Мяйжаннугу хIакьинусса жулва оьрмулуву интернетрал бияла, каши хъинну хъуннасса дур. Ва ххуллухгу «Фейсбукраву» лакку оьрчI дунияллул зуманий, ненец оьрчIащал, «Илчи» кказит ккалаккисса ккавккун, махIаттал хьуну бивкIру, жула лаккучу акъасса дунияллул мурцIу бакъар тIий.
Хъинну ххаригу хьуру та дунияллул зуманивгу жулва «Илчи» кказит бивсса ккавккун. Ва ххаллилсса лаккучунащал цукун дахIаву дан хъинавав, цукун хьунабакьин хъинавав тIий бунува, жул талихIран, хъиривмур кьини Къуйчиев Жабраил цува «Илчи» кказитрал редакциялийн увкIунни. Най унува чIалан икIай яхI-къирият дусса, захIмат буллай аьдат хьусса, кьянкьасса зунтталчу цувагу. ХIасил Ккуллал шяравасса Жабраил (Жабало) Къуйшиевгу цалва буллалисса ихтилатрайнува муна мукунсса ушиву чIалай бия.
Имара Саидова
Жабраиллул бувсунни цува та дунияллул зуманивсса Ямал полуостроврайн бакIрайн агьсса куц:
— ЦIусса Уренгойрай ялапар хъанай уссар Щардал шяравасса ккарччал хIакин ЦIаххаев Мямма. ЦIаххаев Мяммал дур «Уренгой Роставто» тIисса, цува заллусса, хъунисса машинартту бусса фирма. Му фирмалий зун кунмасса оьрчIру ххал бува тIий маслихIат ккавккун бия архIал аьралуннаву къуллугъ буллай ивкIсса, цала хъинсса гьалмахчу, ттулгу буттал хъинирву, Ккуллал шяравасса МахIанмадов (Оьрусхъал ) Шамиллухь. Ванал машинарттал фирма, хIукуматрал фирмардащал хIала-гьурттуну, Ямал полуостроврайсса «Бованенково» тIисса газ буккан бувайсса мяъдандалий вышкарду дацIан дувансса хIаллихшиннарду дуллалисса давуртту дуллай зий дуссар. Му фирмалийсса машинарттай зун бувцунну жугу. На навагу уссара Ккуллал райондалийсса МЧС-рай зий. Ттулла даврия 5-6 зуруйсса отпускгу лавсун, цукун 
шайрив ххал баннача куну, рязий хьуну, лавгссияв нагу. Жул бригадалул хъунама Мяммал дурсса кьутIилийн бувну, тIайлану харжгу буллуну, дукиялуя тIайла хьуну, та бявкъусса кIанай лаххайсса лаххиялуйн бияннин, гьарзатрал дузал буллалаврия рязийну бивкIру. Жу жувагу зий, ялапар хъанай бивкIру инсантал янин ххал къашайсса авлахърай. БакIрайва тиккун нанини жухь бувсуна халкьуннащал цукунчIавсса связь дугьан шайсса иш тикку бакъашиву. Нагу, шилава най унува, бизар къахъанан, шаппа буцири «Илчи» кказитругу лавсун лавгра. Тай кказитругу, тайннангу ккаккан буллай, цимил бувккунугу, ялагу, зана бикIавай, ккалайнма бивкIру. Ца ппурттуву дакIнийн багьунни тайннащал «Илчи» кказит бувгьусса сурат рищун. Тикку жу кIул хьуру тиккува ялапар хъанахъисса ненецтуращал. БакIрай жу тиккун бувкIсса чIумал тайннал халкь жуя ххивуну нанисса кунма бикIайва, жул хIал бувчIиннин цукунчIав хIала бухлай бакъая. Жулва Дагъусттаннаясса инсан, цуксса захIмат буллан, зун ччисса унугу, цукунчIав кIай инсантурал даврийн кьамул уллай бакъая. Жугу, ва шиккун жува зун бувцусса Мяммал бусравшиврийн бувну, бакIрайн багьру шиккун. КIа бия 40-50 градус дякъил дусса, кIинтнил чIумал дакъа даву къадикIайсса кIану. ХъунмурчIин шикку ялапар хъанай, захIмат буллайгу бия ненцы ва ва полуостроврай ялапар хъанахъисса оьрус. КIа океандалул ялувсса, хъинну бявкъусса кIанттай газ буккан буллалисса давурттай зузисса халкь хIукуматрал щаллу бувну бия чIярусса хIаллихшиннардал. КIайннал снегоходру укра бензиндалул щаллу дуллай дия. ХIатта жу миннай мяш хъанай бивкIру, зунсса, захIмат бансса кIанугу буну, захIматрах лайкьсса багьагу ласлай зий буну тIий. Та островрай зузисса циняв халкьуннал шагьрурдай къатри машан ларсун дуссар тIий бия. Аммарив тайннаща, вардиш шаврил, тикку бакъа цамур кIанттай цукунчIав ялапар хьун къабюхъайсса бия.
