ХIасаннул душ Загълиева Рая
Вай гьантрай хар-хавар ба­къасса апатIрал жуятува личIи бунни уздансса тухумрал душ, цила дакI хъиншиврийну, марцI­шиврийну, дакI марцIну бивхьусса захIматрайну щалла щарнингу, миллатрангу, респуб­ликалул кIулшиву дулаврил аралувугу дазу дакъа бусрав хьусса, яргсса цIа кьадиртсса Загълиева Рая ХIасаннул душ. Щалла щарнин бювххунни ванил чIун да­къасса бивкIу.
Хъуннасса кьурчIишиву кIи­дачI­лай, дакIнийхтунусса жижара буллай буру ласнахь, арсуваврахь, щалвагу Загълиевхъал авладрахь. Махъминнал оьрмурдай барачат бишиннав. Оьрмулул къаувччуну зул агьулданий инсан яла къагьаннав! Раял рухI хъинний, чурх кIукIлуний бишиннав! Алжаннул ххари баннав! Щалвагу Хъусращиял жяматрал дакIурдиву абадлий личIантIиссар Рая Загълиевал яргсса цIа ва чаннасса аьпа.
Хъусращиял жямат

———————————

АЬВДУЛЛАГЬЛУЛ АРС
АЬЛИЕВ МАКЬСУД
Вай гьантрай мукьцIал хъанай бур, хьхьирий апатI хьуну, нязаннивсса бивкIу нясив хьуну Аьлиев Макьсуд Аьвдуллагьлул арснан.
Макьсуд увссар 1994 шинал май зуруй ТIулизуннал шяраву Аьвдуллагьлул ва ХIуруннул кулпатраву. Дуклай ивкIссар ТIулизуннал байбихьулул школалий, 9 класс къуртал бувссар ШавкIуллал школалий, 11 класс буккиннин дуклай ивкIссар Гъумучиял лицейраву.
2011 шинал школагу къуртал бувну, дуклан увхссар Дагъусттаннал медициналул академиялувун (лечебный факультет), къуртал буллай уссия 3-мур курс.
Макьсуд ия дуккавриву итххявх­сса. Хъинну ххуйну къуртал бувна школагу, академиялувугу дуклай ия ххуйну, цайнува цува, щийнчIав багьан къабивтун, булайва сессияр­тту. Хасиятравугу хъинну авкьусса ия, хъяй, пиш тIий акъа ихтилат къабайва, ванал лахъсса чIу тачIав къабайва, цинявннащал авкьусса, дусъсса ия. Спортрахунгу агьну ия, гьуртту шайва ВУЗирттал дянивсса ва шагьрулул соревнованиярттай. Лаккуйн левчуна ачайва, биривсса гьантта шяраву гьан буван ххирая. Ванал канила къадуккайсса даву къадикIайва, лапва ххирая техникалуха, электричествалуха зун. Дуллансса давурттал, чаннасса пикрирдал, хияллал виувцIуну унува, жиндралсса хьхьирил щатIал бат увну гьан унни ва ххаллилсса жагьил. Макьсуд цинявннанагу ххирасса ия, школалий архIал дуклай бивкIминнангу, академиялуву архIал дуклакиминнангу, шяраваллал инсантурангу, ва кIулсса цинявннанагу. Мунил барашиннанугу хьунни ва махъва-махъсса оьрмулул ххуллийн тIайла уккан ТIулизуннал шяравун бавтIсса дазу-зума дакъасса инсантал, машинар­тту. Ва дуклай ивкIсса Медициналул академиягу щалва бия дягъулий, улттуйн, лухIисса ленталул вив ларсун, лархъун дия ванал сурат, ва дуккаврил идаралул кказитрайгу бия архIал дуклакиминнал, преподавательтурал ванал нитти-буттахь ва гъан-маччаминнахь буллалисса жижара.
Макьсудлул бивкIулул кьурчIи­шиву кIидачIлай, жижара буллай буру ванал нитти-буттахь, уссурваврахь, гъан-маччанахь, щарнил агьулданухь, ванал дустурахь. Цал бунагьирттал аьпа баннав, рухI хъинний дишиннав, алжаннул ххари аннав.
ТIулизуннал, ШавкIуллал, ГьукIурдал жямат

————————————-

МУТIАЛЛИБЛУЛ АРС ЖАБРАИЛОВ ИСМЯИЛ
Хархавар бакъа рирщусса цIуцIаврища ххассал къавхьуну (тунну бувцун), цанна 50 шин хьун шанма гьантлул хьхьичI аьпалу­хьхьун лавгунни Карашрал шяраватусса МутIаллиблул арс Жабраилов Исмяил.
Исмяил увну ур 1964 шинал Карашрал къутандалийсса шяраву. Ккалай ивкIун ур гиккува школалий.
ЧIавану унува ниттицIагу хьуну, цалва оьрмулул хIарачат хъунмурчIин цува буллай аьдат хьусса уну тIий бухьунссия, чув ссаха зий ухьурчагу, итххявххун, захIматрая нигьакъаувсун зузисса инсан ия Исмяил. Мунин лавхьхьусса тIайлабацIугу, лябуккугу хъанай бия мунал оьрмулуву, багьу-бизулуву. ЯбацIанну гьарза-гьартасса къатригу дурну, цайми-цайми мурадругу щаллу бувну, цаннал хъирив ца увсса шама арсгу хъуна уллай, аьзизсса кулпатращал талихIрай яхъанай уссия Исмяил. Амма му талихIрал хъунмур бутIа хьхьичIа кьувкьуну лявкъунни кьурчIисса кьадарданул. Ци бан­ссар, му Заннал биялалийсса зат бур.
Лялиян дан захIматсса дард-хажалатгу кIидачIлай, дакIнийх­тунусса жижара буллай буру Ис­мяиллул кулпатрахь Марианнахь, уссурваврахь ХIажинахь ва МахIаммадлухь, ссихь Аьишатлухь, буттауссихь МахIаммадлухь ва махъсса циняв­ппагу гъан-маччанахь.
Исмяиллул бунагьирттал аьпа баннав. РухI бигьаний дишиннав.
Карашрал жямат

