Июльданул 16-нний Дагъусттаннал БакIчи Рамазан АьбдуллатIипов Москавлив хьунаавкьунни Аьрасатнал Федерациялул ХIукуматрал Председатель Дмитрий Медведевлущал. Хьунабакьаврий ххалбивгьунни давудакъашиврул масъала. Дмитрий Медведевлул мукъурттийн бувну, региондалий давудакъашиврул ккаккияртту лахъсса дунугу, республикалул каялувчинал тамансса давуртту дуллай ур халкь давурттал щаллу баншиврул, миннавух жагьилмур никгу. Тиккува ххалбивгьунни демографиялул масъалагу. «Дагъусттаннай демография ххуйсса бущилий хьхьичIуннай най дур. Амма муниха лавхьхьуну аьркинни буллан чIявусса оьрчIал яслирду ва садикру, жулва инсантураща оьрчIру ми учреждениярттал щаллу буллан бюхъаваншиврул», — увкунни Р. АьбдуллатIиповлул. Дагъусттаннал БакIчинал АьФ-лул ХIукуматрал Председательнахь бувсунни республикалий хъинчулиннайсса дахханашивуртту хъанай душиву, хаснура промышленностьрал ва экономикалул бутIраву. «Жу ляличIисса къулагъас дулланну АьФ-лул Президентнал майрал хIукмурду дузрайн буккан баврил иширттах. Хаснува яла агьамми масъаларттавасса ца хъанай бур дуккаврил ва школарду гьарза баврил, цIуллушиву дуруччаврил масъалартту. ДукIу бувссар цаппара предприятияртту, миннувух бур Внешэкономбанкрал ва «Нафта Москвалул» кумаграйну бувсса хъунмасса предприятие – Каспийскаллал пюрунтирттал завод, мунийну жуща бювхъунни 600 зузи кIану дузал бан. Ттул пикрилий, давудакъашиву духлаган дан хьунссия сезондалийсса зузи кIанттурду щаллу баврийну. Жу байбивхьуру къюмайтIутIи бугьаву кластерданул журалий дуллан. ДукIу бугьарду 2 азарда гектарданийсса къюмайтIутIул багъру, миннувух бур конъякру дайсса заводирттал директортурал кумаграйну бувгьуссагу. Гьашину бугьан най буру 3 азарда гектарданийсса. Мунийну жу щаллу барду 10 азара инсаннансса сезондалийсса зузи кIанттурду. Миннал харж бур 20-35 азарда къурушру», — увкунни Дагъусттаннал БакIчинал. Ванал мукунма бувсунни Д. Медведевлухь Табасараннал райондалий Дарвагчай тIисса шяраву «Дагестанский завод игристых вин» предприятиялул кумаграйну бувгьуну бушиву 750 гектарданийсса къюмайтIутIул багъру, миннуя райондалул бюджетравун сайки 5 млн. къурушру налогирттал дучIайсса душиву. «Жу дачин дарду щаллусса программа, буллай буру мукунма вил кумаграйну итадаркьусса арцух цIусса оьрчIал садикру. Цал архIал буллай буру садикрачIа байбихьулул школа. ХIатта зунттал районнай буллалисса садикру бур ттизаманнул стандартрайнусса», — бувсунни Дагъусттаннал БакIчинал. Ганал мукунма бувсунни цал архIал гьаз буллай бушиву харжругу, — Президентнал ХIукмулийн бувну дукIу учительтуран ва духтуртуран харжру ххи бувну бур 25 процентрал. «Дагъусттан яхъанай бур цIусса шартIирдаву, халкь хIадурну бур дузалшинналул давуртту дуллан, республикалий цалчин щаллу дурну дур Совет Союз пасат хьуну махъ лайкьсса правалул ва экономикалул шартIру», — увкунни Дагъусттаннал БакIчинал. Дмитрий Медведевлул бувсунни Дагъусттаннай дуллалисса циняв дахханашивурттая рязину бушиву билаятрал каялувчитал.