Цивппа тай халкь, «чукчахъул», къуркъасса, дунияллул хавардая архсса халкьри тIий, жува сан къабуллай бикIару. Аммарив утти на му кIанттущал къарязийра. Бакъая тай мукун къуркъасса. Телевизор, телефонну ва цукунчIавсса цайми связьру дакъасса кIанай, тайннан кIулну бия Дагъусттаннай 40-хъул миллат цачIуну ялапар хъанай бушиву. ХIатта чIявуми оьруснангума кIулнувагу къабикIай Дагъусттан чув буссарив, микку ца ялапар хъанай буссарив. Вай махIаттал хьуну бикIайва зу мукун, циняв бавкьуну, цукун ялапар хъанай бикIару тIий.
«Зун ча кIулли мукунсса затру?», — тIий, махIаттал хъанай бивкIру жугу. КIулну бикIайва миннан дагъусттаннай «лакцы», «даргинцы» бушиву, цIухлан бикIайва минная.
Жул бригадалуву 4 машиналий 8 оьрчIгу, 1 механикгу зий бивкIру. Жу бивкIру ца-ца машиналий кIи-кIия чут-чутну зий. Ца ппурттуву, на ттула гьалмахчунащал машина бакьин буллай унува, увкIунни снегоход зия хьуну дур тIий ца оьрус оьрчI. Жул, шофертурал, дянив дуссия машина зия хьуну хьунабавкьусса кIанай цукунчIав чIарах къауккансса кьутIи. Оьрус оьрчIру цивппагу, жул хIал бувчIукун, ци-бунугу цIуххин, кIул буван, цалва оьрусначIаннияр, жучIан бачайва. ЖучIан увкIсса ганал цIувххунни жухь ХIасанов Марсель тIисса дагъусттанчу кIуллив зун куну. На ура, ххал анна, цIуххинна цу усса урив му тIий, ванал цIа-бакI чичлай. Яла увкунни ванал: «Он был лакец, цукун ура», — куну. Дунияллул зуманив оьрус оьрчIал лакку мазрай цIувххукун, буниялагу махIаттал хьуну ливчIру. Яла кIул хьунни ХIасанов Марсельгу жуярва хьхьичIсса шиннардий шикку зий ивкIсса ккуличу ивкIшиву. КIа оьрус цувагу ия ттул оьрмулувусса. Жулвамур машина бакьин буллай унува на, хьхьувайгу чани бусса (полярные ночи) чIун дуну, хьхьу уттара дурну, кIаналмургу снегоход дакьин дував. Гай, жулва оьрчIру кунма, техника датIин, дакьин дан хъит бусса къабикIайва. Яла ва снегоходрал заллу ур ттун дансса хъиншиврух луглай, «на вин ци хъинбала бави» тIий. Пишкаш дунни ганал ттун бюрунттул бурчуя дурсса бюрунттул хьхьури.
КIикку ялапар хъанахъисса инсантал циняв бия, цанна ккаккан дурсса аьрщарай, 700-хъул бюрунттив бусса илхъирду ядуллай. Ми илхъирдангу цайминнал аьрщарайн лахъансса ихтияр дакъая. Цивппагу вардиш бувну бия хIухчу акъана лухччинийх, дуканмуних луглаги бувну, итабавкьуну. Инттухунмай яла ми лагайсса бия баххан. КIай инсантурал лаххиягу дия бюрунттал бурчуя дурсса. «Малица» тIисса дикIайва, рахIурду куннасса, ялтту бурчул чухъригу лаххайсса, цалла дурурххусса лаххияртту, мукуннасса журалул, лахъсса кьярживгу дусса, усругу дикIайва. Кьянкьасса халкь бия мяйжаннугу, кIа дякъивух, кIай бюрунтталссагу бувну, снегоходирттай жущал архIал зугу зузисса.
