АхIмад-Хан СултIаннул цIасса турнир Ярославрай

Октябрь зурул шамунний Ярославль шагьрулий хьунни Совет Союзрал кIийла Виричу АхIмад-Хан Султ1аннул кубок ласунсса мини- футболданул турнир.


П. Рамазанова
Ва сайки гьар шинах дувайсса турнирди, гьашинумур ацIийлчинссар. Юбилейри гьамин. Ттуплий дуккайссар Централ федерал округирттаясса дагъусттанлувтурал командартту. Турнирданул дайдихьу дурну дур ацIра шинал хьхьичI Ярославран 1000 шин хъанахъисса ва Виричувнал гьайкал Ярославрай дацIан дуллалисса ппурттуву. Тара шинал Ярославрал областьрайсса Дагъусттаннал диаспоралул хIукму бувссия турнир гьар шинах дуллан, личIи- личIисса шагьрурдай дугу- дувайссия. Гьашину Виричувнан 100 шин хъанахъисса юбилейгу духьувкун, юбилейрал турнир Ярославрайра дунни. Тайннал областьрайсса Дагъусттаннал хIукуматрал вакил Асланбаг Далгатовлул бувсмунийн бувну, укунсса турнирдал цIакь дуллалиссар регионнал хIала- гьурттушиврийсса арардугу, чантI учин буллалиссар жагьилтурал дакIурдивугу патриот асарду.