Анаварсса бущилий инсантурал цIуллу-сагъшиврун хъунисса зараллу биян буллалисса, инсантал оьрмурдацIа буллалисса коронавирусрал инфекциялия агьали буруччаву мурадрай, республикалий чялишну зий дур вакцинартту буллалисса компанияртту. Вай гьантрай COVID-19 азардания мюхчан баву мурадрайсса вакцинартту бунни ДР-лул Архитектуралул ва градостроительст­валул комитетрал зузалтрал 63% коллективрал. ЧункIуй къалавгунма, цала идаралий бунни «Спутник V», «Ковивак» ва «ЭпиВак» вакцинартту.

Вакцинартту бан хьхьичI зузалтрал дунни медхъиривлаявуртту, биттур дунни цинярдагу медициналул чулухасса тIалавшиннарду.
Шиккува кIицI лаган, вакцинартту буллай байбивхьу­сса ппурттуву цалчин бувну бур Дагъусттаннал Архитектуралул ва градостроительствалул комитетрал председатель Незир ХIусайновлул.
– Жун бувчIлай бур вакцинартту баврийну бакъа жува ва оьсса балаллуща ххассал хьун най бакъашиву. Аьркин ба­къассар инсантуравун нигь рутлан, вакцинарттая нигьа бусан буллан. Статистикалул хIасиллайн бувну исват хьунни вирус хъиннура ягин хъанай най душиву ва мунийн данди бацIансса чарангу так ца вакцина бушиву, – увкунни хъунама архитекторнал.