—————————————

МЯММАЛ АРС БАРЗУЛАЕВ МУХIАММАД
Оьсса цIуцIаврил ххяппулущату ххассал къавхьуну, оьрмулул 58 шинаву, ххирасса Рамазан зурул дайдихьулий, аьпалухьхьун лавгунни ххуйсса, хъунмасса Барзулавхъал тухумраву хъун хьусса, му тухумрал бакIну ивкIсса Барзулавхъал МухIаммад.
МухIаммад увссар 1956 шинал Кьубиял Хъун шяраву, цIа дурксса ризкьичи – яттихIухчу Барзулавхъал Мяммал ва Ися­хъал Умукусуннул кулпатраву. Кьубав 7 шинал учкъулагу къуртал бувну, увхссар дуклан Лаващиял райондалийсса ЦIахъардал дянивмур даражалул учкъулданийн. Мугу къуртал бувну, увхссар Мелиоративный техникумравун. Му къуртал байхтува увцуссар аьралуннавун къуллугъ буллан. 1979 шинал 3 шинайсса армиягу лавхъун, цалва пишалий зий уссия. Яла зий уссия ттучаннайн кьай-кьуй диян дуллай экспедиторну. Му даврий зий 8-хъул шинну хьуссия. Мунияр махъсса 10-хъул шинай уссия лухIи ризкьилуха зий. ЗузиминначIагу, жяматрачIагу МухIаммад лавайсса хIурматрай икIайва. Ппу куна чумартсса, ка тIиртIусса, усса кIанугу чIюлу бувайсса ия аьпа биву.
Ванал цалва ххирасса кулпат Заремащал 2 арс ва 3 душ лахъа-хъунгу бувну, тарбиягу дуллуну, шанмагу душгу, ца арсгу щаллу бувну, цала-цала кIанттай бур.
МухIаммад лавайсса бусраврай ия Кьубавгу, Ттурзийннал шяравугу, шагьрурдайсса кьубиячIагу. Ванил барашиннану хъанай дия ванал бивкIулул гьантрай я щархъая, я шагьрурдая укъавкIсса инсан къаливчIунни.
МухIаммадлул ца ххуйсса хасият цамургу дия – я щархъай, я шагьрурдай, я цанма, ягу цува кIулсса бивкIу, бу­кку гьан къабитайва, цува чув ухьурчагу. Цува лявхъусса Хъун шяравун лавгнийгу, цалла гъаншиврул кьанкь дияйначIангу, къаша-шайначIангу къалавгун къаикIайва.
Мяммал МухIаммад жучIавату лагаврил хъуннасса кьурчIишиву кIидачIлай бур кIирагу шяраваллил жяматрал, шагьрурдайсса кьубиял, му кIулнал чулухату жижара буллай бур кулпатрахь, арсурваврахь, душварахь, Барзулавхъал щалвагу агьулданухь, МухIаммадлул уссийхь, кулпатрахь, куявтурахь. Ванан къабуллумур, ванал циняннанмагу булуннав.
Я Раппий, я Аллагьутааьла, МухIаммадлунгу алжан нясив баннав, гьав нурданул чанна лахъан даннав, абадул къаттагу, рахIатсса, кIукIлусса паммалул шануну хьуннав!
Щалагу Кьубиял жяматрал, кIулнал, гьалмахтурал-дустурал цIания — Оьмахан

————————————-

БАШИРДУЛ ДУШ ХIАЖИЕВА БАДИРА
Лавмартсса цIуцIаврища ххассал къавхьуну, дунияллия лавгунни, Хасавюртлив яхъанахъисса, КIундиннал шярава­сса цIанихсса балайчи, ххаллил­сса хъамитайпа, Баширдул душ ХIажиева Бадира.
АцIния мукьра шинай КIун­диннал культуралул клуб­рай каялувшиву дурссар Бадирал, Таджикисттаннайн бизаннин лакрал балайрдал сий гьаз дуллай, лакрал культура ларай дуллай бивкIссар. Мунин кулпатращал 27 шин Таджикисттаннай дуван кьисматну лявкъуссар.
Апрель зуруй бувксса «Илчилул» 13-мур номерданий дуссия ПатIимат Рамазановал Бадираятусса хъуннасса макьала «Миналий цIа дусса цIа ххуйсса булбул» тIисса. Муния махъ аьлимчу Халил Халиловлул макьалагу дурккуна ПатIиматлухь Бадираяту чивчуну тIий барчаллагь тIутIисса.
Бакъассар утти жул Бадира, «миналий цIа дусса цIа ххуйсса булбул», шеърирду ляхъан баврил пагьмугу бусса, тамашачитал хIайран банну балай учайсса гьунарданул заллу, ххаллилсса хъамитайпа.
ХIажиева Бадира дуния­л­лия лагаврил кьурчIишиву кIидачIлай буру мунил ласнащал, арсурвавращал, уссищал, гъан-маччацириннащал ва махъсса щалвагу агьлу-авладращал. Цил бунагьирттал аьпа баннав, алжаннул ххари буваннав.
КIундиннал ва Лахъирдал жямат