Гьашину Дагъусттаннал ацIра шяраву бивхьуну бур модульныйсса фельдшерско-акушерский пунктру. ЦIанакул ласлай бур миккун аьркинсса оборудование. Чялишну зий бур мукунмасса ФАП-ру уттигу кьура шяраву бихьлай.
Зулайхат Тахакьаева
Гьашинусса шинал жула республикалий бан ккаккан бувну бивкIун бур ацIния урчIва ФАП, миннува ацIва — «Здравоохранение» нацпроектрал лагрулий. Амма ФАП-ру машан ласласийни ЦIуллу-сагъшиву дуруччаврил министерствалуща махъун щун дан бювхъусса арцу диял хьуну дур ца ФАП ялагу бан. ЦIуллу-сагъшиву дуруччаврил министр Жамалуттин ХIажиибрагьимовлул бусласимунийн бувну, кьувагу медпункт зузи бан тIий бусса бур шинал ахирданийннин.
«Районнал цIуллу-сагъшиву дуруччаврил гьану цIусса ФАП-дайну цIакь баврийну жущава бюхъантIиссар агьалинан цалчинсса медициналул кумаг баву ларай дан. Пунктру лащу-щаллу бантIиссар агьалинан пландалийсса ва анаварсса кумаг бан аьркин дагьайсса ттизаманнул тIалавшиннардацIун даркьусса оборудованиялул»,-тIий ур министр.
Цалчинма-цалчин медпунктру бихьлай бусса бур ми тIитIинсса чарабакъашиву дусса шяраваллаву. Уттинин мукунсса ФАП-ру бивхьуну бур Ахъушиял, Сергокъалаллал, Къаяккантуллал, Дарбантуллал, Табасараннал ва Хивуллал районнай.
ДакIнийн бутан, «Развитие первичной медико-санитарной помощи» тIисса проект щурущи даврил лагрулий, ларгсса шинал кьура шяраву бивхьуну бур цIусса модульный ФАП-ру, цивгу гьарца аьркинмунил дузал бувсса. Шиккува кIицI бан, цIубутIуй арцу итадаркьуну диркIун дур ацIния ххюва ФАП бансса. Амма маша буллалийни махъун щун дан бювхъусса арцух машан лавсун бивхьуну бусса бур ххюва ФАП ялагу.