ЦIухлан бикIайва «лакец» тIисса мукъул мяъна цир тIий. На ура бувчIин бан къахъанай, лакец му лакрал миллатри, лаккучури тIий. Му цIуххаврил мяънагу яла бувчIин бунни, цачIава «ненец» тIисса му кьянкьасса, цил икIайкунсса адаминар тIий. Жул хIал бувчIуну махъ, тай оьрус махIаттал хьуну бикIайва, зу, мукун даву дан кIулсса оьрчIру, частниктурачIа циван зий буру, хIукуматрал даврийн циван къалагару тIий. Зун зунма дахьва бувчIунни жу цукунсса буссарив, цинявннан къабюхъанссархха му бувчIин буллай занан тIий бивкIру. Тайннан бия жущава, цащава кунма, бигьану оьрму бутлан хъанай бусса ххай. Жу цачIу зузиссаксса хIаллай тай оьрус цивппагу, дустал хьуну, жучIату букъакьлан бикIайва. МахIаттал хьунсса затру чIявусса бикIайва. КIайннал лажин, кару шюшайссагума чIалай бакъая.
Тикку жу ялапар хъанахъисса «балокру» тIисса яттирдайсса, ягу чанардайсса къатри дикIайва цимурцаннул дузалсса. Ми «балокру» цивппагу жува ца кIаная гамур кIанайн бизлазини жущалва ххюрхху бан бюхъайва. БучIайва тай жучIан «балокирдавун» хъамалу бюрунттал дикI ларсун, цалва бувгьусса балугъру лавсун, жущал архIал чяй хIачIан. Жугу тай жура дурсса лакку дукрардай хъамалу байссия.
Ялагу ттунма тикку хъинну асар хьунни тайннал бивкIу буччайсса куц. ТIаннул къуршилуву, чаналий ивхьуну, архну, лахъсса кIанттурдайн увцуну, кIикку кьаитайсса ур. КIинттул чIумал, къурши бансса тIама лякъиннин, зурдардий ливтIусса инсантал цащалва бувцуну заназисса чIуннугу шайсса дия. ЧIалан дикIайва архния бюхттулний хIатталур тIисса царай ккучу-ккучунну. Инсан ивкIуну ми цукунчIав аьтIун къабикIайсса бур. АьтIаврийну шайсса цичIав бакъасса чIалай, нахIакьсса буруккинтту къабайссар цал тIий бия. Муниятур цайн «ненцы» — кьянкьами чайсса тIий бия тай.
Ялагу махIатталсса иш бия та дякъиву, микробру литIлатIиссар тIий, цукунчIав шяра диллай дакъая, цуксса аькъирчагу температура гьаз шаву, хъугьу учаву дакъая тикку.
Хъуннасса личIишиву дия тайннал ва жулва оьрчIал дянивгу.
Зун бикIайва оьрус, ахттайнсса канай, чяй хIачIлай, анавар къабуклай. Жулва шиха бувкIсса оьрчIру, гъалбарцIру кунма, бацIаву дакъа зун бикIайва. Жул даврил ялув авцIусса Харченков тIисса хъунаманан му иш хIисав хьуну, тайнная даву тIалав дуллан икIайва. Тай тIурча бия хIукуматрал даврий анавар къабувккун харжру ласлай зий. Махъунмай бувкIсса чIумал жул хъунама ЦIаххаев Мяммал бувсунни хъунама зул даврия хъинну рязину ия тIий.
Ккарккунни ттун тикку «северное сияниегу». Ца караматну ссавния чIалай дия аьщарайн дияннин дагьлагьисса чаннал къяртри. Тиккусса даву дацIан дайсса дия инттухуннай гъилишиву дагьлан диркIукун. Марххалтту баслай, машинартту щинавун бюкьлай, бу-буний кьабивтун, хъиривмур шинал кIи дучIаннин ялугьлан багьайсса бия. Жугу май зурул дайдихьулий вертолетрай бувкIру махъунмай ЦIусса Уренгойрайн. Тичча Уренгойрайн бияннингу дур 1000-хъул километра. Уренгойрая махъунмай жу циняв, куннал кув баххана буллай, ца баххан тIайла бувксса машиналий бувкIру. ХIасил ххал хьунни ттун щаллара дунияллул ххуйшиву, ххаллилшиву.
