Махъсса ппурттуву Дагъусттаннал Налогирттал федерал къуллугърал управлениялийн букIлай бур агьалинал аьрзри налогирттал органнал хъунисса налогру ласласаврия рязи бакъасса.
Ихтилат чIявучин дулун багьлагьисса ЕНВД-тур (единый налог на вмененный доход). Ва масъалалул хIакъираву ттун бувчIин бан ччива:
2015 шинал гьануми доходирттал коэффициент К2 гьаз шаврийн бувну, налогру хъуни хьуссар. Хъунисса налогру тIалав дуллалисса жул зузалт тIайлассар.
Жунма кIулсса куццуй, АьФ-лул Конституциялул 57-мур статьялийн бувну, гьарица инсаннал закондалул ккаккан дурсса налогру дулун аьркинссар. Законну тIурча жува альтернатив гьанулий бувчIусса депутатътуралли кьамул дуллалисса. ХIакьинусса кьини, Дагъусттаннал чIяруми районнай хIукму бувну бур 2015 шинал ялув кIицI лавгсса К2 гьаз бан.
Му коэффициент баххана къабувну, ларгсса 2014 шинал кунма бивтун бур так 26 райондалий: МахIарамккантуллал, Ахттиял, Рутуллал, Докъузпариннал, Сулайман-Стальскаллал, Курахиял, Хивуллал, Агъуллал, Къумтуркъалаллал, Лаващиял, Ккуллал, ЧIарадиял, Гергебиллал, Гумбетуллал, ТляратIиял, Шамиллул, Къизлардал, Тарумовкаллал, Хасавюртуллал ва ЦIуссалакрал, мукунна Дагестанские Огни ва Южно-Сухокумск шагьрурдай.
Цаппара депутатътурал тIурча Налоговый кодексрай ккаккан дурсса цалла ихтиярду ишла дурну, закондалий цIакь бувну бур районнал ва шагьрурдал бюджетравун нанисса доходру гьарза даву мурадрай кIантту-кIанттурдайсса къуллугъчитурал бувсса маслихIатру. МахIачкъала шагьрулия тIурча, шиккусса ишбажаранчитуран (предпринимательтуран) къатIааьн бивзунни ЕНВД чIаланну лахъ дуллалисса хавар.
ЦIусса ставкардай му налог тIалав дуллалисса налоговый инспектортал цала сипталий бакъарча мукун зузисса, закондалий ккаккан бувмурди щаллу буллалисса. Яни, налогру вайннал хIисав дуллалиссар МахIачкъала шагьрулул Мажлисрал ккаккан бувсса (30 декабрь 2014 шин №34-3) коэффициентрайн бувну. Мунийн бувну, 2015 шинал коэффициент К2 лахъ бувну бур 136 журалул давурттава, так 38 журалул давурттан (28%). Цаппара журалул предпринимательтураннив му ххюлий лахъ бувну бур. Масала, машлул ягу общепитрал идарартту зузи дан чIумуйсса аьрщи ларсминнан, агана миннал чIумуйсса ишла дан ларсъсса аьрщи 10 кв. метралияр хъуннасса духьурча. Гьаз бувну бур К2 кьатIувсса рекламартту дуллалиминнан (287%-райн бияннин), пассажиртал бувцуну заназиминнан (24%), машлул зал (ттучанну, павильонну) бусса кIанттурдай дахху-ласу дуллалиминнан, агана мунал бувгьусса кIану 5 кв. метралия ливчусса бухьурча.
Лахъ къархьуну дур налогру усру дуллалиминнансса ва дакьин дуллалиминнаясса, ссятру ва ичIаллил техника дакьин дуллалиминнаясса, мебель дуллалиминнаясса, агьалинал тIалавшиннардай сурат ришлашиминнаясса ва сурат ларсун, кино, видеофильмру дуллалиминнаясса, хIаммамирттал ва душевойрдал, парикмахертурал хIаллихшиннардахсса, мукунна велосипедру, щинай бигьай лыжарду, катерду, ичIаллил кьай-кьуй, хъатIайн-мажлисирттайнсса янна-ус прокатрай дуллалиминнансса, пюрунт ягу дагьантту кьукьаврихсса, машинартту бакьин баврихсса ва шюшаврихсса.
Вай кIицI ларгсса хIаллихшиннардал коэффициент бивкIсса куццуй ливчIун бур. Шиккува кIицI бан, ЕНВД-лул хIакъираву кьамул дурсса закондалул 1-мур вариантрай К2 цIанамунияр цукссагу лахъсса ккаккан бувну бивкIссар, амма яла цаппара хIаллихшиннардахсса налогру ца-кIива пунктрал лагь дан хIукму бувссар. ЧIалачIисса куццуй, предпринимательтал мунилгу рязи бувну бакъар.
Ялагу, МахIачкъалалив ишбажаранчишиву дуллалиминнан кIулну бикIан, налогру хъар хъанахъиссар ми идарартту бивхьусса райондалиягу.
Шагьру бавчIуну буссар 5 бутIуйх (зоналийх). Ми законнах бурувгун лахъ-лагь буллалиссар гьанусса доходрал коэффициентгу.
Яла ххирамур зоналувун (зона №1) багьлай бур Лениннул, Насруттиновлул, А. Султаннул, М. Оьмаровлул (Венгерских бойцов), И. Казаклул, Шамиллул, Казбековлул, Ахъушинскийл (Семендер поселокрайн кIурабаеннин), М. ХIамидовлул, Ярагъскийл, Дахадаевлул, Къоркмасовлул, М. ХIажиевлул (Лениннул цIанийсса майданния Ахъушинскийл проспектрайн бияннин), Данияловлул (Маркова), Буйнакскийл, Орджоникидзел, Ш. Аьлиевлул, Лаптиевлул цIанийсса кучарду, «Кавказ» федерал ххуллу (Ростов-Баку трасса), Ипподромрал район, муххал ххуллул ва аэропортрал чIаравсса кIанттурду, «Восточный» базар бусса кIантту (И. Казака, «Авиаагрегат» завод бусса кIану), «Дагэлектромаш» завод бусса кIанайсса ва цаймигу агьамсса кучардайсса базарду.
Ххюрагу зоналул коэффициентрал дянивсса тапаватшиву 0-10%-рал дур.
МахIачкъала шагьрулул Мажлисрал 2014 шинал ноябрь зурул 20-нний бувсса хIукмулийн бувну (33-2) 15 кв. метра дусса контейнердания кварталданий ласласисса ЕНВД 15 292 къурушрайн лахълай диркIун дур, баххана бувмур ХIукмулийн бувну му, лагь хьуну, 8738 къурушрайн дагьну дур.
Шиккува бувчIин бан, гьанусса доходрал коэффициент хъунма бувну бухьурчагу, налогру мукссара хъунисса дакъассар. Масала, налогоплательщикнал кварталданий 5 565 къуруш страховой взносрал дуллай ухьурча, хIукуматрал закондалийн бувну, 15 кв.м. дусса контейнерданиясса цасса налог дикIан тIий дур 3 173 къуруш (8 738-5 565=3 173), ЕНВД-лия страховой взнос дуккан дурну лирчIмур.
Страховой взносру тIурча – му гьунттий жува ласлантIисса пенсияр. Мурив зун хъунмасса ласун ччантIиссар.
Ялагу, хIакьинусса законнайн бувну К2-рал хIакъираву щинчIав куклушиннарду дакъассар.
Багьауттин Аьлиев,
УФСН-лул налогру дулайминнащал зузисса отделданул хъунаманал хъиривчу
ХIадур бувссар
А. Аьбдуллаевал
