Октябрь зурул 5-нний Дагъусттаннал БакIчи Владимир Васильев хьунаавкьунни (WorldSkill Russia) «Жагьилсса пишакартурал» VIII-мур чемпионатрал финалданий гьуртту хьусса призертуращал, экспертътуращал ва «Навыки мудрых» тIисса миллатирттал III-мур чемпионатрал финалданий гьурттушинна дурсса пишакартуращал.
Имара Саидова
Шиккува бусан, сентябрь зурул 6-нния 21-ннийнин Кемеровский областьрай най бивкIсса «Жагьилсса пишакартал» тIисса миллатирттал VIII-мур чемпионатрал финал гьашину цалчинни хьусса манзилданул режимрай.
Чемпионатрай гьурттушинна дурми барча буллай, Дагъусттаннал БакIчи Владимир Васильевлул кIицI лавгунни Дагъусттаннал цачIун дур командалул хьхьичIунсса хIасиллу дуршиву.
— ЗахIматрал пишарду машгьур баву мурадрайсса суккушинна щала билаятрангу, Дагъусттаннангу хъинну агьамшиву дусса давуну хъанахъиссар. Вай масъаларттах хъуннасса къулагъас дуллай ур Аьрасатнал Президент Владимир Путингу. ХIакьинусса кьини лавайсса даражалул техникалул кадрарду, инженертал, зузалт хIадур баву- му хIукуматрал хьхьичI ххуттай биттур бан аьркинсса масъаларттавасса ца хъанахъиссар. Жула жагьилсса пишакартурал дянив захIматрал пишарду ялу-ялун машгьур хъанай най бур. Укунсса зузалтрайнни хъар хъанахъисса экономикалул бучIантIимургу.
Барчаллагь тIий ура зу хIадур буллай, зущал зий бивкIсса тренертурахьгу. Вай бяст-ччаллаву гьуртту шаву бакъассагу, жунмагу аьркинссар лавайсса квалификациялул пишакартал хIадур буллансса шартIру дузал давриха зун,-увкунни Владимир Васильевлул.
Хъирив захIматрал ва социал хьхьичIуннайшиврул министр Изумруд МухIуттиновал дунни чемпионатрал бяст-ччаллал хIасиллу. Ванил бувсунни гьашинусса чемпионатрай 130 журасса пишардал усттаршиву ккаккан дуллай бивкIшиву 3 азарунния ливчусса пишакартал.
— Жулла республикалий чемпионатрал тIалавшиннардайн бувну хIадур бувну буссия 20-хъул журалул пишардал магьиршиву ккаккан дуллалисса 12 площадка. 2016 шиная шинмай Дагъусттан гьуртту хъанай буссар вай чемпионатирттай. Ялу-ялун гьарза хъанай бур шикку гьуртту хъанахъисса пишакарталгу. Гьашинусса бяст-ччаллал финалданий гьуртту хьусса 29 пишакарнава 10-ннал бувгьунни хьхьичIунсса кIанттурду. Финалданул бяст-ччаллаву гьуртту хьусса 21 гьурттучи ия 16-22 шинал оьрмулувусса., 8 гьурттучи уссия 16 шинал оьрмулувун бияннинсса пишакартуравух гьуртту хьусса. Изумруд МухIуттиновал кIицI лавгунни лавайсса даражалийсса кIулшивуртту дулаврил даву дачин дурну бушиву «Кванториум» тIисса оьрчIал технопаркрал чIиви академиялуву ва республикалул колледжирттаву.
Миллатирттал VIII-мур чемпионатрал финалданий Дагъусттаннал цачIун дур командалул ларсунни арцул ва чарвитул медаллу. Мукунна, 8 медаль ларсунни пишалул ларайсса профессионализмалухлусса.
Мюнпатсса сиптарду ва насихIатру бусласисса ихтилатру бунни экспертътурал ва гьурттучитурал.
Ихтилатирттая махъ чемпионатрай ххув хьуминнан наградартту дуллалисса мажлис тIивтIунни Владимир Васильевлул.
