Ноябрь зурул 20-нний Дагъусттаннал медициналул университетраву тIивтIунни «Медицинский и социальный уход» тIисса, WorldSkills Rossia компетенциялийн багьайсса пишардал кIулшивуртту дулаврил хасъсса центр. Шикку гьуртту хьунни ДГМУ-рал ректор Сулайман Маммаев, ДР-лул Халкьуннал Мажлисрал ЦIуллу-сагъшиву дуруччаврил ва социал политикалул комитетрал председатель Висампаша Ханаьлиев, ДР-лул цIуллу-сагъшиву дуруччаврил министрнал хъиривчу Раиса Шахсинова, «Успех» тIисса Республикалул жагьилтал давурттал дузал баврил центрданул каялувчи Тамирлан Бугъанов ва цаймигу.
Цала ихтилатраву Сулайман Маммаевлул кIицI лавгунни Центр тIитIаву, вузран бакъассагу, щалвагу региондалун хъуннасса агьамшиву дусса ишну хъанахъишиву.
– Жулла республикалий чансса бакъар медициналул ва социал кумагру аьркин багьлагьисса инсантал. Умуд бур укунсса тIалавшиннарду дусса инсантуран лавайсса даражалул кумагру бан бюхъайсса пишакартал хIадур байсса Центр тIитIаврия хъунмасса мюнпат хьунссар тIисса. Центр шикку хIасул баву хьуссар ДГМУ-лул студентътурал хIарачатрайн бувну.
Махъсса шанна-мукьра шинал дянив ДГМУ-лул колледжрал студентътурал республикалул, Аьрасатнал ва дунияллул даражалийсса чемпионатирттай хьхьичIунсса ккаккияртту хьун даврийну мяйжан бувссар пишалул даража лавай баву мурадрайсса Центр тIитIаврихсса мюхтажшиву душиву,– увкунни Сулайман Маммаевлул.
Дянивми ва мюрщими медициналул персонал хIадур байсса цIуну тIивтIусса Центрданун лавайсса кьиматру бишлашисса ихтилатру бунни Висампаша Ханаьлиевлул ва Раиса Шахсиновал.
Хъирив Сулайман Маммаевлул хъамаллувран ккаккан бунни «Центр сестринского ухода – дом престарелых», «Стационар – хоспис», «Работа в домашних условиях» тIисса ва цаймигу зонарду бусса Центрданул кабинетру.
Мероприятиялул лагрулий хьунни WorldSkills чемпионатирттайн хIадур шаврил масъаларттал хIакъиравусса заседаниягу, ккаккан бунни стационарданийсса медициналул ва социал бургаврил мастер-классру. Мукунма барчаллагьру баян бунни «Жагьилсса пишакартал» тIисса WorldSkills Rossia миллатирттал VIII чемпионатрал финалданий хьхьичIунсса хIасиллу дурсса медколледжрал пишакартуран ва студентътуран.
Центрданухьхьун аккредитация дуллуну махъ хIадур буллантIиссар медициналул идарарттай медициналул ва социал кумагру бан ихтияр дусса пишакартал. Мукунма шикку хIадур буллантIиссар WorldSkills чемпионатирттай гьуртту хьунсса ихтиярду дусса экспертъталгу.
