Дагъусттаннал лачIунбуккултрал Аьрасатнал цачIундур команда 1-мур кIанайн дуккан дунни, Европанал первенствалий ххув хьуну. Бяст-ччаллу хьуссар мартрал 24-29-нний Польшанал Валбжих шагьрулий. ЛачIунбуккулт бивкIссар оьрмулул 23 шинавун бияннинсса чIава жагьилтал.
ХI.Аьдилов
57 килорал кIушиврий ххув хьуну ур Исмяил Мусукаев.
70 килорал кIушиврий ххув хьуну ур Ибрайхановхъал школалул вардиш увма, дунияллул жагьилтурал первенствалул ва Ярыгиннул Гран-прилул чарвитул призер Расул Арсанаьлиев. Ванал финалданий Украиннал лачIунукку Иван Кусяклул бархI щун бувну бур, марцIну ххув хьуну. Муниннингу ганал бух бувну бур Чехиянавасса, Белоруссиянавасса ва Армениянавасса муттаэтал.
Циняв цалва муттаэтал бух бувну бур цамагу Хасавюртлиясса лачIунукку Мурадин Кушховлул яла хъуннамур чурххал кIушиврий. Мурадин занай ур Олимпийский резерврал училищалийн МахIаммад ХIусайновлучIан. Ва ххув хьуссар ванияр хьхьичI Аьрасатнал чемпионатрай ва Ярыгиннул турнирданий. Финалданий Мурадин ххув хьуну ур гуржиял лачIунукку Георгий Мешвелдишвилияр. Шиккува бусан, ва бяст-ччалдануву гуржиричу ххув хьуну ивкIссания, тайннал хьунссия яла чIяруми мусил медаллугу, командарттава цалчинмур кIанугу. Мунияту яхI ххину бишин багьну бивкIссар дагъусттанлувнан ва 6:0 счетрайну жулама ххувгу хьуссар.
Чарвитул медаль ларсъссар 100 килорал кIушиврий Азирбижаннал командалухлу ччалли уклай ивкIсса жула ватанлув Аьли МахIаммадибировлул.
86 килорал кIушиврий ХI. ХIамидовлул спортшколалувун заназисса цIа дурксса лачIунукку Шамил КIудиявмахIаммадов хьуссар так 3-ма призер. Жула билаятрал чемпионатрайгу, хъунисса дунияллул халкьуннал даражалул турнирдайгу ххув хъанай ивкIсса, Аьрасатнал ца яла гуж бума спортсменнан къатIайлабацIу хьуну бур Азирбижаннал командалухлу уклай ивкIсса цала клубрава МахIаммадхIажи Хатиевлущалсса дандиуккавриву (6:7). ЛивчIми 3 бяст-ччалливу КIудиявмахIаммадов ххув хьуну ур.
М. Хатиев цувагу ух хьуссар финалданий Белоруссиянал лачIунукку Александр Хуштыннуяр. Мура чурххал кIушиврий чарвитул медаль ларсъссар МахIачкъалаллал «Динамолийн» заназисса, цува Македониянал командалухлу уклакисса Халил Зубаировлул.
Аьрасатнал командалуву медаль къаларсъссар так 61 килорал кIушиврий. Жулла командалуву му кIушиврий уклай ивкIссар Булат Батоев. Бурятнал лачIунуккул Батоев ух увну, личин увну ур кIилчинмур ккурандалия махъ.
Мура чурххал кIушиврий медаль дакъа ливчIун ур Азирбижаннал командалухлу уклай ивкIсса дагъусттанлув АхIмаднаби Гаварзатилов.
Аьрасатнал командалул дурххунни 3 мусил ва 3 чарвитул медаль, бувгьунни 1-мур кIану.
КIилчинмур кIану бувгьунни Гуржиял командалул (2:2:1), шамилчинмур кIану – Азирбижаннал командалул (0-2:2).
