва преподавательтал, хIатта цаппараннащал профессорталгума бия. Ххуллул ва тийх ялапар шаврицIун бавхIусса масъаларттугу дузал бунни ттул нитти-буттал.
На ва форумрая зана хьуну махъгума ттущал та конкурсраву гьуртту хьусса оьрчIру ва душру шанма-мукьва журасса цаймигу конкурсирдавух гьуртту хьуру тIий буслай бур.
Ва проектраву нава гьуртту хьуннин ттун ххан бикIайва Аьрсатнавусса оьрчIру жулваминнаяр куртIсса кIулшивуртту дусса, оьрус­нал литература, оьрус мазрал грамматика ххишалану кIулсса, личIинува итххявхсса бусса. Та форумрай гьуртту хьун бувкIун бия Аьрасатнал билаятраясса 200-нния ливчусса оьрчIру. Форум нанисса шанмагу гьантлий жу куннащал кув кIул хьуну, дусшиврийсса ихтилатру буллай бивкIру. Тай оьрчIащал кIул хьуну, тайннал бусласимуних вичIидирхьукун, ттун бувчIунни жулвами дуклаки оьрчIругу кIулшивурттал ва тарбиялул чулуха тайннаяр ссалчIавгу ялавайсса бакъашиву. ТIайлассар, бия тайннавугу хъинну гьунар бусса, куртIсса кIулшивуртту дусса оьрчIру.
Жул форумрал даву най дия цалва-цалва элмийсса давурттал секциярттай. Ттулмур даву ххалдигьлагьисса экологиялулмур секциялий на кIул хьура Москавлиясса, хъинну гьунар бусса, лавайсса даражалул кIулшивуртту дусса оьрчIащал, профессортуращал ва цаймигу хьхьичIунсса пишакартуращал.
МахIаттал хьуну ливчIра ца хъинну итххявхсса, лавайсса даражалул кIулшивуртту дусса оьрчIал, на Дагъусттаннаясса бушиву кIул шайхту, «Зул Дагъусттаннай цумур валюта дуссар?» — куну цIуххайхту. Яла на ганан бувчIин буллай бура Дагъусттангу Аьрасатнал регион хъанахъишиву. Тамашасса иш бия ва куццуйсса кIулшивуртту дусса оьрчIан ляличIину жулвамур география кIулну бакъашиву. Бия тайннаву цаппара жува цукунсса, ци миллатрая буссарив кIулсса, жулва хIурмат-кьимат буссагу, цаппараннангу Халкьуннал шаэр Расул ХIамзатов цува кIулну унагу, му Дагъусттаннаясса ушиву кIулну бакъая.
Москавлив жагьилтурал форумрайнсса ттул цалчинсса аьрххи хьунни гихуннайсса дуккаврих хъиннува гъира бутансса, — буслай бур ва.
Мяйжаннугу пахру бан лайкьсса иш бур Аьрасатнал билаятраясса 200-нния ливчусса оьрчIру гьуртту хьусса хъинну агьамсса конкурсрай так цилла кIулшивурттайну хьхьичIунсса кIану лайкь був­сса жула лакку душния. Ванил кIулшивурттан лавайсса кьимат бишлай, И. М. Губкиннул цIанийсса Москавуллал Навтлил ва газрал университетрал профессор ур цала университетраву дуклан оьвтIий.
Ва форумрал лагрулуву итабавкьуну бур ХII-мур Щалагу Аьрасатнал жагьилтурал экологиялул, халкьуннал мюхчаншиву дуруччаврил «ЮНЭКО-2014» тIисса форумраясса тезисру дусса сборник. Му сборникраву рирщуну дур Къазахъисттаннал навт марцI буллалисса ва мунил химиялул анализ дуллалисса Ххадижат Хизриевал элмийсса давугу.
Му бакъассагу, Ххадижат ши­кку гьуртту хьуну, хьхьичIунсса кIанттан лайкь шаврихлу, форумрал коми­ссиялул барчаллагь тIутIисса чагъарду гьан бунни ванил нитти-буттайн, школалул директорнайн, элмийсса каялувчинайн, МахIачкъала шагьрулул КIулшиву дулаврил управлениялийн.
Жувагу жула чулуха чIа учинну Ххадижатлун цинма ччисса ВУЗ-равунгу бувххун, миллатрал цIа-кьини бюхттул дансса пишакар шаву.