ХIАЖИНАЛ АРС МАХIАММАДОВ АЬВДУЛБАРИ
Уттигъанну, цинявппагу бусурманнан ххирасса Рамазан зурул байбихьулий, хар-хавар бакъасса бивкIулул жуяту личIи унни уздансса тухумрал оьрчI, дакIнил хъиншиврул бутIа ххишалану буллусса Савдахъал ХIажинал ва ХъункIултIутIил арс МахIаммадов Аьвдулбари.
Увну ур Аьвдулбари 1955 шинал, апрельданул 19-нний Болниси тIисса Гуржиянал шагьрулий. Гиккува 1972 шинал къуртал бувну бур дянивмур даражалул школа. Ва шинал вайннал кулпат бивзссия Гуржиянава МахIачкъалалив. Яла МахIачкъалалив Аьвдулбаринал къуртал бувссар Политехнический техникум. Аьрали къуллугъ буллай ивкIун ур Бакуй. 1988 шинал къуртал бувссар ДГУ-рал юридический факультет, гара шинал ивтун ур Лакрал райондалул прокуратуралий следовательну. Гания махъ уссия Дагъусттаннал Соцобеспечениялул министерствалий юрист-консультну. 1994 шинал айивхьуна ишбажаранчишиву дуллай.
Аьвдулбаринал тIивтIуссар Дагъусттаннай цалчин стоматологиялул кьай-кьуй даххайсса ттучан. Ванищала архIал, цалва пиша кьакъабивтун, зий икIайссия адвокатну. Яла махъ тIивтIуссия адвокатътурал конторагу.
Чув, ци даврий зий унугу, Аьвдулбари ия лагма-ялттунащал хIал бавкьусса, дакI-аьмал хъинсса, хъинну паракьатсса, цала цува увгьусса, цала хъиншиврийнугу, дакI марцIшиврийнугу щалва жяматран ххира хьусса инсан. Аьвдулбаринал жяматрал дуллалисса давурттавух чялишсса гьурттушинна дайссия, ка-кумаг байссия, чIарав ацIайссия. Хъинну бювххунни жяматран ванал чIун дакъасса бивкIу. Аьвдулбаринал цанма ччисса Ларисащал цачIу, нахIусса кулпатгу дузал бувну, шама арсгу ликкурай ацIан увну, цалва-цалва ххуллурдайн бивчунни. Кьадар мукунсса бухьунссия, шамилчинма оьрчI щаллу увну 2 барз хьуннин цува аьпалувух ивхьунни.
Аьвдулбаринал бивкIулул хъуннасса кьурчIишиву кIидачIлай, жижара буллай буру ванал уссихь, кулпатрахь, арсурваврахь, гъан-маччанахь, агьлу-авладрахь, щалвагу жяматрахь. Цал гьав нурданул дуцIиннав, пирдавс-алжан нясив баннав. Махънал оьрмурдай барачат бишиннав. Амин!
ЧIурттащиял жямат
—————————————-
ОЬМАРДУЛ ДУШ
МАХIАММАДОВА ПАТIИМАТ
(Малланал ПатIимат)
Июльданул 17-нний, оьрмулул 94 шинаву, дунияллия лавгунни дакI-аьмал хъинсса, инсантуращал хIал бавкьусса, жяматраву бусравсса зунттал хъамитайпа Оьмардул душ МахIаммадова ПатIимат.
ПатIимат бувну бур Хъусрал-ЧIарттал шяраву 1920 шинал, ЧIаратусса Оьмардул ва Ккулатусса Къизал кулпатраву.
1944 шинал щар хьуну бур Хъусращатусса МахIаммадлун (Малла).
Гания шинмай ПатIиматлул ласнащал 40 шин дурну дур Ваччав. Ми шиннардий захIмат ххирасса, иминсса хасиятрал заллу ПатIимат щаллагу райондалул жяматраву бусравну бивкIун бур. 1984 шинал, лас дунияллия лавгукун, МахIачкъалалив оьрчIачIан бивзун бур.
Цила ласнащал ПатIиматлул хъунигу бувну ххуйсса ххуллийн бивчуну бур 5 арс ва 1 душ. Ванил хъуннасса аякьа дайва 20-нния ливчусса оьрчIал оьрчIаха, гайнналмигу оьрчIаха.
ПатIиматлул бивкIулул кьурчIишиву кIидачIлай, жижара буллай буру ванил арсурваврахь, душнихь, куявнахь, цинявппагу гъан-маччаминнахь. Алжаннул ххари баннав, рухI бигьаний дишиннав.
Ванин бакъасса оьрму оьрчIан, оьрчIал оьрчIан булуннав.
Хъусращиял, Ккуллал, Хъусрал-ЧIарттал,
Ваччиял жямат
——————————————
АЬЛИЛЛУЛ АРС АБАКАРОВ АХIМАД
Уттигъанну, оьрмулул аргъираву аьпалул хьунни Шахьуйннал шяравасса Абакаров АхIмад Аьлиллул арс.
Увну ур АхIмад Ростов-на-Дону шагьрулий Шахьуйннал шяравасса Аьлиллул (Алик) ва Ларисал кулпатраву 1970 шинал. Школа къуртал бувну махъ, увххун ур РИИЖТ-равун (Ростовский институт инженеров железнодорожного транспорта), ххуллурдалсса байсса пишалул факультетрайн. Махъ дуклай ивкIун ур Москавуллал машлул институтраву.
ЧIивину унува буттацIагу хьуну, АхIмад ччаннай авцIуссия цалва хIарачатрайну, цалва захIматрайну, чул бищунма, кумаг буванма чIарав акъа. Ва ия уххаву, авчIаву цирив къакIулну, зий, захIмат буллай аьдат хьусса жагьил. АхIмад зий уссия автосервисраву администраторну, мунищала архIал махъсса ацIрахъул шиннардий цува заллусса «Кураж» ххуйшиврул салон тIивтIуну, мунилссагу буллай.
АхIмад ия дакI тIиртIусса, инсаннан цащава шайсса ка-кумаг буван ччисса, лагма-ялттунащал авкьусса, шяраваллил жямат ххирасса, ххаллилсса жагьил.
АхIмад аьпалул шаврил кьурчIишиву кIидачIлай, дакIнийхтунусса жижара буллай буру ванал ниттихь Ларисахь, ссихь Самирахь, оьрчIахь, буттарссурваврахь Закиратлухь, Зунзуллухь, ниттиуссурваврахь ХIасаннухь, Идрислухь, Кариннухь, ссурахъаврахь, махъсса цинявппагу гъан-маччанахь. АхIмадлул рухI бигьаний дишиннав, ва захIматсса бивкIулул кьурчIишиву лялиян дувансса гуж биял хьуннав зун. Ванал кьисматрая кьувкьусса бутIа ххи бувну лякъиннав Заннал махъ ливчIминнал оьрмурдайн.
АхIмадлул чаннасса симангу, иминсса пишгу шяравучутуран, ванал дустуран тачIав хъамакъабитантIиссар, миннал дакIурдиву ва мудангу сагънува личIантIиссар.
Шахьуйннал жямат
———————————————-
Муил балайлун бивкIу бакъассар
Ларгсса нюжмардий жуятува батIул хьунни Дагъусттаннал халкьуннал балайчи, РСФСР-данул лайкь хьусса артистка Муи ХIасанова.
Творчествалул ххуллу байбивхьуну бур 1957 шинал паччахIлугърал балайлул ва къавтIаврил ансамбльдануву. ТIабиаьтралва ляличIисса чIугу, яргсса гьунаргу буллусса балайчи най бунува хьуну бур ансамбльданул солистка ва кутIасса чIумул мутталий машгьур хьуну бур щалла республикалий. Хъунмасса манзил къалавгун, Москавлив Щаллагу дунияллул жагьилтурал ва студентътурал фестивальданий лайкь хьуну бур «За отличную работу» тIисса СССР-данул Культуралул министерствалул арцул медальданун ва лишандалун.
Буссия Дагъусттаннал телевидениялул ва радиолулул хорданул бакIщаращуй.
Муи бия республикалул магьирлугърал «мусил фондраву» яргсса цIа чирчусса, Дагъусттаннал цинявппагу миллатирттан багьавай ххира хьусса, яла-ялагу хъунмур никирал инсантурал дакIурдиву ликъаххайсса аьш кьаритан бювхъусса цIанихсса балайчитуравасса ца. Унгу-унгусса байраннуну шайсса диркIун дур зунттал щархъаву Муи ХIасанова, ТIагьират МахIаммадова, РахIимат ХIажиева, СултIанат Кьурбанова гьурттусса концертру. Тай шинну хIисав дувай Дагъусттаннал хорданул «мусил векран».
Дуниял кьаритан урчIва гьантлул хьхьичI Муи ХIасанован хьуссия оьрмулул 84 шин. Миннува сайки 57 шин – балай тIий. Цуппа бугьара хьурчагу, ахиратравун гьанцIа яхьуну бия ваниву гюргу тIисса чIугу, лекъащайсса гьавасгу, хъунмав къашайсса гьунаргу. Бусравсса балайчи таманссалилва гьуртту хьуссар «Щунудагъ» фестивальданийгу. ХIакьсса балайчинал буруккингу, къумашивугу дикIайва муниву халкьуннал балай бивчIан буллай бушивриясса, жагьилсса балайчитал фонограмма ишла дуллалаврийну хъирив нанисса никираву гьунар лещан буллай бушивриясса.
Цуппа дунияллия гьарчагу, ванил балайлунгу, Дагъусттаннал магьирлугърал цIаний бувсса захIматрангу бивкIу бакъассар. Алжаннул ххари баннав, рухI хъинний дишиннав!
«Илчи» кказитрал редакция
